Dai roro kpahe ọmọ nọ ọ gwọlọ kpobọ isukulu. Oni riẹ ọ tẹ ruẹ nọ ọmọ na ọ nabe họ je ku emamọ iwu nọ e rrọ fuafo họ. Onana u re fiobọhọ kẹ ọmọ na nọ o gbe mu mọ họ, je dhesẹ kẹ amọfa nọ ọsẹgboni riẹ a be rẹrotei ziezi. Epọvo na re, Jihova Ọsẹ oyoyou mai na ọ gwọlọ nọ ugboma mai, eware mai, eria nọ ma be rria, gbe uruemu mai e jọ fuafo. Nọ ma tẹ rrọ fuafo, u re fiobọhọ kẹ omai jẹ wha orro se Jihova.

1. Ẹvẹ ma sae rọ jọ fuafo evaọ ugboma gbe eware kpobi nọ ma wo?

Jihova ọ vuẹ omai nọ: “Wha rẹ jọ ọrẹri hrọ.” (1 Pita 1:16) Ohwo nọ ọ rrọ ọrẹri ọ rẹ jọ fuafo evaọ ugboma gbe uruemu riẹ. Re ugboma mai gbe eware mai e jọ fuafo, ma rẹ họ kẹse kẹse, fọrọ iwu mai, je ru iwou mai, omoto mai gbe eware efa kpobi nọ ma wo fihọ fuafo. Ma re je ru Ọgwa Uvie mai fo. Ma te ru eware nana fihọ fuafo, ma rẹ wha orro se Jihova.—2 Ahwo Kọrint 6:3, 4.

2. Re ma jọ fuafo, iruemu vẹ ma rẹ whaha?

Ebaibol na ọ ta kẹ omai nọ ma “ru omamai fo no eware kpobi nọ i re zue oma gbe ẹzi.” (2 Ahwo Kọrint 7:1) Fikiere, ma rẹ daoma whaha oware kpobi nọ o rẹ raha ugboma hayo iroro mai. U fo nọ eware nọ ma bi roro e rẹ were Jihova, fikiere ma rẹ daoma re ma siọ ekpehre iroro ba. (Olezi 104:34) Ma rẹ jẹ daoma ta emamọ eme.—Se Ahwo Kọlọsi 3:8.

Eware efa jọ vẹ e rẹ sai ru nọ ma gbẹ jọ fuafo ho? U wo eware jọ nọ e rẹ sai gbe oma mai ku. Fikiere ma rẹ whaha eware wọhọ utaba use, isigareti ivovo, ubi-ure nọ a re se betel nut hayo ẹbe coca nọ a rẹ re, gbe imu egaga nọ a rẹ rehọ ugbẹrehọ. Ma tẹ whaha eware nana o rẹ lẹliẹ omai wo omokpokpọ je dhesẹ nọ ma wo adhẹẹ kẹ uzuazọ. Ma rẹ jẹ jọ fuafo evaọ uruemu nọ ma tẹ be whaha iruemu igbegbe wọhọ obọ nọ ohwo ọ rẹ rọ whrawhra ẹba obọriẹ gbe ifoto-ẹbẹba iriwo. (Olezi 119:37; Ahwo Ẹfisọs 5:5) O sae jọ bẹbẹ re ohwo o siobọno iruemu nana, rekọ Jihova ọ sai fiobọhọ kẹ owhẹ ru ere.—Se Aizaya 41:13.

 GBE WUHRẸ EWARE EFA

3. Ma rẹ wha orro se Jihova nọ ma tẹ rrọ fuafo

Ma te se izi nọ Jihova ọ kẹ orẹwho Izrẹl, ma rẹ ruẹ epanọ o rri ẹfuọ. Se Ọnyano 19:10 gbe 30:17-19, kẹsena wha vẹ ta ẹme kpahe enọ nana:

• Eme eria Ebaibol nana i dhesẹ kpahe epanọ Jihova o rri ẹfuọ?

• Eme who re ru ẹsikpobi re whọ sae jọ fuafo?

Re ma jọ fuafo, o rẹ rehọ oke gbe omodawọ mi omai. Rekọ ma sai ru ei ghelọ oria nọ ma be rria kẹhẹ hayo nọ ma gbẹ maki wo ugho tere he. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.

• Nọ eware mai e tẹ rrọ fuafo, ẹvẹ o sai ro ru ahwo nọ ma be ta usi uwoma kẹ wo adhẹẹ kẹ Jihova ziezi?

4. Siobọno iruemu iyoma riẹriẹriẹ

Otẹrọnọ who re vovo isigareti hayo rehọ imu egaga ugbẹrehọ, o sae jọnọ o rrọ bẹbẹ re whọ seba. Rekọ eme ọ rẹ sai fiobọhọ? Roro kpahe oghẹrẹ nọ uruemu na u bi kpomahọ owhẹ. Se Matiu 22:37-39, kẹsena wha vẹ ta ẹme kpahe oghẹrẹ nọ ivovavovo, utaba use gbe imu egaga nọ a re mu rehọ i re kpomahọ . . .

• usu nọ ohwo o re wo kugbe Jihova

• uviuwou ohwo na gbe amọfa

Jiroro epanọ whọ sai ro siobọno uruemu uyoma. a Kporo IVIDIO na.

Se Ahwo Filipai 4:13, kẹsena wha vẹ ta ẹme kpahe onọ nana:

• Ẹvẹ olẹ, Ebaibol nọ ohwo o re wuhrẹ, gbe ewuhrẹ nọ ohwo ọ rẹ nya ẹsikpobi o sai ro fiobọhọ kẹe siobọno uruemu uyoma?

 5. Daoma re whọ siọ ekpehre iroro gbe iruemu ba

Se Ahwo Kọlọsi 3:5, kẹsena wha vẹ ta ẹme kpahe enọ nana:

• Ẹvẹ ma rọ riẹ nọ ifoto-ẹbẹba nọ a re rri, ifoto-ẹbẹba hayo eme oworu nọ a rẹ rọ ifonu vi, gbe obọ nọ ohwo ọ rẹ rọ whrawhra ẹba obọriẹ yọ iruemu igbegbe evaọ aro Jihova?

• Kọ who roro nọ u kiehọ nọ Jihova ọ rọ gwọlọ nọ ma jọ fuafo evaọ uruemu? Fikieme?

Wuhrẹ epanọ ohwo ọ sae rọ siọ ekpehre eware ba eroro. Kporo IVIDIO na.

Jesu ọ kẹ oriruo jọ ro dhesẹ nọ ma rẹ dawo oma mai kpobi re uruemu mai o sae jọ fuafo. Se Matiu 5:29, 30, kẹsena wha vẹ ta ẹme kpahe onọ nana:

• Dede nọ Jesu ọ be ta nọ ma vre ubiẹro hayo bru obọ mai no dẹẹ hẹ, ẹme riẹ na u dhesẹ nọ ma re ru oware jọ hrọ. Oware jọ vẹ ohwo ọ rẹ sai ru re ọ siọ ekpehre iroro ba eroro? b

Otẹrọnọ whọ be daoma re whọ siọ ikpehre eware ba eroro, riẹ nọ onana o be were Jihova gaga. Se Olezi 103:13, 14, kẹsena wha vẹ ta ẹme kpahe onọ nana:

• Otẹrọnọ whọ be daoma siọ ekpehre uruemu jọ ba, ẹvẹ oria Ebaibol nana o rọ tuduhọ owhẹ awọ re o gbẹ bẹ owhẹ no ho?

 EME WHO WUHRẸ NO?

Ma re ru eva were Jihova nọ ma te bi ru ugboma mai, iroro mai, gbe uruemu mai jọ fuafo.

Ọkiẹkpemu

• Fikieme u ro wuzou re ma jọ fuafo?

• Ẹvẹ whọ sae rọ jọ fuafo evaọ ugboma gbe eware nọ who wo?

• Ẹvẹ whọ sai ro ru iroro ra gbe uruemu ra jọ fuafo?