UWUHRẸ AVỌ 16
Eme Jesu O Ru Evaọ Okenọ Ọ Jọ Otọakpọ?
Ahwo buobu a re rri Jesu fihọ ọmọ unuevie gheghe, ọruẹaro nọ o wo areghẹ, hayo ọzae nọ o bi sẹwẹ họ. Kọ u wo eware efa nọ ma sai wuhrẹ kpahe Jesu nọ ma tẹ kiẹ oghẹrẹ uzuazọ nọ o yeri evaọ otọakpọ riwi? Evaọ uwuhrẹ nana, ma te ta kpahe obọdẹ eware jọ nọ Jesu o ru gbe epanọ e sae rọ kẹ owhẹ erere.
1. Iruo vẹ e mai wuzou kẹ Jesu?
Iruo nọ e mai wuzou kẹ Jesu họ re o “whowho usi uwoma Uvie Ọghẹnẹ.” (Se Luk 4:43.) O je whowho usi uwoma inọ Ọghẹnẹ ọ te rọ uvie hayo egọmeti jọ ro mu, onọ u ti ku ebẹbẹ ahwo-akpọ kpobi họ. a Ikpe esa gbe ubro soso Jesu o ro whowho usi uwoma nana.—Matiu 9:35.
2. Fikieme Jesu o je ro ru iruo igbunu?
Ebaibol na o gbiku “iruo ilogbo, eware igbunu, gbe eware eka [buobu] nọ Ọghẹnẹ ọ rehọ [Jesu] ru.” (Iruẹru Ikọ 2:22) Ọghẹnẹ ọ kẹ Jesu ogaga nọ ọ rọ whọku ofou, kuọ idu ahwo, siwi enọ e jẹ mọ, jẹ tubẹ kpare ahwo no uwhu ze dede. (Matiu 8:23-27; 14:15-21; Mak 6:56; Luk 7:11-17) Iruo igbunu nọ Jesu o je ru na i dhesẹ nọ Ọghẹnẹ o vi rie ze. I te je dhesẹ nọ Jihova o wo ogaga nọ ọ sai ro ku ebẹbẹ mai kpobi họ.
3. Eme ma rẹ sai wuhrẹ no uzuazọ Jesu ze?
Jesu o yoẹme kẹ Jihova evaọ oke kpobi. (Se Jọn 8:29.) Ghelọ ọwọsuọ, Jesu o ru oware kpobi nọ Ọsẹ riẹ ọ ta kẹe rri bọo oke uwhu riẹ. O dhesẹ via nọ ahwo-akpọ a rẹ sae gọ Ọghẹnẹ makọ okenọ eware e tẹ ga. Fikiere Jesu ọ “nyasiọ oriruo ba kẹ [omai] re [ma] lele ithihi riẹ kpekpekpe.”—1 Pita 2:21.
GBE WUHRẸ EWARE EFA
Wuhrẹ kpahe epanọ Jesu ọ rọ ta usi uwoma na je ru iruo igbunu.
4. Jesu ọ ta usi uwoma
Jesu ọ rọ owotọ nya idhere nọ ovu ọ rrọ jẹ ta usi uwoma kẹ ahwo buobu. Se Luk 8:1, kẹsena wha vẹ ta ẹme kpahe enọ nana:
-
Kọ ahwo nọ a kokohọ re a gaviezọ ọvo Jesu ọ ta usi uwoma kẹ?
-
Eme Jesu o je ru re ọ ruẹ ahwo ta usi uwoma kẹ?
Ọghẹnẹ ọ ta fihotọ nọ Mesaya na o ti whowho usi uwoma. Se Aizaya 61:1, 2, kẹsena wha vẹ ta ẹme kpahe enọ nana:
-
Ẹvẹ Jesu o ro ru eruẹaruẹ nana gba?
-
Kọ who roro nọ u wuzou re ahwo a yo usi uwoma nana nẹnẹ?
5. Jesu o wuhrẹ ahwo eware nọ i wuzou gaga
U te no usi uwoma kpahe Uvie Ọghẹnẹ nọ Jesu ọ jẹ ta no, o wuhrẹ eware sa-sa nọ i re fiobọhọ kẹ ahwo. Se kpahe ejọ evaọ obọdẹ Ovuẹ nọ ọ kẹ evaọ Ugbehru. Se Matiu 6:14, 34 gbe 7:12, kẹsena wha vẹ ta ẹme kpahe enọ nana:
-
Obọdẹ ohrẹ vẹ Jesu ọ kẹ evaọ eria Ebaibol nana?
-
Kọ who roro nọ ohrẹ nana ọ sai gbe fiobọhọ kẹ ahwo nẹnẹ?
6. Jesu o ru iruo igbunu
Jihova ọ kẹ Jesu ogaga nọ o ro ru iruo igbunu buobu. Re whọ ruẹ oriruo jọ, se Mak 5:25-34 hayo kporo IVIDIO na. Kẹsena wha vẹ ta ẹme kpahe enọ nọ e rrọ obotọ na.
-
Evaọ ividio na, eme u mu aye na ẹro?
-
Eme ọ jọ iruo igbunu nana were owhẹ?
Se Jọn 5:36, kẹsena wha vẹ ta ẹme kpahe onọ nana:
-
Eme iruo igbunu Jesu i “se isẹri” kpahe hayo dhesẹ kpahe iẹe?
Kọ whọ riẹ?
Eware buobu nọ ma riẹ kpahe Jesu na e rrọ evaọ ebe Ebaibol ene nọ a re se Usi Uwoma na, eye họ Matiu, Mak, Luk, gbe Jọn. Ahwo nana ọvuọvo a kere eware sa-sa kpahe Jesu. Yọ eware kpobi nọ a kere na i dhesẹ obọdẹ uzuazọ nọ Jesu o yeri.
-
MATIU
ọ kaki kere evaọ usu ebe ene na. O kere kpahe iwuhrẹ Jesu gaga, maero eware nọ o wuhrẹ kpahe Uvie Ọghẹnẹ.
-
MAK
o kere obe nọ ọ mae kpẹre evaọ usu ebe ene na. O kere iku ewewere sa-sa.
-
LUK
o kere kpahe olẹ ziezi gbe edhere owowou nọ Jesu o ro yeri kugbe eyae.
-
JỌN
o kere eware buobu kpahe eme nọ Jesu ọ ta kugbe egbẹnyusu ekpekpe riẹ gbe amọfa, yọ onana u ru omai riẹ emamọ iruemu riẹ sa-sa.
AHWO JỌ A RẸ TA NỌ: “Emamọ ohwo Jesu ọ jọ, rekọ ọye họ Mesaya na ha.”
-
Ẹvẹ who roro?
EME WHO WUHRẸ NO?
Jesu ọ ta usi uwoma kpahe Uvie Ọghẹnẹ, o ru iruo igbunu, o te je yoẹme kẹ Jihova evaọ oware kpobi.
Ọkiẹkpemu
-
Iruo vẹ e mai wuzou kẹ Jesu okenọ ọ jọ otọakpọ?
-
Eme iruo igbunu Jesu i dhesẹ via?
-
Eware vẹ Jesu o wuhrẹ nọ i re fiobọhọ kẹ ahwo?
KIẸ KPAHE EFA
Uzoẹme vẹ Jesu ọ mae ta kpahe?
“Oware nọ Uvie Ọghẹnẹ O rọ jọ Jesu Oja” (Uwou-Eroro Na, Akpegbọvo 1, 2014)
Se kpahe oware nọ ma sae rọ rọwo nọ iruo igbunu Jesu na e ginẹ via.
“Iruo Igbunu Jesu—Eme Whọ rẹ Sai Wuhrẹ No Ai Ze?” (Uwou-Eroro Na, Ahrẹ 15, 2004)
Se kpahe epanọ oriruo uyoyou Jesu u ro nwene uzuazọ ọzae jọ.
“Me Je Yeri Uzuazọ Oriobọ” (Uwou-Eroro Na, Akpegbọvo 1, 2014)
Rri eware nọ e viodẹ evaọ iruo odibọgba Jesu nọ a kere othotha.
a Ma te jọ uwuhrẹ avọ 31-33 ta ẹme kpahe Uvie Ọghẹnẹ ziezi.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
