UWUHRẸ AVỌ 06
Ẹvẹ Uzuazọ U ro Muhọ?
Ebaibol na ọ ta nọ, “Obọ [Ọghẹnẹ] uzuazọ u no ze.” (Olezi 36:9) Kọ whọ rọwo ẹme yena? Ahwo jọ a roro nọ uzuazọ u no obọ ohwo ọvo ze he. Otẹrọnọ ẹme yena ginọ uzẹme, koyehọ ma rrọ uzuazọ gheghe keme ma muhọ idudhe. Rekọ otẹrọnọ Jihova Ọghẹnẹ họ ọnọ ọ ma uzuazọ, kiyọ u re wo ẹjiroro nọ ọ rọ mae, o gbẹ rrọ ere? a Wuhrẹ kpahe epanọ Ebaibol na o dhesẹ nọ uzuazọ u ro muhọ gbe oware nọ u ro fo re ma rọwo ẹme Ebaibol na.
1. Oghẹrẹ vẹ ehrugbakpọ na o ro muhọ?
Ebaibol na ọ ta nọ: “Evaọ emuhọ Ọghẹnẹ ọ ma idhiwu gbe otọakpọ na.” (Emuhọ 1:1) Egba-eriariẹ buobu a rọwo nọ ehrugbakpọ na o wo emuhọ. Ẹvẹ Ọghẹnẹ ọ rọ mae? “Ogaga-iruo” riẹ, koyehọ ẹzi ọfuafo riẹ ọ rọ ma eware kpobi nọ e rrọ ehrugbakpọ na, te eko-isi, isi na, gbe eplanẹte sa-sa.—Emuhọ 1:2.
2. Fikieme Ọghẹnẹ ọ rọ ma otọakpọ na?
Jihova “ọ ma riẹ, orọnikọ ọ mae gheghe ababọ ẹjiroro ho, rekọ ọ ruẹrẹ iẹe họ re a rriae.” (Aizaya 45:18) Ọ ma otọakpọ na wowoma re ahwo-akpọ a sae rriae bẹdẹ bẹdẹ. (Se Aizaya 40:28; 42:5.) Egba-eriariẹ a ruẹ nọ otọakpọ na o wo ohẹriẹ. Otọakpọ na ọvo họ eplanẹte nọ ahwo-akpọ a rẹ sae rria.
3. Eme u ru ahwo-akpọ wo ohẹriẹ no erao?
Nọ Jihova ọ ma otọakpọ na no, ọ tẹ ma eware nọ i wo uzuazọ fihọ iẹe. Orọ ọsosuọ, ọ ma ekakọ, ire, gbe erao fihọ iẹe. Kẹsena, “Ọghẹnẹ ọ tẹ ma ohwo evaọ uwoho riẹ.” (Se Emuhọ 1:27.) Kọ eme u ru ahwo-akpọ wo ohẹriẹ? Nọ orọnọ a ma omai evaọ uwoho Ọghẹnẹ na, ma rẹ sai dhesẹ ọkpọ iruemu riẹ wọhọ uyoyou gbe uvi-oziẹ. Ọghẹnẹ ọ tẹ jẹ ma omai evaọ oghẹrẹ nọ ma sai ro wuhrẹ evẹrẹ, rri eware nọ i wo erru, gaviezọ kẹ ile hayo so ile. Yọ ma rẹ sae gọ Ọnọ ọ ma omai na re, oware nọ erao e rẹ sai ru hu.
GBE WUHRẸ EWARE EFA
Wuhrẹ kpahe oware nọ u dhesẹ nọ ẹma a ma uzuazọ gbe oware nọ u ro fo re ma rọwo oghẹrẹ nọ Ebaibol na o dhesẹ nọ a rọ ma eware. Je wuhrẹ kpahe oware nọ iruemu ohwo-akpọ i wuhrẹ omai kpahe Ọghẹnẹ.
4. Ẹma a ma uzuazọ
Ahwo-akpọ a re rri eware nọ e rrọ uzuazọ ro ku eware, yọ a re jiri ai kẹ onana. Kọ ono u fo nọ a re jiri rọkẹ eware nọ a rri tho na? Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Eware jọ vẹ ahwo-akpọ a rri ro ku eware efa no?
Uwou kpobi u wo ohwo nọ ọ drọ omaa uwou na jẹ bọe. Rekọ ono ọ ma omaa eware nọ e rrọ akpọ na kpobi je ru ai? Se Ahwo Hibru 3:4, kẹsena wha vẹ ta ẹme kpahe enọ nana:
-
Eme ọ mae were owhẹ evaọ eware nọ a ma fihọ akpọ na?
-
Kọ u gine fo re ma rọwo nọ ẹma a ma ehrugbakpọ na gbe eware kpobi nọ e riẹe eva? Fikieme whọ rọ ta ere?
Kọ whọ riẹ?
Whọ rẹ sae ruẹ izoẹme gbe ividio nọ a jọ ta kpahe ẹme nana evaọ jw.org evaọ oria “Kọ Ẹma A Ma Riẹ?” gbe “Eriwo Ahwo Kpahe Oghẹrẹ nọ Uzuazọ U ro Muhọ.”
“Ẹhẹ, uwou kpobi u wo ohwo nọ ọ bọ riẹ, rekọ ọnọ ọ ma eware kpobi họ Ọghẹnẹ”
5. Ma sae rọwo iku epanọ a rọ ma eware nọ e rrọ Ebaibol na
A jọ obe Emuhọ uzou 1 evaọ Ebaibol na gbiku epanọ otọakpọ na gbe uzuazọ u ro muhọ. Kọ whọ sae ginẹ rọwo iku yena, manikọ yọ iku erue gheghe? Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Kọ Ebaibol na o wuhrẹ nọ edẹ ezeza gheghe nọ euwa 24 e rrọ a rọ ma otọakpọ na gbe eware nọ e riẹe eva?
-
Kọ who roro nọ iku epanọ a rọ ma eware nọ e rrọ Ebaibol na e rrọ gbagba? Fikieme whọ rọ ta ere, hayo kọ fikieme who gbe ro roro ere he?
Se Emuhọ 1:1, kẹsena wha vẹ ta ẹme kpahe onọ nana:
-
Egba-eriariẹ a ta nọ ehrugbakpọ na o wo emuhọ. Ẹvẹ ẹme rai na ọ rọ rọwokugbe oria Ebaibol nọ who se obọnana?
Ahwo jọ a re roro inọ nọ Ọghẹnẹ ọ ma oware jọ no, oware na o te hrerẹ hayo ghroro zihe ruọ eware efa. Se Emuhọ 1:21, 25, 27, kẹsena wha vẹ ta ẹme kpahe enọ nana:
-
Kọ Ebaibol o wuhrẹ nọ, nọ Ọghẹnẹ ọ ma oware jọ nọ u wo uzuazọ no, ọ tẹ kẹe uvẹ hrerẹ zihe ruọ imiyei, erao, gbe ahwo-akpọ? Manikọ ọye ọ ma “oghoghẹrẹ” eware kpobi nọ i wo uzuazọ na? b
6. Ahwo-akpọ a wo ohẹriẹ evaọ eware nọ Ọghẹnẹ ọ ma
Mai ahwo-akpọ ma wọhọ erao nọ Jihova ọ ma na ha. Se Emuhọ 1:26, kẹsena wha vẹ ta ẹme kpahe onọ nana:
-
Nọ orọnọ ma rẹ sai dhesẹ uyoyou gbe ọdawẹ fikinọ uwoho Ọghẹnẹ a rọ ma omai na, eme oyena u dhesẹ kpahe oghẹrẹ ohwo nọ Ọghẹnẹ ọ rrọ?
AHWO JỌ A RẸ TA NỌ: “Iku oghẹrẹ nọ a rọ ma eware nọ e rrọ Ebaibol na yọ iku erue gheghe.”
-
Ẹvẹ who roro? Kọ fikieme who ro roro ere?
EME WHO WUHRẸ NO?
Jihova ọ ma ehrugbakpọ na gbe eware kpobi nọ i wo uzuazọ.
Ọkiẹkpemu
-
Ẹvẹ Ebaibol o dhesẹ nọ ehrugbakpọ na o ro muhọ?
-
Kọ Ọghẹnẹ ọ ma oware jọ nọ u wo uzuazọ no, ọ tẹ kẹe uvẹ hrerẹ zihe ruọ eware efa manikọ ọye ọ ma eware kpobi nọ i wo uzuazọ na?
-
Ẹvẹ ahwo-akpọ a ro wo ohẹriẹ no eware efa nọ i wo uzuazọ?
KIẸ KPAHE EFA
Rri eware jọ nọ u dhesẹ nọ Ọmemama ọ rrọ.
Rri epanọ ọsẹ ọ sai ro wuhrẹ ọmọ riẹ kpahe oghẹrẹ nọ Ọghẹnẹ ọ rọ ma eware.
Se uzoẹme nana re whọ ruẹ sọ ewuhrẹ eghrorotha o rọwokugbe Ebaibol na.
“Kọ Ọghẹnẹ Ọ Ma Eware Jọ nọ I Wo Uzuazọ No Efa I te Hrerẹ No Ai Ze?” (Uzoẹme nọ o rrọ itanẹte)
Se re whọ ruẹ sọ igbenwa nọ a tọ ku hayo eware nọ egba-eriariẹ a kiẹ via i dhesẹ nọ ẹma a ma uzuazọ hayo u mu lahwe.
a Ma te jọ uwuhrẹ avọ 25 ta kpahe ẹjiroro nọ Ọghẹnẹ o wo kẹ ahwo-akpọ.
b Evaọ Ebaibol na, ẹme na “oghoghẹrẹ” u dikihẹ kẹ eko sa-sa erọ eware buobu nọ i wo uzuazọ.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
