UWUHRẸ AVỌ 38
Dhesẹ nọ Okẹ Uzuazọ O Da Owhẹ Ẹro
Emamọ eware buobu e riẹ nọ ma rẹ sai ru jẹ reawere rai evaọ uzuazọ. Yọ ma tẹ maki wo ebẹbẹ, eware jọ e riẹ nọ ma sae reawere rai ghele. Kọ ẹvẹ ma sai ro dhesẹ nọ okẹ uzuazọ o da omai ẹro? Kọ ẹjiroro vẹ o mai wuzou nọ ma re ro ru ere?
1. Fikieme ma re ro dhesẹ nọ uzuazọ mai o da omai ẹro?
U fo re ma dhesẹ nọ uzuazọ mai o da omai ẹro keme yọ okẹ nọ Jihova Ọsẹ oyoyou mai na ọ kẹ omai. Obọ riẹ “uzuazọ u no ze,” ọye họ ọnọ ọ ma uzuazọ. (Olezi 36:9) “Ọye ọ be kẹ ahwo kpobi uzuazọ gbe ẹwẹ gbe eware kpobi.” (Iruẹru Ikọ 17:25, 28) Jihova ọ be kẹ omai eware nọ o gwọlọ nọ ma re ro yeri uzuazọ. O te je ru epanọ ma sae rọ reawere uzuazọ na.—Se Iruẹru Ikọ 14:17.
2. Ẹvẹ ma sai ro dhesẹ kẹ Jihova nọ okẹ uzuazọ o da omai ẹro?
Nọ a nwani dieva ra họ no Jihova ọ be rọ rẹrote owhẹ. Okenọ Devidi ọ jẹ lẹ, ẹzi ọfuafo ọ wọ riẹ ta kẹ Jihova nọ: “Okenọ mẹ jọ edhede, ibiaro ra e ruẹ omẹ.” (Olezi 139:16) Uzuazọ ra o rrọ ghaghae gaga kẹ Jihova. (Se Matiu 10:29-31.) Otẹrọnọ ohwo jọ o te keke aro fihọ kpe omobọ riẹ hayo omọfa, o rẹ da Jihova gaga. a (Ọnyano 20:13) O rẹ da Jihova re otẹrọnọ ma re mu ru eware nọ e rẹ sae wha uwhu se omai hayo wha uwhu se amọfa. Nọ ma tẹ be rẹrote uzuazọ mai je bi ru eware nọ i dhesẹ nọ ma rri uzuazọ amọfa ghaghae re, kiyọ ma bi dhesẹ nọ obọdẹ okẹ nana o da omai ẹro.
GBE WUHRẸ EWARE EFA
Wuhrẹ kpahe idhere jọ nọ whọ sai ro dhesẹ nọ okẹ uzuazọ na o da owhẹ ẹro.
3. Rẹrote ugboma ra
Ileleikristi nọ e roma rai mudhe kẹ Jihova no a rẹ rehọ kabọ kabọ uzuazọ rai gọe. O wọhọ ẹsenọ a be rehọ ugboma rai dhe idhe kẹ Ọghẹnẹ. Se Ahwo Rom 12:1, 2, kẹsena wha vẹ ta ẹme kpahe enọ nana:
-
Eme u fo nọ o rẹ wọ owhẹ rẹrote ugboma ra?
-
Idhere jọ vẹ whọ sai ro ru ere?
4. Ru eware nọ i re fiobọhọ nọ ahwo a gbẹ nwoma hayo whu hu
Ebaibol na ọ ta kẹ omai nọ ma kẹnoma kẹ eware nọ e sae nwa omai oma. Kporo IVIDIO na re who wuhrẹ eware jọ nọ whọ sai ru re whọ siọ oma ba ẹnwa.
Se Itẹ 22:3, kẹsena wha vẹ ta ẹme kpahe epanọ whẹ gbe amọfa a gbẹ rọ nwoma ha . . .
-
evaọ uwou ra.
-
evaọ obọ iruo.
-
okenọ who te bi ru oma jaja.
-
okenọ whọ be dhẹ omoto hayo a be dhẹ owhẹ.
5. Rri uzuazọ ọmọ nọ ọ rrọ eva ghaghae
Devidi ọ ta kpahe Jihova nọ, ọ riẹ oware kpobi nọ o be via kẹ ọmọ nọ ọ rrọ eva oni riẹ. Se Olezi 139:13-17, kẹsena wha vẹ ta ẹme kpahe onọ nana:
-
Rọkẹ Jihova, oke vẹ uzuazọ ohwo u re ro muhọ, okenọ a ro dieva riẹ họ manikọ okenọ a ro yẹi?
Izi nọ Jihova ọ kẹ Izrẹl oke anwae e jẹ thọ iniemọ avọ emọ nọ a dieva rai họ. Se Ọnyano 21:22, 23, kẹsena wha vẹ ta ẹme kpahe enọ nana:
-
Ẹvẹ Jihova o rri ohwo nọ ọ rọ ethobọ kpe ọmọ nọ a dieva riẹ họ?
-
Kọ ẹvẹ o re rri rie nọ ohwo o te keke aro fihọ ru ere? b
-
Kọ ẹvẹ who rri oware nọ Ọghẹnẹ ọ ta na?
Makọ aye nọ o rri uzuazọ ghaghae dede ọ sai roro nọ eva nọ ọ rẹ kpare họ oware nọ ọ rẹ sai ru kpobi. Se Aizaya 41:10, kẹsena wha vẹ ta ẹme kpahe enọ nana:
-
Otẹrọnọ a be gwọlọ gba aye jọ họ re ọ kpare eva, ono u fo nọ o re bo bru re o fiobọhọ kẹe? Kọ fikieme?
AHWO JỌ A RẸ TA NỌ: “Aye o wo udu nọ ọ sae rọ kpare eva, keme ọmọ na ọmọ riẹ.”
-
Eme ọ kẹ owhẹ imuẹro inọ Jihova o rri uzuazọ oniọmọ avọ ọmọ nọ ọ rrọ eva riẹ ghaghae?
EME WHO WUHRẸ NO?
Ebaibol na o wuhrẹ omai nọ okẹ uzuazọ nọ Jihova ọ kẹ omai na o were omai, ma rri rie ghaghae jẹ rẹrotei. Te uzuazọ mai te orọ amọfa ma re ru ere.
Ọkiẹkpemu
-
Fikieme Jihova o ro rri uzuazọ ohwo-akpọ ghaghae?
-
Kọ o rẹ were Jihova nọ ohwo o te keke aro fihọ kpe ohwo?
-
Fikieme okẹ uzuazọ o rọ were owhẹ?
KIẸ KPAHE EFA
Ẹvẹ ma sai ro yere Jihova kẹ okẹ uzuazọ nọ ọ kẹ omai na?
Gwọlọ uyo onọ nana, Kọ Ọghẹnẹ ọ rẹ rọvrẹ aye nọ ọ kpare eva no?
“Eme Ebaibol na Ọ Ta Kpahe Eva-Ekparọ?” (Uzoẹme nọ o rrọ itanẹte)
Wuhrẹ epanọ whọ sae rọ salọ oghẹrẹ arozaha nọ u kiehọ fiki oghẹrẹ nọ Ọghẹnẹ o rri uzuazọ.
“‘Arozaha nọ Ọ Vrẹta’—Kọ U Gine Fo re Who Fi Uzuazọ Ra họ Ọza?” (Awake!, Akpe 8, 2000)
Kọ otẹrọnọ ohwo jọ o wo iroro nọ o re kpe omobọ riẹ no? Se epanọ Ebaibol na ọ sai ro fiobọhọ kẹe.
a Jihova ọ be daezọ ahwo nọ a rrọ ọkora. (Olezi 34:18) Ọ riẹ eware nọ e rẹ sae lẹliẹ ohwo roro nọ o re kpe omobọ riẹ no, yọ ọ gwọlọ fiobọhọ. Re whọ ruẹ epanọ ọ sai ro fiobọhọ kẹ ohwo re o gbe wo iroro itieye he, se uzoẹme nana “Mẹ Gwọlọ Whu No—Kọ Ebaibol na Ọ Sai Fiobọhọ kẹ Omẹ nọ Me te Wo Iroro Ethuru Whu?” nọ o rrọ oria Kiẹ Kpahe Efa evaọ uwuhrẹ nana.
b U du gwọlọ nọ ahwo nọ a kpare eva no ẹdẹ jọ a kpe omarai no fiki iroro obrukpe he, Jihova ọ sae rọvrẹ rai. Re who gbe wuhrẹ kpahe onana, se uzoẹme nọ o ta nọ “Eme Ebaibol na Ọ Ta Kpahe Eva-Ekparọ?” nọ a fodẹ evaọ oria Kiẹ Kpahe Efa evaọ uwuhrẹ nana.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
