UWUHRẸ AVỌ 35
Epanọ Ma Sae rọ Jẹ Emamọ Iroro
Mai kpobi ma rẹ jiroro. Iroro buobu nọ ma rẹ jẹ na e sai kpomahọ omai gbe usu mai kugbe Jihova wowoma hayo yoyoma. Wọhọ oriruo, ma rẹ jiroro oria nọ ma rẹ rria, okọ hayo iruo nọ ma re ru re ma kuọ omamai, gbe sọ ma rẹ rọo hayo ma rẹ rọo ho. Ma tẹ jẹ emamọ iroro, ma sai wo evawere je ru eva were Jihova.
1. Ẹvẹ Ebaibol na ọ sai ro fiobọhọ kẹ owhẹ jẹ emamọ iroro?
Taure whọ tẹ te jiroro, lẹ se Jihova re o fiobọhọ kẹ owhẹ, whọ vẹ jẹ romatotọ se Ebaibol na re whọ riẹ oware nọ Jihova ọ ta kpahe ẹme na. (Se Itẹ 2:3-6.) U wo eware jọ nọ Jihova ọ jọ kẹ uzi oware nọ a re ru vevẹ. Whọ tẹ salọ nọ who re koko uzi yena, kiyọ emamọ iroro whọ jẹ na.
Kọ otẹrọnọ Ebaibol na ọ ta oware ọvo gbiae kpahe ẹme na ha? Jihova ọ rẹ kpọ owhẹ ghele fihọ “edhere nọ u fo nọ whọ rẹ nya.” (Aizaya 48:17) Evaọ oghẹrẹ vẹ? Ehrẹ buobu e rrọ Ebaibol na nọ e sae kpọ owhẹ. Ehrẹ nana i re dhesẹ oghẹrẹ nọ Ọghẹnẹ o rri eware sa-sa. Evaọ ẹsibuobu, nọ ma te se iku jọ nọ e rrọ Ebaibol na, ma rẹ riẹ oghẹrẹ nọ Ọghẹnẹ o rri oware jọ. Nọ ma tẹ riẹ oghẹrẹ nọ Jihova o rri oware jọ, ma sae jiroro nọ e rẹ were iẹe.
2. Eme u fo nọ who re roro kpahe taure whọ tẹ te jiroro jọ?
Ebaibol na ọ ta nọ: “Ọnọ o wo orimuo o re rri otọ mu re ọ tẹ te jowọ.” (Itẹ 14:15) Onana u dhesẹ nọ taure ma tẹ te jiroro, ma rẹ romatotọ roro ziezi. Whọ rẹ hae nọ omara nọ: ‘Didi ohrẹ Ebaibol na ọ kẹ kpahe ẹme nana? Ovẹ o te lẹliẹ udu tẹ omẹ otọ? Ẹvẹ iroro nọ mẹ jẹ i ti kpomahọ amọfa? Maero na, kọ u ti ru eva were Jihova?’—Iziewariẹ 32:29.
Jihova o wo udu nọ ọ rẹ rọ ta oware nọ u woma gbe onọ u yoma kẹ omai. Ma tẹ riẹ izi gbe ehrẹ nọ ọ kẹ, ma jẹ gbaemu nọ ma re lele ai, ma re wo emamọ obruoziẹ-iroro. Obruoziẹ-iroro na yọ oware nọ o rẹ jọ obeva mai vuẹ omai sọ oware u woma hayo u yoma. (Ahwo Rom 2:14, 15) Ma te wuhrẹ obruoziẹ-iroro mai ziezi, u re fiobọhọ kẹ omai jẹ emamọ iroro.
GBE WUHRẸ EWARE EFA
Wuhrẹ ziezi kpahe epanọ ehrẹ Ebaibol gbe obruoziẹ-iroro na i re ro fiobọhọ gaga nọ ma tẹ be jiroro.
3. Jọ Ebaibol na ọ kpọ owhẹ
Ẹvẹ ehrẹ Ebaibol na e sae rọ kpọ omai nọ ma tẹ be jiroro? Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Obọdẹ okẹ vẹ Jihova ọ kẹ omai?
-
Fikieme Jihova ọ rọ kẹ omai uvẹ nọ ma sae rọ jiroro kẹ omamai?
-
Eme Jihova ọ kẹ omai nọ o rẹ sai fiobọhọ kẹ omai jẹ emamọ iroro?
Re whọ ruẹ oriruo ohrẹ jọ nọ Ebaibol na ọ kẹ, se Ahwo Ẹfisọs 5:15, 16. Kẹsena wha vẹ ta ẹme kpahe epanọ whọ sae rọ “rehọ oke [ra] ruiruo evaọ edhere nọ ọ mai woma” re . . .
-
who se Ebaibol na kẹse kẹse.
-
whọ jọ emamọ ọzae, aye, ọsẹ, oni, hayo ọmọ.
-
whọ hai kpohọ iwuhrẹ ukoko.
4. Wuhrẹ obruoziẹ-iroro ra re u fiobọhọ kẹ owhẹ jẹ emamọ iroro
Nọ Ebaibol na ọ tẹ kẹ uzi kpahe ugogo oware jọ, o rẹ mae jọ lọlọhọ re ohwo ọ riẹ onọ o re ru. Kọ otẹrọnọ uzi otiọye o riẹ hẹ? Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Evaọ ividio na, eme oniọvo-ọmọtẹ na o ru re o wuhrẹ obruoziẹ-iroro riẹ jẹ jiroro nọ e rẹ were Jihova?
Fikieme u gbe ro fo ho re ma ta kẹ amọfa nọ a jiroro nọ u fo nọ mai ọvo ma rẹ jẹ? Se Ahwo Hibru 5:14, kẹsena wha vẹ ta ẹme kpahe enọ nana:
-
O tẹ make wọhọ nọ o mae lọhọ re ma ta kẹ amọfa re a jiroro kẹ omai, eme u fo nọ ma re vuhumu kẹ omamai?
-
Eme ma wo nọ o sai fiobọhọ kẹ owhẹ wuhrẹ obruoziẹ-iroro ra, whọ vẹ jẹ emamọ iroro?
Wọhọ emapo, obruoziẹ-iroro mai o re fiobọhọ kẹ omai riẹ obonọ ma rẹ nya evaọ uzuazọ
5. Rọ adhẹẹ kẹ obruoziẹ-iroro amọfa
Ahwo a sai wo ọvuọ iroro riẹ evaọ oware jọ. Ẹvẹ ma sai ro dhesẹ nọ ma be rọ adhẹẹ kẹ obruoziẹ-iroro amọfa? Joma ta kpahe iriruo ivẹ jọ:
Oriruo 1: U wo oniọvo-ọmọtẹ jọ nọ isiaro gbe eware nọ a re ro wholo ovao e rẹ were gaga, rekọ ọ tẹ kwa kpohọ ukoko jọ nọ eware nana e rẹ jọ were inievo-emetẹ na buobu hu.
Se Ahwo Rom 15:1 gbe 1 Ahwo Kọrint 10:23, 24, kẹsena wha vẹ ta ẹme kpahe enọ nana:
-
Wọhọ epanọ eria Ebaibol nana e ta na, didi iroro oniọvo-ọmọtẹ na ọ sae jẹ? Kọ eme who ti ru otẹrọnọ whọ rrọ kugbe ohwo nọ obruoziẹ-iroro riẹ o kuvẹ nọ o ru oware jọ họ?
Oriruo avọ 2: U wo oniọvo-ọmọzae jọ nọ ọ riẹ nọ re ohwo ọ da umutho udi ogaga o thọ họ, rekọ ọ jiroro nọ ọ rẹ da vievie he. A te zizie iei kpohọ amarozaha jọ nọ inievo na a be jọ da idi egaga.
Se Ọtausiuwoma Na 7:16 gbe Ahwo Rom 14:1, 10, kẹsena wha vẹ ta ẹme kpahe enọ nana:
-
Wọhọ epanọ eria Ebaibol nana e ta na, didi iroro oniọvo-ọmọzae na ọ sae jẹ? Kọ eme who ti ru otẹrọnọ whọ ruẹ omọfa nọ o bi ru oware nọ obruoziẹ-iroro ra o rọwo kẹ owhẹ hẹ?
Eme o re fiobọhọ kẹ owhẹ jẹ emamọ iroro?
1. Lẹ se Jihova re o fiobọhọ kẹ owhẹ jiroro oware nọ who re ru.—Jemis 1:5.
2. Ru ekiakiẹ evaọ Ebaibol na gbe ebe ukoko na re whọ gwọlọ ehrẹ nọ e sai fiobọhọ kẹ owhẹ. Whọ sae jẹ nọ Ileleikristi nọ i kri no nọ e be gọ Ọghẹnẹ ziezi.
3. Roro kpahe oghẹrẹ nọ iroro nọ whọ jẹ i ti kpomahọ owhẹ omara gbe amọfa.
AHWO JỌ A RẸ TA NỌ: “Who wo udu nọ who re ro ru oware kpobi nọ u je owhẹ. Oware kpobi nọ who ru u te ohwo ọvo ho.”
-
Fikieme u ro fo re ma roro kpahe oghẹrẹ nọ Ọghẹnẹ gbe amọfa a rri oware nọ ma gwọlọ ru?
EME WHO WUHRẸ NO?
Ma rẹ jẹ emamọ iroro nọ ma tẹ riẹ oghẹrẹ nọ Jihova o rri oware jọ, gbe sọ oware nọ ma gwọlọ ru u ti fiobọhọ kẹ amọfa hayo o te wha uye se ae.
Ọkiẹkpemu
-
Ẹvẹ whọ sae rọ jiroro nọ e rẹ were Jihova?
-
Ẹvẹ whọ sai ro wuhrẹ obruoziẹ-iroro ra?
-
Eme whọ sai ru ro dhesẹ nọ whọ be rọ adhẹẹ kẹ obruoziẹ-iroro amọfa?
KIẸ KPAHE EFA
Ẹvẹ whọ sae rọ jiroro nọ i re ru owhẹ wo emamọ usu kugbe Ọghẹnẹ?
“Jẹ Iroro Nọ E Rẹ Wha Orro Se Ọghẹnẹ” (Uwou-Eroro Na, Ane 15, 2011)
Gbe wuhrẹ kpahe epanọ Jihova ọ rẹ rọ kẹ omai ohrẹ.
Rri eware jọ nọ i fiobọhọ kẹ ọzae jọ sae jiroro jọ nọ e jọ bẹbẹ.
Gbe wuhrẹ kpahe epanọ whọ sai ro ru Jihova eva were makọ evaọ oware nọ ọ jọ kẹ uzi ọvo ho.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
