UWUHRẸ AVỌ 07
Oghẹrẹ Vẹ Jihova Ọ Rrọ?
Nọ who te roro kpahe Jihova Ọghẹnẹ, eme ọ rẹ ziọ owhẹ iroro? Kọ whọ rehọ e riẹ fihọ ohwo nọ o re mu urirẹ rekọ nọ o thabọ no owhẹ, wọhọ epanọ isi na e rrọ na? Manikọ whọ rehọ e riẹ nọ o wo ogaga wọhọ egbrara rekọ o wo uruemu ọvo nọ a re ro dhesẹ iẹe he? Oghẹrẹ vẹ Jihova ọ ginẹ rrọ? Jihova ọ jọ Ẹme riẹ, Ebaibol na, dhesẹ iruemu riẹ kẹ omai, je dhesẹ nọ ọ be daezọ ra.
1. Fikieme ma gbẹ be ruẹ Ọghẹnẹ hẹ?
“Ọghẹnẹ yọ Ẹzi.” (Jọn 4:24) Jihova o wo ugboma wọhọ ohwo-akpọ họ. Ẹzi ọ rrọ, yọ obọ odhiwu ọ be rria, oria nọ mai ahwo-akpọ ma rẹ sae ruẹ hẹ.
2. Iruemu jọ vẹ Jihova o wo?
Dede nọ ma rẹ sae ruẹ Jihova ha, ohwo dẹẹ ọ rrọ. Yọ ma tẹ ginẹ riẹe, ma rẹ ruẹ nọ o wo emamọ iruemu buobu. Ebaibol na ọ ta nọ: “Jihova o you uvioziẹ, yọ o ti gbabọkẹ enọ e talamu ei hi.” (Olezi 37:28) Ọ tẹ jẹ rrọ “yoyou gaga je wo ohrọ-oriọ,” maero rọkẹ ahwo nọ a be ruẹ uye. (Jemis 5:11) U te no ere no, “Jihova ọ kẹle enọ e rrọ ọkora; o re siwi enọ udu u whrehe.” (Olezi 34:18, ẹme-obotọ) Kọ whọ riẹ nọ uruemu mai o rẹ sai ru eva were Jihova hayo ru eva dhae? Nọ ohwo o te bi ru eware iyoma, o rẹ kẹe uye gaga. (Olezi 78:40, 41) Rekọ nọ ohwo o te bi ru oware uwoma, o rẹ lẹliẹ eva were iẹe gaga.—Se Itẹ 27:11.
3. Oghẹrẹ vẹ Jihova o bi ro dhesẹ nọ o you omai?
Evaọ iruemu kpobi nọ Jihova o wo, uyoyou họ ọrọ ọsosuọ. Ebaibol na ọ tubẹ ta dede nọ, “Ọghẹnẹ họ uyoyou.” (1 Jọn 4:8) Orọnikọ evaọ Ebaibol na ọvo ma rẹ jọ ruẹ nọ Jihova o you omai hi, ma rẹ jẹ jọ eware nọ ọ ma ruẹ oyena re. (Se Iruẹru Ikọ 14:17.) Wọhọ oriruo, dai roro kpahe oghẹrẹ nọ ọ ma omai. Ọ ma omai re ma sae ruẹ emamọ ekọlọ, yo emamọ ile, jẹ re emu ọwewere. Ọ gwọlọ nọ ma ginẹ reawere uzuazọ.
GBE WUHRẸ EWARE EFA
Wuhrẹ kpahe oghẹrẹ nọ Jihova o bi ro ru eware igbunu. Jẹ ruẹ oghẹrẹ nọ o ro ru omai riẹ emamọ iruemu riẹ gbe epanọ o bi ro dhesẹ ai.
4. Ẹzi ọfuafo na yọ ogaga nọ Ọghẹnẹ o bi ro ru iruo
Wọhọ epanọ ma rẹ rọ abọ mai ro ru iruo na, ere Jihova ọ rẹ rọ ẹzi ọfuafo riẹ ro ru iruo. Ebaibol na o dhesẹ nọ ẹzi ọfuafo na yọ ohwo ho, rekọ ogaga nọ Ọghẹnẹ o re ro ru eware. Se Luk 11:13 gbe Iruẹru Ikọ 2:17, kẹsena wha vẹ ta ẹme kpahe enọ nana:
-
Ọghẹnẹ o re “ku” ẹzi ọfuafo riẹ ku ahwo nọ a yare riẹ. Nọ o rrọ ere na, kọ who roro nọ ẹzi ọfuafo na yọ ohwo, manikọ ogaga nọ Ọghẹnẹ o bi ro ru iruo? Fikieme whọ rọ ta ere?
Jihova ọ rẹ rọ ẹzi ọfuafo riẹ ru eware igbunu. Se Olezi 33:6 gbe 2 Pita 1:20, 21, kẹsena wha vẹ ta ẹme kpahe onọ nana:
-
Idhere jọ vẹ Jihova ọ rọ rehọ ẹzi ọfuafo riẹ ru iruo no?
5. Jihova o wo emamọ iruemu sa-sa
Mosis ọ jẹ gọ Ọghẹnẹ ziezi, rekọ ọ gwọlọ nọ ọ rẹ gbẹ riẹ kpahe Ọghẹnẹ nọ ọ ma riẹ na ziezi. Fikiere Mosis ọ tẹ ta kẹ Ọghẹnẹ nọ: “Ru omẹ riẹ idhere ra, re mẹ ruẹse riẹ owhẹ.” (Ọnyano 33:13) Jihova o te dhesẹ iruemu riẹ jọ rọ kẹe. Se Ọnyano 34:4-6, kẹsena wha vẹ ta ẹme kpahe enọ nana:
-
Iruemu vẹ Jihova o dhesẹ kẹ Mosis?
-
Iruemu Jihova vẹ e mae were owhẹ?
6. Jihova ọ be daezọ ahwo
Evaọ oke jọ, ahwo Hibru, koyehọ ahwo Izrẹl nọ a jọ ahwo Ọghẹnẹ, a jọ erigbo evaọ obọ Ijipti. Kọ ẹvẹ oja nọ a jẹ re o kẹ Jihova uye te? Kporo ISASE NỌ A RẸ GAVIEZỌ KẸ na jẹ jọ Ebaibol ra rri lele iei, hayo se Ọnyano 3:1-10. Kẹsena wha vẹ ta ẹme kpahe enọ nọ e rrọ obotọ na.
-
Eme whọ jọ iku nana wuhrẹ kpahe oghẹrẹ nọ Jihova o rri uye nọ ahwo-akpọ a be ruẹ?—Rri owọ avọ 7 gbe 8.
-
Kọ who roro nọ Jihova ọ ginẹ gwọlọ fiobọhọ kẹ ahwo-akpọ, kọ ọ sai gine ru ere? Fikieme whọ rọ ta ere, hayo kọ fikieme who gbe ro roro ere he?
7. Eware nọ e rrọ akpọ na i dhesẹ iruemu Jihova via
Jihova ọ rehọ eware nọ ọ ma ro dhesẹ oghẹrẹ ohwo nọ ọ rrọ via. Kporo IVIDIO na. Kẹsena wha ve se Ahwo Rom 1:20, jẹ ta ẹme kpahe onọ nọ ọ rrọ obotọ na.
-
Iruemu Jihova vẹ whọ be ruẹ evaọ eware nọ ọ ma?
AHWO JỌ A RẸ TA NỌ: “Ọghẹnẹ yọ ohwo ho, inọ yọ ogaga jọ gheghe nọ ọ rrọ oria kpobi.”
-
Ẹvẹ who roro?
-
Fikieme who ro roro ere?
EME WHO WUHRẸ NO?
Jihova yọ Ẹzi nọ ma rẹ sae ruẹ hẹ nọ o wo emamọ iruemu buobu, onọ o mae rro kọ uyoyou.
Ọkiẹkpemu
-
Fikieme ma gbẹ be ruẹ Jihova ha?
-
Eme họ ẹzi ọfuafo na?
-
Iruemu jọ vẹ Jihova o wo?
KIẸ KPAHE EFA
Wuhrẹ kpahe iruemu ene Jihova jọ nọ e mai wuzou re whọ gbẹ riẹ oghẹrẹ ohwo nọ Jihova ọ rrọ.
Wuhrẹ kpahe oware nọ u dhesẹ nọ Jihova ọ rrọ oria kpobi hi.
Rri oware nọ Ebaibol na o ro se ẹzi ọfuafo na abọ Ọghẹnẹ.
O jọ bẹbẹ kẹ ọzae jọ nọ o tuaro re ọ rọwo nọ Ọghẹnẹ ọ be daezọ riẹ. Ruẹ oware nọ o lẹliẹ e riẹ nwene iroro.
“Obọnana Mẹ Riẹ nọ Mẹ Sai Fiobọhọ Kẹ Amọfa” (Uwou-Eroro Na, Akpe 1, 2015)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
