Abọ 23

Usiuwoma na O Ruọ Eghagha avọ Eghagha

Pọl ọ nya orọ okpa gbe orọ ame evaọ erẹ usiuwoma ota riẹ

NỌ Pọl o kurẹriẹ no, ọ rọ ajọwha whowho usiuwoma Uvie Ọghẹnẹ—ọyomariẹ nọ o je kpokpo eg’Ọghẹnẹ vẹre na ọ tẹ te rẹriẹ ovao dhe ukpokpoma ogaga. Ukọ nana nọ ọ vọ avọ ajọwha na o kpohọ erẹ usiuwoma ota ẹsibuobu, je kpohọ ugbothabọ nyae ta usiuwoma Uvie nọ u ti ru ẹjiroro ọsosuọ Ọghẹnẹ kẹ ahwo-akpọ gba.

Evaọ erẹ usiuwoma ota ọsosuọ riẹ, Pọl ọ jọ ẹwho Listra siwi ọzae nọ ọ ko no eva oni riẹ ze. Nọ a ruẹ onana, ogbotu na o te je bo inọ Pọl avọ Banabas nọ a gbẹ jọ usu na yọ eghẹnẹ. Udugaga a sae rọ whaha ahwo na nọ a gbe ro dhe idhe kẹ ai hi. Rekinọ ewegrẹ Pọl a lẹliẹ ae họ, ogbotu ọvo nana ọ tẹ rehọ itho fi Pọl, a tẹ nyase iẹe ba nọ a roro nọ o whu no. Rekọ Pọl o whu hu, o zihe kpohọ ẹwho yena uwhremu na nyae tuduhọ ilele nọ e jọ obei awọ.

Ileleikristi ahwo Ju jọ a je sikẹ inọ o gbahọ inọ ahwo erẹwho egedhọ nọ i kurẹriẹ a re koko abọjọ Uzi Mosis na. Pọl ọ tẹ wọ ẹme na bru ikọ gbe ekpako nọ e jọ obọ Jerusalẹm. Nọ a roma totọ kiẹ Ikereakere na no, avọ obufihọ ẹzi ọfuafo Ọghẹnẹ, ekpako na a te kere se ikoko na jẹ tuduhọ ae awọ inọ a si oma no ẹdhọgọ, azẹ-ọriọ avọ erao nọ a bru uriohọ rai hi, gbe igberedia. Ijaje yena “i fori,” rekọ ekoko rai o gbahọ nọ a re lele Uzi Mosis na ha.—Iruẹru Ikọ Na 15:28, 29.

Evaọ erẹ usiuwoma ota avivẹ riẹ, Pọl o kpohọ Bẹria, onọ o rrọ ẹkwotọ Grisi enẹna. Ahwo Ju nọ e jọ ẹwho nana a rọ ọwhọ jẹ emamọ usi na rehọ, jẹ kiẹ Ikereakere na riwi kẹdẹ kẹdẹ sọ uwuhrẹ Pọl na ginọ uzẹme. Wọhọ epanọ o kake via kẹe no, ukpokpoma u te je ru nọ o ro no etẹe kpohọ Athẹns. Evaọ aro ahwo Athẹns nọ e riẹ ikpebe, Pọl ọ tẹ kẹ ovuẹ jọ nọ u wo ẹgba gaga, onọ ma re jo wuhrẹ onaa-ẹmeọta, orimuo, gbe ẹgba-ofihọ ẹme.

Nọ o no erẹ usiuwoma ota avesa riẹ ze no, Pọl o te kpohọ Jerusalẹm. Nọ o kpohọ etẹmpol evaọ etẹe, ahwo Ju jọ a te je ru ozighi, be gwọlọ epanọ a re ro kpei. Elakpa Rom a tẹ dhogbo ze, whaha ozighi na, jẹ rọ enọ kiẹ Pọl. Fikinọ ọ rrọ ọmotọ Rom, a kẹ Pọl uvẹ ta ẹkẹ unu riẹ evaọ aro Fẹliks, Ọba Rom. Ahwo Ju na a sae ruẹ oware ovo jobọ kru evaọ eku nọ a wọ họ Pọl uzou na ha. Re Fẹstọs, ọba ọkpokpọ nọ o nwene ẹta Fẹliks ọ siẹe ba esiobọno kẹ ahwo Ju, Pọl ọ tẹ ta nọ: “Me tu ẹdhọ mẹ kpobọ Siza!” Fẹstọs o te yo kẹe nọ: “Obọ Siza who re kpohọ.”—Iruẹru Ikọ Na 25:11, 12.

A tẹ rọ okọ wọ Pọl bi kpohọ Itali re a rehọ iẹe gu ẹdhọ. Okọ na u zue rai, a tẹ jọ ukoliko Malta evaọ etoke uriri. Uwhremu na nọ a te Rom no, Pọl ọ tẹ jọ uwou nọ ọ haya ikpe ivẹ jẹ hẹrẹ oke ẹdhoguo na. Dede nọ elakpa i je roro iei, ukọ nana nọ o wo ajọwha gaga na ọ ruabọhọ usiuwoma ota Uvie Ọghẹnẹ kẹ ahwo kpobi nọ i weze bru ei ze.

—Wọhọ epanọ o rrọ obe Iruẹru Ikọ Na 11:22–28:31.

◼ Eme ọ via nọ Pọl o siwi ọzae jọ nọ ọ ko evaọ Listra?

◼ Ẹvẹ a ro ku avro nọ ọ romavia kpahe ekoko Uzi Mosis na họ?

◼ Eme ọ soriẹ nọ Pọl o ro kpobọ Rom, kọ eme o ru evaọ obei?

[Omaa-iruo nọ e rrọ ẹwẹ-obe avọ 26]

Emuhọ

Ọnyano

Iruo-Izerẹ

Ikelakele

Iziewariẹ

Joshua

Ibruoziẹ

Rut

1 Samuẹle

2 Samuẹle

1 Ivie

2 Ivie

1 Iruẹru-Ivie

2 Iruẹru-Ivie

Ẹzra

Nehemaya

Ẹsta

Job

Ilezi

Itẹ

Ọtausiuwoma Na

Ole nọ O Vi Ile

Aizaya

Jerimaya

Enuobro

Izikiẹl

Daniẹl

Hosia

Joẹl

Emọs

Obedaya

Jona

Maeka

Nahum

Habakuk

Zefanaya

Hagai

Zekaraya

Malakae

Matiu

Mak

Luk

Jọn

● Iruẹru Ikọ Na

Ahwo Rom

1 Ahwo Kọrint

2 Ahwo Kọrint

Ahwo Galesha

Ahwo Ẹfẹsọs

Ahwo Filipai

Ahwo Kọlọsi

1 Ahwo Tẹsalonika

2 Ahwo Tẹsalonika

1 Timoti

2 Timoti