Abọ 17

Jesu O Wuhrẹ Ahwo Kpahe Uvie Ọghẹnẹ

Jesu o wuhrẹ ilele riẹ eware buobu, rekọ Uvie Ọghẹnẹ họ ugogo uzoẹme nọ ọ tẹrovi

EME Jesu ọ ziọ otọakpọ ti ru? Ọ ta nọ: “Mẹ rẹ vuẹovuẹ usiuwoma uvie Ọghẹnẹ . . . keme fiki onana a je vi omẹ ze.” (Luk 4:43) Roro kpahe eware ene jọ nọ Jesu o wuhrẹ ahwo kpahe Uvie yena, onọ o jọ ugogo uzoẹme usiuwoma ota riẹ.

1. Jesu ọ te jọ Ovie na. Jesu ọ ta vevẹ inọ ọye họ Mesaya nọ a ruẹaro riẹ na. (Jọn 4:25, 26) O te je ru ae riẹ inọ ọye họ Ovie nọ Daniẹl ọruẹaro na ọ ruẹ evaọ eruẹaruẹ na. Jesu ọ vuẹ ilele riẹ inọ oke o be tha nọ ọ te keria “agbara uvie oruaro,” gbe inọ ilele na omarai a te keria egbara uvie re. (Matiu 19:28) O se utu isu nana “uthuru okakao” riẹ, jẹ vuẹ ae inọ o wo “igodẹ efa” nọ e rrọ usu uthuru okakao na ha.—Luk 12:32; Jọn 10:16.

2. Uvie Ọghẹnẹ o te wha uvioziẹ haro. Jesu o dhesẹ nọ Uvie na o te rọ uvioziẹ ze, si ọtaraha nọ ọ mae rro kpaobọ no ẹkwoma odẹ Jihova Ọghẹnẹ nọ u ti ru fo je si ekela kpobi nọ Setan ọ wha se odẹ yena no anwọ okenọ ọkparesuọ ọ romavia evaọ ọgbọ Idẹn. (Matiu 6:9, 10) Jesu o je dhesẹ ababọ-ọriẹwẹ kẹdẹ kẹdẹ re ẹkwoma oghẹrẹ ahwo kpobi nọ o je wuhrẹ, te ezae te eyae, edafe gbe iyogbere. Dede nọ re o wuhrẹ emọ Izrẹl ọ mae rọ fiki riẹ nyaze, o wuhrẹ ahwo Sameria gbe ahwo erẹwho efa. Wo ohẹriẹ no isu egagọ edẹ riẹ, Jesu o dhesẹ ọriẹwẹ hayo rri ahwo jọ aro vi amọfa ha.

3. Uvie Ọghẹnẹ u wo abọ ọvo kugbe akpọ nana ha. Jesu ọ rria evaọ etoke nọ oma-uhrowo isuẹsu o rọ j’otọ. Orẹwho ofa u je su ẹkwotọ rai. Ghele na, nọ ahwo a jẹ gwọlọ ru ei duomahọ isuẹsu oke riẹ, o sioma no. (Jọn 6:14, 15) Ọ vuẹ osu jọ nọ: “Uvie mẹ [o rrọ] orọ akpọ na ha.” (Jọn 18:36) Ọ ta kẹ ilele riẹ inọ: “Wha rọ erọ akpọ na ha.” (Jọn 15:19) Ọ kẹ ilele riẹ uvẹ re a rehọ ekwakwa ẹmo họre he, makọ re a rehọ ae thọ ọyomariẹ dede.—Matiu 26:51, 52.

4. Kristi ọ te rọ uyoyou su. Jesu ọ ya eyaa inọ ọ te kẹ ahwo udhedhẹ, je ti ru ewha rai vori. (Matiu 11:28-30) Ere o gine ru okenọ ọ jọ otọakpọ. Ọ kẹ ehrẹ nọ i wiruo kpahe epanọ a rẹ rọ whaha awaọruọ, wo uvi oyerikugbe, whaha efe ole, je duku evawere. (Matiu, uzou avọ 5 rite orọ avọ 7) Fikinọ Jesu ọ jọ yoyou, o jọ lọlọhọ kẹ oghẹrẹ ahwo kpobi re a sikẹle iẹe. Makọ enọ a kienyẹ dede a jẹ hae nyabru Jesu, avọ evaifihọ inọ ọ te riẹ ai ru je bru ọghọ họ ae oma. Jesu ginọ emamọ Osu!

Jesu ọ rọ edhere ologbo ọfa jọ wuhrẹ ahwo kpahe Uvie Ọghẹnẹ. O ru eware igbunu buobu. Fikieme? Joma ruẹ.

—Wọhọ epanọ o rrọ obe Matiu, Mak, Luk, gbe Jọn.

◼ Ẹvẹ Jesu o ro wuhrẹ ahwo inọ ọyomariẹ họ Mesaya Ovie na?

◼ Ẹvẹ Jesu o ro dhesẹ via inọ ọriẹwẹ ọ te jọ esuo riẹ hẹ?

◼ Ẹvẹ Jesu o ro ru ei vẹ inọ Uvie riẹ u wo abọ ọvo kugbe akpọ nana ha?

◼ Ẹvẹ Jesu o ro dhesẹ inọ esuo riẹ ọ te jọ avọ uyoyou?

[Eme nọ a fi ẹgba họ nọ e rrọ ẹwẹ-obe avọ 20]

‘O je kpohọ . . . iwhre, be vuẹ ovuẹ usiuwoma uvie Ọghẹnẹ.’—Luk 8:1

[Omaa-iruo nọ e rrọ ẹwẹ-obe avọ 20]

Emuhọ

Ọnyano

Iruo-Izerẹ

Ikelakele

Iziewariẹ

Joshua

Ibruoziẹ

Rut

1 Samuẹle

2 Samuẹle

1 Ivie

2 Ivie

1 Iruẹru-Ivie

2 Iruẹru-Ivie

Ẹzra

Nehemaya

Ẹsta

Job

Ilezi

Maeka

Nahum

Habakuk

Zefanaya

Hagai

Zekaraya

Malakae

● Matiu

● Mak

● Luk

● Jọn

Iruẹru Ikọ Na

Ahwo Rom

1 Ahwo Kọrint

2 Ahwo Kọrint

Ahwo Galesha

Ahwo Ẹfẹsọs

Ahwo Filipai

Ahwo Kọlọsi

1 Ahwo Tẹsalonika

2 Ahwo Tẹsalonika

1 Timoti

2 Timoti

Taitọs

Filimọn

Ahwo Hibru

Jemis

1 Pita

2 Pita

1 Jọn

2 Jọn

3 Jọn

Jud

Eviavia