UWUHRẸ AVỌ 12
Eme O ti Fiobọhọ Kẹ Owhẹ Gbe Wuhrẹ Ebaibol Na?
Re a wuhrẹ Ebaibol na o rẹ kẹ erere gaga. Rekọ o rẹ sae jọ bẹbẹ ẹsejọ. O sae tubẹ jọ owhẹ oma ẹsejọ nọ whọ siọ ewuhrẹ na ba. Fikieme u ro wuzou re whọ gbẹ daoma wuhrẹ Ebaibol na? Eme ọ rẹ sai fiobọhọ kẹ owhẹ ru ere ghelọ ebẹbẹ?
1. Fikieme u ro woma re a wuhrẹ Ebaibol na?
“Ẹme Ọghẹnẹ ọ rrọ uzuazọ, o te je wo ẹgba.” (Ahwo Hibru 4:12) Ebaibol na o woma gaga keme u dhesẹ iroro Ọghẹnẹ via gbe oghẹrẹ nọ ọ rehọ owhẹ. U re fiobọhọ kẹ owhẹ wo eriariẹ, uvi areghẹ gbe ẹruore. Rekọ maero na, Ebaibol na o re fiobọhọ kẹ owhẹ jọ ogbẹnyusu Jihova. Who te bi wuhrẹ Ebaibol na, o rẹ sai ru uzuazọ ra woma nọ whọ tẹ kẹe uvẹ na.
2. Fikieme u ro wuzou re whọ riẹ epanọ Ebaibol na o woma te?
Uzẹme sa-sa nọ e rrọ Ebaibol na e wọhọ eware aghae. Oyejabọ nọ Ebaibol ọ rọ ta kẹ omai nọ “dẹ uzẹme, whọ zẹe vievie he.” (Itẹ 23:23) Nọ ma tẹ be kareghẹhọ epanọ uzẹme Ebaibol na o woma te, ma te daoma gbe wuhrẹ makọ evaọ okenọ oware jọ o tẹ be gwọlọ whaha omai.—Se Itẹ 2:4, 5.
3. Ẹvẹ Jihova ọ sai ro fiobọhọ kẹ owhẹ gbe wuhrẹ?
Jihova nọ ọ rrọ Ọmemama erumeru na, gbe ogbẹnyusu ra na, ọ gwọlọ fiobọhọ kẹ owhẹ wuhrẹ kpahe ọyomariẹ. Ọ rẹ sae kẹ owhẹ “isiuru na gbe ogaga nọ [who] re ro ru ere.” (Se Ahwo Filipai 2:13.) Fikiere nọ whọ tẹ gwọlọ obufihọ re ewuhrẹ na ọ ruọ owhẹ oma ziezi, hayo re who fi eware nọ who bi wuhrẹ na họ iruo, ọ rẹ sai fiobọhọ kẹ owhẹ. Ọ sae jẹ kẹ owhẹ ẹgba nọ whọ rẹ rọ dadamu kẹ ọwọsuọ. Thakpe lẹ sei ẹsikpobi re o fiobọhọ kẹ owhẹ gbe wuhrẹ.—1 Ahwo Tẹsalonika 5:17.
GBE WUHRẸ EWARE EFA
Wuhrẹ epanọ whọ sai gbe ro wuhrẹ Ebaibol na o tẹ make rọnọ who re wo uvẹ tere he hayo amọfa a be wọso owhẹ. Whọ te ruẹ epanọ Jihova o ti ro fiobọhọ kẹ owhẹ.
4. Se uwuhrẹ Ebaibol ra gboja
Ẹsejọ eware e rẹ sae vọ omai abọ te epanọ o rẹ rọ wọhọ nọ ma wo oke nọ ma re ro wuhrẹ Ebaibol na ha. Eme ọ rẹ sai fiobọhọ? Se Ahwo Filipai 1:10, kẹsena wha vẹ ta ẹme kpahe enọ nana:
-
Eware jọ vẹ who roro nọ eye họ “eware nọ e mae roja” evaọ uzuazọ?
-
Eme whọ rẹ sai ru re who se uwuhrẹ Ebaibol ra gboja?
-
Whọ tẹ whẹ ẹkpẹ fihọ ubokiti, whọ jẹ be daoma fi itho họ eva riẹ, itho na e rẹ gbae he
-
Rekọ whọ tẹ kaki fi itho na họ iẹe, who je ku ẹkpẹ na fihọ iẹe, ẹkpẹ na buobu ọ rẹ ruẹe eva. Epọvo na re, whọ tẹ rọ “eware nọ e mae roja” karo evaọ uzuazọ ra, whọ te sai ru ai je tube ru eware efa jọ kugbe dede
Ebaibol na nọ ma re wuhrẹ, u re ru omai riẹ Ọghẹnẹ jẹ gọe ziezi. Se Matiu 5:3, kẹsena wha vẹ ta ẹme kpahe onọ nana:
-
Irere vẹ ma re wo nọ ma te se Ebaibol nọ ma re wuhrẹ gboja?
5. Ruabọhọ uwuhrẹ na ghelọ ọwọsuọ
Amọfa a sae gwọlọ ta udu ra raha re whọ siọ Ebaibol na ba ewuhrẹ. Muẹrohọ oghẹrẹ nọ o rọ via kẹ Francesco. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Evaọ ividio na, eme oni Francesco avọ egbẹnyusu riẹ a ru nọ ọ vuẹ ae eware nọ o bi wuhrẹ?
-
Didi oghale u no rie ze fikinọ ọ seba ha?
Se 2 Timoti 2:24, 25, kẹsena wha vẹ ta ẹme kpahe enọ nana:
-
Ẹvẹ ahwo uviuwou gbe egbẹnyusu ra a rri eware nọ who bi wuhrẹ na?
-
Wọhọ epanọ oria Ebaibol nana o ta na, oghẹrẹ vẹ whọ rẹ rọ kpahe ẹme kẹ ohwo nọ eva e be were he fikinọ who bi wuhrẹ Ebaibol na? Kọ fikieme?
6. Rẹroso Jihova re o fiobọhọ kẹ owhẹ
Epanọ ma si kẹle Jihova te, ere o rẹ were omai te re ma ru ei eva were. O make rrọ ere na, o sae jọnọ o be bẹ omai re ma siobọno oghẹrẹ iruemu jọ nọ e rẹ were Ọghẹnẹ hẹ. O tẹ rrọ ere kẹ owhẹ, o bẹ owhẹ no ho. Jihova o ti fiobọhọ kẹ owhẹ. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Evaọ ividio na, eme Jim ọ jọ uzuazọ riẹ nwene re ọ sai ru eva were Jihova?
-
Eme ọ were owhẹ evaọ iku Jim na?
Se Ahwo Hibru 11:6, kẹsena wha vẹ ta ẹme kpahe enọ nana:
-
Eme Jihova o ti ru kẹ ahwo nọ a be “rọ ọwhọ gwọlọ iẹe,” koyehọ ahwo nọ a be daoma riẹe je ru eva were iẹe?
-
Eme onana u wuhrẹ owhẹ kpahe oghẹrẹ nọ Jihova o bi rri owhẹ nọ whọ be daoma re who wuhrẹ Ebaibol na?
OHWO JỌ Ọ TẸ NỌ OWHẸ NỌ: Fikieme who bi ro wuhrẹ Ebaibol na?”
-
Didi uyo whọ te kẹe?
EME WHO WUHRẸ NO?
O make rọnọ ẹsikpobi o rẹ lọhọ họ, Ebaibol na nọ who re wuhrẹ o sai ru owhẹ reawere uzuazọ bẹdẹ bẹdẹ. Rẹroso Jihova ẹsikpobi, ọ te ghale owhẹ.
Ọkiẹkpemu
-
Fikieme iwuhrẹ Ebaibol na e rọ rrọ ghaghae kẹ owhẹ?
-
Ẹvẹ whọ sai ro “vuhu eware nọ e mae roja”?
-
Fikieme whọ rẹ rọ lẹ se Jihova re o fiobọhọ kẹ owhẹ ruabọhọ uwuhrẹ Ebaibol ra?
KIẸ KPAHE EFA
Se kpahe eware ene jọ nọ i fiobọhọ kẹ ahwo buobu rehọ oke rai ruiruo avọ areghẹ no.
“Epanọ Whọ Sae rọ Rehọ Oke Ra Ruiruo avọ Areghẹ” (Awake!, Ava 2014)
Rri oghẹrẹ nọ Jihova o ro fiobọhọ kẹ aye jọ nọ ọzae riẹ ọ jẹ wọso evaọ okenọ o je wuhrẹ Ebaibol na.
Rri epanọ ithihakọ aye ọzae nana u ro fiobọhọ kẹe kurẹriẹ.
Ẹsejọ ahwo a rẹ ta nọ Isẹri Jihova a re fi ohẹriẹ họ iviuwou. Kọ uzẹme o rrọ?
“Kọ Isẹri Jihova A rẹ Wha Ohẹriẹ Fihọ Iviuwou Manikọ A rẹ Bọ Ae Ga?” (Uzoẹme nọ o rrọ itanẹte)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
