UWUHRẸ AVỌ 28
Dhesẹ nọ Oware nọ Jihova avọ Jesu A Ru Kẹ Owhẹ O Da Owhẹ Ẹro
Kọ eva e be hae were owhẹ nọ ogbẹnyusu ra ọ tẹ kẹ owhẹ emamọ okẹ? Ma riẹ nọ eva e rẹ were owhẹ gaga yọ whọ rẹ daoma yere iei rọkẹ okẹ na. Jihova avọ Jesu họ ahwo nọ a kẹ omai okẹ nọ o mai woma kpaobọ. Didi okẹ a kẹ omai, kọ ẹvẹ ma sai ro dhesẹ nọ o da omai ẹro?
1. Edhere jọ vẹ ma re ro dhesẹ nọ oware nọ Ọghẹnẹ avọ Kristi a ru kẹ omai o da omai ẹro?
Ebaibol na ọ ta nọ “ohwo kpobi nọ o fi ẹrọwọ họ [Jesu]” ọ rẹ sae rria bẹdẹ bẹdẹ. (Jọn 3:16) Eme u dhesẹ re a fi ẹrọwọ họ Jesu? Orọnikọ ma rẹ rọwo Jesu ọvo ho. Ma rẹ jẹ rọ iroro nọ ma be jẹ gbe eware nọ ma bi ru ro dhesẹ nọ ma wo ẹrọwọ. (Jemis 2:17) Nọ ma tẹ be rọ eware nọ ma bi ru gbe eme nọ ma be ta ro dhesẹ ẹrọwọ mai via, u re ru usu mai kugbe Jesu avọ Jihova, Ọsẹ riẹ jọ gaga.—Se Jọn 14:21.
2. Emamọ oke vẹ ma sai ro dhesẹ nọ oware nọ Jihova avọ Jesu a ru kẹ omai o da omai ẹro?
Evaọ owọwọ urere taure Jesu o te ti whu, ọ vuẹ ilele riẹ kpahe edhere ọfa nọ a re ro dhesẹ nọ uwhu riẹ o da rai ẹro. Ọ ta kẹ ae nọ a kuomagbe rọkẹ obọdẹ oware jọ nọ Ebaibol na o se “Emu Owọwọ Olori na,” onọ a re je se Ekareghẹhọ uwhu Kristi. (1 Ahwo Kọrint 11:20) Jesu o mu Emu Owọwọ Olori na họ re ikọ riẹ gbe Ileleikristi uzẹme kpobi a hai ru ei rọ kareghẹhọ uwhu riẹ. Jesu ọ ta kpahe Emu Owọwọ na nọ: “Wha hai ru onana rọ kareghẹhọ omẹ.” (Luk 22:19) Nọ who te kpohọ Ekareghẹhọ na, yọ who bi dhesẹ nọ uyoyou ulogbo nọ Jihova avọ Jesu a wo kẹ omai o da owhẹ ẹro.
GBE WUHRẸ EWARE EFA
Wuhrẹ kpahe idhere efa nọ who re ro dhesẹ nọ uyoyou ulogbo nọ Jihova avọ Jesu a dhesẹ kẹ omai o da owhẹ ẹro. Je wuhrẹ kpahe oware nọ Ekareghẹhọ uwhu Jesu Kristi u ro wuzou gaga.
3. Epanọ ma re ro dhesẹ nọ uyoyou Jihova avọ Jesu o da omai ero
Dae rehọ iẹe nọ whọ jẹ yọghọ evaọ ame, ohwo jọ ọ tẹ dhẹ ze ti siwi owhẹ. Kọ oware nọ ohwo na o ru kẹ owhẹ na o rẹ thọrọ owhẹ ẹro? Kọ whọ gbẹ te gwọlọ oghẹrẹ nọ who re ro dhesẹ kẹe nọ oware na o da owhẹ ẹro?
Ma rrọ uzuazọ fiki Jihova. Se 1 Jọn 4:8-10, kẹsena wha vẹ ta ẹme kpahe enọ nana:
-
Fikieme idhe nọ Jesu o dhe na o rọ rrọ obọdẹ okẹ?
-
Kọ oware nọ Jihova avọ Jesu a ru kẹ owhẹ na o were owhẹ? Fikieme?
Ẹvẹ ma sai ro dhesẹ nọ oware nọ Jihova avọ Jesu a ru kẹ omai na o da omai ẹro? Se 2 Ahwo Kọrint 5:15 gbe 1 Jọn 4:11; 5:3. Nọ wha te se oria ikere ọvuọvo no, wha vẹ ta ẹme kpahe onọ nana:
-
Wọhọ epanọ oria Ebaibol nana o ta na, eme ma rẹ sai ru ro dhesẹ nọ uyoyou Jihova avọ Jesu o da omai ẹro?
4. Rọ aro kele Jesu
Edhere ọfa nọ ma re ro dhesẹ edẹro mai họ nọ ma tẹ be rọ aro kele Jesu. Se 1 Pita 2:21, kẹsena wha vẹ ta ẹme kpahe onọ nana:
-
Idhere vẹ whọ sai ro lele ithihi Jesu kpekpekpe?
Ẹme Ọghẹnẹ ọ were Jesu gaga, ọ ta usi uwoma, o te je fiobọhọ kẹ amọfa
5. Kpohọ Ekareghẹhọ uwhu Kristi
Re whọ riẹ oghẹrẹ nọ Emu Owọwọ Olori ọsosuọ nọ a ru o jọ, se Luk 22:14, 19, 20. Kẹsena wha vẹ ta ẹme kpahe enọ nana:
-
Oghẹrẹ vẹ a ru Emu Owọwọ Olori na?
-
Eme ebrẹdi avọ udi na i dikihẹ kẹ?—Rri owọ avọ 19 gbe 20.
Jesu ọ gwọlọ nọ ilele riẹ a hai ru Emu Owọwọ Olori na ẹsiẹvo ẹgbukpe evaọ ẹdẹ nọ o ro whu na. Fikiere, Isẹri Jihova a re kuomagbe kukpe kukpe re a kareghẹhọ uwhu Kristi wọhọ epanọ ọ ta. Re who gbe wuhrẹ kpahe omakugbe nana nọ o wuzou gaga na, Kporo IVIDIO na. Kẹsena wha vẹ ta ẹme kpahe onọ nọ ọ rrọ obotọ na.
-
Eme a re ru evaọ Ekareghẹhọ na?
Ebrẹdi na o dikihẹ kẹ uzuazọ ogbagba Jesu evaọ okenọ ọ jọ otọakpọ nọ o ro dhe idhe kẹ omai. Yọ udi na u dikihẹ kẹ azẹ riẹ
AHWO JỌ A RẸ TA NỌ: “Whọ tẹ rọwo Jesu yọ who wo esiwo no.”
-
Ẹvẹ whọ sae rọ rehọ Jọn 3:16 gbe Jemis 2:17 ro dhesẹ nọ re a wo esiwo u vi Jesu nọ ma rẹ rọwo ọvo?
EME WHO WUHRẸ NO?
Ma re dhesẹ nọ oware nọ Jesu o ru kẹ omai o da omai ẹro nọ ma te fi ẹrọwọ họ iẹe, yọ ma rẹ hai kpohọ Ekareghẹhọ uwhu riẹ.
Ọkiẹkpemu
-
Eme u dhesẹ re a fi ẹrọwọ họ Jesu?
-
Oghẹrẹ vẹ whọ gwọlọ ro dhesẹ nọ oware nọ Jihova avọ Jesu a ru kẹ owhẹ o da owhẹ ẹro?
-
Fikieme u ro wuzou gaga re who kpohọ Ekareghẹhọ uwhu Kristi?
KIẸ KPAHE EFA
Eme uwhu Kristi o rẹ wọ omai ru?
Gbe wuhrẹ eware efa kpahe ẹrọwọ gbe epanọ ma re ro dhesẹ iẹe via.
“Dhesẹ nọ Who Fi Ẹrọwọ họ Eyaa Jihova” (Uwou-Eroro Na, Akpe 2016)
Se iku nọ uzoẹme riẹ o ta nọ “Obọnana Me bi Yeri Emamọ Uzuazọ, Udu U Gbe bi Brukpe Omẹ Hẹ,” re whọ ruẹ epanọ uzuazọ aye jọ u ro nwene nọ o wuhrẹ kpahe idheidhe Kristi.
“Ebaibol O re Nwene Uzuazọ Ohwo” (Uwou-Eroro Na, Aria 1, 2011)
Se kpahe oware nọ umutho ahwo ọvo a be hae rọ re Emu Owọwọ na.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
