Wọhọ epanọ ma wuhrẹ evaọ uwuhrẹ nọ o vrẹ na, orọnikọ egagọ kpobi e rẹ were Ọghẹnẹ hẹ. O make rrọ ere na, ma sae gọ Ọnọ ọ ma omai na evaọ edhere nọ o rẹ were iẹe. Kọ “oghẹrẹ egagọ” vẹ e rẹ were iẹe? (Jemis 1:27) Joma rri oware nọ Ebaibol na ọ ta.

1. Eme ma re lele rọ gọ Ọghẹnẹ?

Ebaibol na ma re lele rọ gọ Ọghẹnẹ. Jesu ọ ta evaọ okenọ ọ jẹ lẹ se Ọghẹnẹ nọ: “Ẹme ra uzẹme.” (Jọn 17:17) Egagọ jọ a be daezọ uzẹme nọ ọ rrọ Ẹme Ọghẹnẹ, Ebaibol na ha. A rehọ iwuhrẹ gbe iruemu ahwo-akpọ ro nwene uzẹme Ebaibol na no. Yọ ahwo nọ a bi “gbabọkẹ ujaje Ọghẹnẹ,” a rẹ were Jihova vievie he. (Se Mak 7:9.) Rekọ ma te bi lele oware nọ Ebaibol na ọ ta, o rẹ were Jihova gaga.

2. Ẹvẹ u fo nọ ma rẹ rọ gọ Jihova?

Nọ orọnọ Jihova ọ ma omai na, ọye ọvo ma rẹ gọ. (Eviavia 4:11) Onana u dhesẹ nọ ma re you rie, yọ ma rẹ rọ emema hayo iwoho evuevo rọ gọe he.​—Se Aizaya 42:8.

Ma rẹ gọ Jihova evaọ edhere nọ ọ rrọ “ọrẹri,” nọ “ọ rẹ jẹrehọ.” (Ahwo Rom 12:1) Koyehọ u fo nọ ma re koko izi riẹ. Wọhọ oriruo, izi nọ Jihova o fihọ kpahe orọo e rẹ were ahwo nọ a you rie, yọ a re koko ai. A re se utaba ha, a re vovo isigareti hayo ige he, a re mu lọ imu egaga ha, yọ a rẹ da idi vrẹ oma ha. a

3. Fikieme ma re ro kuomagbe ibe eg’Ọghẹnẹ mai gọ Jihova?

Iwuhrẹ nọ ma re ru koka koka na i re ru omai wo uvẹ “jiri Jihova . . . evaọ ukoko na.” (Olezi 111:1, 2) Edhere jọ nọ ma re ro ru ere họ ile nọ ma rẹ so ro jiri Ọghẹnẹ. (Se Olezi 104:33.) Jihova ọ ta kẹ omai nọ ma hai kpohọ iwuhrẹ keme o you omai, yọ ọ riẹ nọ u ti fiobọhọ kẹ omai re ma sae reawere uzuazọ bẹdẹ bẹdẹ. Ma rẹ jọ iwuhrẹ mai tuduhọ ohwohwo awọ.

 GBE WUHRẸ EWARE EFA

4. U fo ho re ma rọ emema rọ gọ Ọghẹnẹ

5. Ma tẹ be gọ Jihova ọvo, u re si omai no igbo iwuhrẹ erue

 6. Ma rẹ jọ iwuhrẹ ukoko mai gọ Ọghẹnẹ

Ma rẹ rọ ile nọ ma rẹ so gbe iyo nọ ma rẹ kẹ evaọ obọ ewuhrẹ ro jiri Jihova jẹ bọ ohwohwo ga. Se Olezi 22:22, kẹsena wha vẹ ta ẹme kpahe enọ nana:

• Kọ iyo nọ ahwo a be hae kẹ evaọ obọ ewuhrẹ na e be were owhẹ?

• Kọ whọ sae ruẹrẹ uyo jọ kpahe nọ whọ rẹ kẹ?

7. O rẹ were Jihova nọ ma tẹ be ta oware nọ ma wuhrẹ kẹ amọfa

Idhere buobu e riẹ nọ ma sae rọ ta oware nọ o rrọ Ebaibol na kẹ amọfa. Se Olezi 9:1 gbe 34:1, kẹsena wha vẹ ta ẹme kpahe onọ nana:

• Oware jọ vẹ whọ jọ Ebaibol na wuhrẹ no nọ whọ gwọlọ nọ whọ rẹ vuẹ amọfa?

 EME WHO WUHRẸ NO?

Ma re ru eva were Ọnọ ọ ma omai na nọ ma tẹ be gọ ọye ọvo, jiri ei evaọ iwuhrẹ ukoko mai, jẹ vuẹ amọfa eware nọ ma wuhrẹ no.

Ọkiẹkpemu

• Eme ma re lele rọ gọ Ọghẹnẹ re egagọ mai e sae were iẹe?

• Fikieme u ro fo nọ ma gọ Jihova ọvo?

• Fikieme ma re ro kuomagbe amọfa nọ a be daoma ru eva were Ọghẹnẹ gọe?