Abọ 25

Ohrẹ kpahe Ẹrọwọ, Ẹfuọ-Uruemu, gbe Uyoyou

Jemis, Pita, Jọn, gbe Jud a kere ileta rọ bọ ibe Ileleikristi rai ga

JEMIS avọ Jud yọ inievo Jesu dẹe. Pita avọ Jọn a jọ usu ikọ 12 Jesu. Ezae ene yena a kere ileta ihrẹ, enọ ma rẹ jọ Ikereakere Griki Ileleikristi na ruẹ. Odẹ ahwo nọ a kere i rai a ro se ileta nana ọvuọvo. Ẹjiroro ohrẹ nọ o rrọ ileta enana họ re u fi obọ họ kẹ Ileleikristi yọrọ ẹgbakiete je si Uvie Ọghẹnẹ te iroro ẹsikpobi.

Wo ẹrọwọ. Re a rọ igbenu ọvo ta nọ me wo ẹrọwọ u te he. Uvi ẹrọwọ ọ rẹ wọ ohwo ru iruo. Jemis o kere nọ: “Orọwọ nọ u wo iruo ho u whu no.” (Jemis 2:26) Ẹrọwọ nọ ma re kru evaọ otọ ẹdawọ o rẹ lẹliẹ omai wo akothiho. Re onana o sae lọhọ, Oleleikristi ọ rẹ yare areghẹ mi Ọghẹnẹ, avọ evaifihọ inọ Ọghẹnẹ ọ rẹ te rehọ iẹe kẹe. Akothiho o re si ohwo kẹle Ọghẹnẹ. (Jemis 1:2-6, 12) Jihova Ọghẹnẹ o re fi obọ họ kẹ odibo riẹ nọ ọ rọ ẹrọwọ yọrọ ẹgbakiete riẹ. Jemis ọ ta nọ: “Bigba Ọghẹnẹ o re ti bigba owhẹ.”—Jemis 4:8.

O gwọlọ nọ Oleleikristi o re wo ẹrọwọ ọgaga nọ o re fi obọ họ kẹe dikihẹ ga kẹ edawọ jẹ whaha iruemu iyoma. Uruemu ugbegbe nọ u je titi, u ru nọ Jud ọ rọ tuduhọ ibe Ileleikristi riẹ awọ inọ a “họre kẹ orọwọ na.”—Jud 3.

Yọrọ ẹfuọ-uruemu. Jihova o rẹro mi idibo riẹ inọ a rẹ jọ ọrẹri, koyehọ a rẹ jọ fuafo evaọ kabọ kabọ. Pita o kere nọ: “Whai omarai wha jọ eva uruemu rai kpobi jọ fuafo re; keme a kere nọ, ‘Wha rẹte [jọ] ọrẹri, keme mẹ [Jihova] ọrẹri.’” (1 Pita 1:15, 16) Ileleikristi a wo uvi oriruo nọ a rẹ raro kele. Pita ọ ta nọ: “Kristi ọ ruẹ uye kẹ owhai no re, o te fi oriruo họ-otọ kẹ owhai re wha rọ kpahe ithihi riẹ.” (1 Pita 2:21) Dede nọ uye o rẹ sae bẹ Ileleikristi fikinọ a be rria lele itee Ọghẹnẹ, oyena u re ru ai wo ‘iroro efuafo.’ (1 Pita 3:16, 17) Pita ọ tuduhọ Ileleikristi awọ inọ a yeri uzuazọ ẹfuọ je ru iruo nọ i re dhesẹ ai fihọ ahwo Ọghẹnẹ nọ a be hẹrẹ ẹdẹ ẹdhoguo Ọghẹnẹ gbe akpọ ọkpokpọ nọ a ya eyaa riẹ na, onọ “ẹrẹreokie ọ be ria.”—2 Pita 3:11-13.

Dhesẹ uyoyou. Jọn o kere nọ: “Ọghẹnẹ họ uyoyou.” Ọ ta vevẹ inọ Ọghẹnẹ o dhesẹ uyoyou ulogbo ẹkwoma Jesu nọ o vi ze wọhọ “okiofu izieraha mai.” Kọ didi owọ u fo nọ Ileleikristi a rẹ jẹ kpahe onana? Jọn o ru rie vẹ inọ: “Iyoyou mẹ, re Ọghẹnẹ o te you omai ere, ufore mai ohwo o you ohwo ere re.” (1 Jọn 4:8-11) Edhere ọvo jọ nọ ma re ro dhesẹ ọkpọ uyoyou yena họ, ibe Ileleikristi mai nọ ma re se gboma je fi obọ họ kẹ.—3 Jọn 5-8.

Ghele na, oghẹrẹ vẹ enọ e be gọ Jihova a sai ro dhesẹ uyoyou kẹ ọyomariẹ dẹe? Jọn ọ kẹ uyo na: “Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.” (1 Jọn 5:3; 2 Jọn 6) Ọghẹnẹ ọ kẹ enọ i bi yoẹme kẹe imuẹro inọ a te jọ eva uyoyou riẹ ẹsikpobi, yọ ọ te kẹ ae “uzuazọ ebẹdẹ bẹdẹ.”—Jud 21.

—Wọhọ epanọ o rrọ obe Jemis; Pita Ọsosuọ gbe ọrọ Avivẹ; Jọn Ọsosuọ; ọrọ Avivẹ; gbe ọrọ Avesa; Jud.

◼ Ẹvẹ Oleleikristi ọ sai ro dhesẹ ẹrọwọ via?

◼ Oghẹrẹ uruemu vẹ Ọghẹnẹ o rẹro riẹ mi enọ e be gọe?

◼ Ẹvẹ ohwo o re ro dhesẹ inọ o gine you Ọghẹnẹ?

[Eme nọ a fi ẹgba họ nọ e rrọ ẹwẹ-obe avọ 29]

“Bigba Ọghẹnẹ o re ti bigba owhẹ.”—Jemis 4:8

Omaa-iruo nọ e rrọ ẹwẹ-obe avọ 29]

Emuhọ

Ọnyano

Iruo-Izerẹ

Ikelakele

Iziewariẹ

Joshua

Ibruoziẹ

Rut

1 Samuẹle

2 Samuẹle

1 Ivie

2 Ivie

1 Iruẹru-Ivie

2 Iruẹru-Ivie

Ẹzra

Nehemaya

Ẹsta

Job

Ilezi

Itẹ

Ọtausiuwoma Na

Ole nọ O Vi Ile

Aizaya

Jerimaya

Enuobro

Izikiẹl

Daniẹl

Zekaraya

Malakae

Matiu

Mak

Luk

Jọn

Iruẹru Ikọ Na

Ahwo Rom

1 Ahwo Kọrint

2 Ahwo Kọrint

Ahwo Galesha

Ahwo Ẹfẹsọs

Ahwo Filipai

Ahwo Kọlọsi

1 Ahwo Tẹsalonika

2 Ahwo Tẹsalonika

1 Timoti

2 Timoti

Taitọs

Filimọn

Ahwo Hibru

Jemis ●

1 Pita ●

2 Pita ●

1 Jọn ●

2 Jọn ●

3 Jọn ●

Jud ●

Eviavia