UWUHRẸ AVỌ 09
Olẹ O rẹ Sai Si Owhẹ Kẹle Ọghẹnẹ
Kọ who roro nọ whọ gwọlọ ohwo jọ nọ ọ rẹ kpọ owhẹ evaọ uzuazọ? Kọ who wo obọdẹ enọ jọ nọ whọ gwọlọ riẹ iyo rai? Kọ whọ gwọlọ omosasọ hayo uduotahawọ? Kọ whọ gwọlọ si kẹle Jihova ziezi? Whaọ olẹ o rẹ sai ru eware nana kpobi kẹ owhẹ. Rekọ oghẹrẹ vẹ u fo nọ ohwo ọ rẹ rọ lẹ? Kọ elẹ kpobi Ọghẹnẹ ọ rẹ gaviezọ kẹ? Eme whọ rẹ sai ru re Ọghẹnẹ o yo elẹ ra? Uwuhrẹ nana o te kẹ iyo enọ nana.
1. Ono u fo nọ ma rẹ lẹ se, kọ eme ma rẹ sae lẹ kpahe?
Jesu o wuhrẹ omai nọ Jihova nọ ọ rrọ Ọsẹ obọ odhiwu mai na ọvo ma rẹ lẹ se. Jesu omariẹ ọ lẹ se Jihova re. Ọ ta nọ: “Fikiere, enẹ wha rẹ lẹ: ‘Ọsẹ mai nọ ọ rrọ obọ idhiwu na . . . ’” (Matiu 6:9) Nọ ma tẹ be hae lẹ se Jihova, u re ru usu mai kugbei ga ziezi.
Ma rẹ sae lẹ kpahe enwenọ oware kpobi. Rekọ re Ọghẹnẹ ọ sai yo elẹ mai, o gwọlọ nọ elẹ na e rẹ rọwokugbe oreva riẹ. Ebaibol na ọ ta nọ: “Oware kpobi nọ ma yare [Ọghẹnẹ] nọ o rọwokugbe oreva riẹ, ọ rẹ gaviezọ kẹ omai.” (1 Jọn 5:14) Jesu ọ kẹ omai oriruo eware nọ u fo nọ ma rẹ lẹ kpahe. (Se Matiu 6:9-13.) U te no eware nọ e roja kẹ omai nọ ma rẹ lẹ kpahe no, ma re yere Ọghẹnẹ rọkẹ eware nọ o ru kẹ omai no, ma vẹ jẹ yare iẹe re o fiobọhọ kẹ amọfa re.
2. Ẹvẹ u fo nọ ma rẹ lẹ?
Ebaibol na ọ tuduhọ omai awọ nọ ma “ta eva [mai] kpobi [kẹ Ọghẹnẹ].” (Olezi 62:8) Fikiere o gwọlọ nọ elẹ mai i re no omai eva ze. Ma rẹ sae lẹ do via hayo lẹ fihọ eva. Yọ o gba omai họ nọ ma re kigwẹ hayo dikihẹ taure ma tẹ te lẹ hẹ, oware nọ o gwọlọ họ ma re ru omamai evaọ oghẹrẹ nọ u dhesẹ nọ ma wo adhẹẹ kẹ Jihova. Ma rẹ sae lẹ evaọ oke kpobi gbe evaọ oria kpobi.
3. Oghẹrẹ vẹ Ọghẹnẹ ọ rẹ rọ kuyo elẹ mai?
U wo idhere buobu nọ Ọghẹnẹ ọ rẹ rọ kuyo elẹ mai. Jihova ọ kẹ omai Ẹme riẹ, Ebaibol na, yọ ma rẹ sae jariẹ ruẹ iyo enọ nọ ma wo. Ebaibol na nọ a re se o rẹ sai “ru ogbori wo areghẹ.” (Olezi 19:7; se Jemis 1:5.) Ọghẹnẹ ọ rẹ sai ru udu te omai otọ nọ ma te wo ebẹbẹ. Yọ ọ sai je dhobọte ahwo nọ ma gbẹ be gọe re a fiobọhọ kẹ omai re.
GBE WUHRẸ EWARE EFA
Wuhrẹ kpahe epanọ whọ sae rọ lẹ elẹ nọ i re no udu ze nọ e rẹ were Ọghẹnẹ, gbe epanọ olẹ o sae rọ kẹ owhẹ erere.
4. Eware nọ Ọghẹnẹ ọ gwọlọ nọ ma re ru nọ ma tẹ be lẹ
Eme ọ rẹ lẹliẹ Ọghẹnẹ jẹ elẹ mai rehọ hayo ru nọ ọ gbẹ jẹ elẹ mai rehọ họ? Kporo IVIDIO na.
Jihova ọ gwọlọ nọ ma hae lẹ sei. Se Olezi 65:2, kẹsena wha vẹ ta ẹme kpahe enọ nana:
-
Kọ who roro nọ “Ọnọ o re yo olẹ” na ọ ginẹ gwọlọ nọ whọ lẹ sei? Fikieme whọ rọ ta ere, hayo kọ fikieme who gbe ro roro ere he?
O gba omai họ nọ ma re koko izi Ọghẹnẹ otẹrọnọ ma gwọlọ nọ ọ gaviezọ kẹ elẹ mai. Se Maeka 3:4 gbe 1 Pita 3:12, kẹsena wha vẹ ta ẹme kpahe onọ nana:
-
Eme ma re ru re Jihova ọ ruẹse gaviezọ kẹ elẹ mai?
Nọ itu ahwo ivẹ a te bi fi ẹmo, abava na a rẹ sae lẹ re a fi ẹmo na kparobọ. Kọ ma sai gine rẹro nọ Ọghẹnẹ ọ te kuyo elẹ itieye na?
5. O gwọlọ nọ ma rẹ lẹ no udu ze
A wuhrẹ ahwo jọ oghẹrẹ elẹ jọ nọ a rẹ wariẹ eme rai ẹsikpobi nọ a tẹ be lẹ. Rekọ who roro nọ ere Ọghẹnẹ ọ gwọlọ nọ ma rẹ rọ lẹ sei? Se Matiu 6:7, kẹsena wha vẹ ta ẹme kpahe onọ nana:
-
Eme ọ rẹ sai fiobọhọ kẹ owhẹ nọ who gbe dhe “eme evona ẹwẹwariẹ” hẹ evaọ elẹ ra?
Evaọ kẹdẹ kẹdẹ, hai roro kpahe ugogo oghale jọ nọ who wo, who ve yere Jihova kẹ oghale na. Who te ru enẹ kẹdẹ kẹdẹ evaọ ẹkpoka, whọ te ruẹ nọ whọ lẹ kpahe eware ihrẹ sa-sa no yọ whọ wariẹ eme evona ha.
Emamọ ọsẹ ọ rẹ gwọlọ nọ ọmọ riẹ ọ ta eva riẹ kpobi kẹe. Epọvo na re, Jihova ọ gwọlọ nọ ma lẹ sei no udu ze
6. Olẹ yọ okẹ nọ u no obọ Ọghẹnẹ ze
Ẹvẹ olẹ o rẹ sai ro fiobọhọ kẹ omai nọ eware i te woma hayo nọ e tẹ maki yoma? Kporo IVIDIO na.
Ebaibol na ọ vuẹ omai nọ olẹ o rẹ sai fiobọhọ ru udu te omai otọ. Se Ahwo Filipai 4:6, 7, kẹsena wha vẹ ta ẹme kpahe enọ nana:
-
Dede nọ olẹ u re ru ebẹbẹ mai kuhọ ẹsikpobi hi, ẹvẹ u re ro fiobọhọ?
-
Eware jọ vẹ whọ gwọlọ nọ whọ rẹ lẹ kpahe?
Kọ whọ riẹ?
Otofa ẹme na “ami” họ “ere o rẹ jọ” hayo “ginọ ere.” Anwọ oke nọ a ro kere Ebaibol na ze ahwo a bi ro yo “ami” ro ku olẹ họ. —1 Iruẹru-Ivie 16:36.
7. Wo oke nọ whọ rẹ rọ lẹ
Ma gbẹ yọroma ha, eware e sae vọ omai obọ te epanọ olẹ o rẹ rọ thọrọ omai ẹro. Ẹvẹ olẹ u wuzou kẹ Jesu te? Se Matiu 14:23 gbe Mak 1:35, kẹsena wha vẹ ta ẹme kpahe enọ nana:
-
Eme Jesu o ru re o wo oke nọ ọ rẹ rọ lẹ?
-
Oke vẹ whọ sae rọ lẹ?
AHWO JỌ A RẸ TA NỌ: “Olẹ yọ oke oraha kufiẹ gheghe.”
-
Ẹvẹ who roro?
EME WHO WUHRẸ NO?
Elẹ nọ ma lẹ no udu ze i re si omai kẹle Ọghẹnẹ, ru udu te omai otọ, je ru omai wo ẹgba nọ ma sai ro ru oware nọ o rẹ were Jihova.
Ọkiẹkpemu
-
Ono u fo nọ ma rẹ lẹ se?
-
Ẹvẹ u fo nọ ma rẹ lẹ?
-
Irere jọ vẹ who re wo nọ whọ tẹ be hae lẹ?
KIẸ KPAHE EFA
Se kpahe iyo enọ jọ nọ ahwo a rẹ nọ gaga kpahe olẹ.
“Eware Ihrẹ nọ U Fo nọ Whọ rẹ Riẹ Kpahe Olẹ” (Uwou-Eroro Na, Akpe 1, 2010)
Wuhrẹ kpahe oware nọ u ro wuzou re ma hae lẹ, gbe epanọ ma sae rọ lẹ elẹ nọ i re woma ziezi.
Se kpahe oware nọ Ebaibol na ọ ta kpahe ohwo nọ u fo nọ ma rẹ lẹ se.
Rri ividio ole nana re whọ ruẹ sọ u wo ugogo oke gbe oria nọ u fo nọ ma rẹ jọ lẹ.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
