Job Ọ Yọrọ Ẹgbakiete
Abọ 6
Job Ọ Yọrọ Ẹgbakiete
Setan o fi avro họ ẹgbakiete Job evaọ aro Ọghẹnẹ, rekọ Job ọ dadamu ẹrọwọ riẹ
KỌ OHWO-AKPỌ jọ ọ te sai kru ẹrọwọ evaọ otọ odawọ nọ o mae ga kpaobọ, maero nọ o tẹ wọhọ nọ ẹmeoyo o te kẹe erere ẹsiẹsiẹe he? A nọ onọ yena kpahe Job, yọ a jọ omariẹ ruẹ uyo na re.
Nọ emọ Izrẹl a gbẹ jọ obọ Ijipti, Job, ọnọ ọ jọ omoni Abraham ọ jẹ rria ẹkwotọ nọ a bi se Arebia enẹna. Evaọ oke yena, ikọ-odhiwu a te kokohọ aro Ọghẹnẹ evaọ obọ odhiwu, Setan ohwo ọkparesuọ na ọ jọ udevie rai re. Evaọ aro ogbotu na kpobi, Jihova ọ tẹ ta via inọ o fi eva họ Job odibo riẹ nọ ọ be yọrọ ẹgbakiete. Ẹhẹ, Jihova ọ ta inọ ohwo-akpọ ọvuọvo nọ o kru ẹgbakiete wọhọ Job ọ jọ họ. Rekọ Setan ọ tẹ za zihe inọ fikinọ Ọghẹnẹ ọ ghale Job jẹ be thọe jabọ nọ Job ọ be rọ gọ Ọghẹnẹ. Setan ọ ta inọ a te mi Job eware kpobi nọ o wo, ọ te la Ọghẹnẹ eka.
Ọghẹnẹ ọ tẹ kẹ Setan uvẹ re ọ raha efe Job, kpe emọ riẹ, je fi okpẹyao họ iẹe oma. Fikinọ ọ riẹ nọ Setan ọ be wha onana ze he, o kẹ Job uye oware nọ Ọghẹnẹ ọ jẹ kẹ uvẹ re okpẹtu otiọna o tei. Ghele na Job o kiuke ku Ọghẹnẹ hẹ.
Egbẹnyusu eviẹhọ esa a te bru Job ze. Evaọ eme nọ a ta nọ a kere fihọ obe Job, ezae nana a jẹ gwọlọ ru Job roro inọ Ọghẹnẹ ọ be kẹe uye fiki eware iyoma nọ o ru nọ ọ ko dhere. A tubẹ ta dede inọ Ọghẹnẹ ọ rẹ jọ oma idibo riẹ ruẹ ewoma ha, yọ o fi eva họ ai gbe he. Job ọ rọwo kugbe iroro ethọthọ rai na ha. Avọ udu riẹ kpobi, Job ọ ta inọ ọ te yọrọ ẹgbakiete riẹ rite uwhu!
Rekọ Job o ru thọ nọ ọ jẹ rọ gwọlọ dhesẹ omariẹ vrẹta inọ o kiẹrẹe. Elaihu, ọnọ ọ jọ ọmaha kẹ otu ọdekọ na, nọ ọ gaviezọ no emuhọ ẹmeọta na ze, ọ tẹ ta ẹkẹ-unu riẹ. Elaihu ọ tẹme kẹ Job fikinọ ọ sai vuhumu hu inọ ẹkpare kpehru esuo Jihova Ọghẹnẹ u wuzou vi oma-udhesẹ ẹrẹreokie omobọ ohwo. Elaihu ọ tẹ jẹ rọ eme fa egbẹnyusu eviẹhọ Job na ovao.
Kẹsena Jihova Ọghẹnẹ ọ tẹ ta ẹme kẹ Job, kpọ eriwo riẹ vi. Ẹkwoma emama igbunu buobu nọ Jihova o si iroro Job kpohọ, o ru Job ruẹ epanọ ohwo-akpọ ọ kawo te nọ a tẹ rehọ iẹe wawọ oruaro Ọghẹnẹ. Job ọ rọ omaurokpotọ jẹ ọkpọvio nọ Ọghẹnẹ ọ kẹ riẹ rehọ. Jihova nọ “o wo ohrọ avọ uwero” na, ọ wariẹ kẹ Job omokpokpọ, wariẹ kẹe akuava efe riẹ, jẹ rọ emọ ikpe efa rọ ghale iẹe. (Jemis 5:11) Ẹkwoma ẹgbakiete nọ ọ yọrọ evaọ otọ ẹdawọ ọgaga, Job ọ kẹ uyo ogbagba kpahe use-abọ Setan nọ ọ ta nọ ahwo-akpọ a rẹ sai yoẹme kẹ Ọghẹnẹ hẹ evaọ otọ odawọ.
—Wọhọ epanọ o rrọ obe Job.
◼ Avro vẹ Setan ọ kpare ze kpahe Job?
◼ Eme o no ẹgbakiete nọ Job ọ yọrọ ze?
[Etehe nọ e rrọ ẹwẹ-obe avọ 9]
ẸME-AVRO NA
Ẹkwoma avro nọ Setan ọ wha ze inọ Job, ọzae nọ ọ mai kiẹrẹe jẹ kare afuẹwẹ oke yena, ọ be gọ Jihova Ọghẹnẹ fiki eware iwoma nọ Ọghẹnẹ ọ kẹ riẹ, Setan ọ rọ ere ta nọ ẹjiroro ọvona ọ be wọ emama kpobi gọ Ọghẹnẹ. Setan ọ rọ ere fi avro họ ẹgbakiete ohwo-akpọ. Onana yọ abọjọ avro nọ Setan ọ kpare ze evaọ ọgbọ Idẹn na, onọ u kiekpahe udu-esuo gbe ewoma ọrọ esuo-ehrugbakpọ Jihova. Obe Job o kẹ imuẹro inọ ẹkwoma ẹgbakiete rai nọ a rẹ yọrọ, idibo Ọghẹnẹ a rẹ sai dhesẹ via inọ a rrọ abọ Jihova evaọ avro esuo-ehrugbakpọ nọ Setan ọ kpare ze na.
[Omaa-iruo nọ e rrọ ẹwẹ-obe avọ 9]
Emuhọ
Ọnyano
Iruo-Izerẹ
Ikelakele
Iziewariẹ
Joshua
Ibruoziẹ
Rut
1 Samuẹle
2 Samuẹle
1 Ivie
2 Ivie
1 Iruẹru-Ivie
2 Iruẹru-Ivie
Ẹzra
Nehemaya
Ẹsta
Job ●
Ilezi
Itẹ
Ọtausiuwoma Na
Ole nọ O Vi Ile
Aizaya
Jerimaya
Enuobro
Izikiẹl
Daniẹl
Hosia
Joẹl
Emọs
Obedaya
Jona
Maeka
Nahum
Habakuk
Zefanaya
Hagai
Zekaraya
Malakae
Matiu
Mak
Luk
Jọn
Iruẹru Ikọ Na
Ahwo Rom
1 Ahwo Kọrint
2 Ahwo Kọrint
Ahwo Galesha
Ahwo Ẹfẹsọs
Ahwo Filipai
Ahwo Kọlọsi
1 Ahwo Tẹsalonika
2 Ahwo Tẹsalonika
1 Timoti
2 Timoti
Taitọs
Filimọn
Ahwo Hibru
Jemis
1 Pita
2 Pita
1 Jọn
2 Jọn
3 Jọn
Jud
Eviavia