UWUHRẸ AVỌ 41
Eme Ebaibol na Ọ Ta Kpahe Owezẹ Ọzae-avọ-Aye?
Oma o rẹ vo ahwo buobu re a ta ẹme kpahe owezẹ ọzae-avọ-aye. Rekọ a jọ Ebaibol na ta ẹme kpahe iẹe vevẹ avọ adhẹẹ. Ma sai wuhrẹ eware buobu no oware nọ Ebaibol na ọ ta ze. O rrọ ere keme Jihova ọ ma omai. Fikiere ọ riẹ oware nọ o mai woma kẹ omai. Ọ vuẹ omai eware nọ ma re ru nọ e rẹ were iẹe gbe epanọ ma sae rọ reawere uzuazọ bẹdẹ bẹdẹ.
1. Ẹvẹ Jihova o rri owezẹ ọzae-avọ-aye?
Owezẹ ọzae-avọ-aye yọ okẹ nọ u no obọ Jihova ze. Ọ gwọlọ nọ ọzae-avọ-aye nọ a rọo no ọvo a rẹ wezẹ kugbe. Orọnikọ okẹ nana u re fiobọhọ kẹ ọzae-avọ-aye yẹ emọ ọvo ho, rekọ nọ obọdẹ edhere nọ aimava na a re ro dhesẹ uyoyou kẹ ohwohwo, yọ u re je ru eva were ae. Oyejabọ nọ Ọghẹnẹ ọ rọ ta nọ: “Wereva kugbe aye nọ whọ rehọ evaọ oke uzoge ra.” (Itẹ 5:18, 19) Jihova ọ gwọlọ nọ Ileleikristi nọ e rọo no a rẹ talamu ohwohwo, fikiere, a rẹ wezẹ kugbe omọfa vievie he.—Se Ahwo Hibru 13:4.
2. Eme họ ọfariẹ-ogbe?
Ebaibol na ọ ta kẹ omai nọ “ahwo nọ a bi gbe-ọfariẹ . . . a te reuku Uvie Ọghẹnẹ hẹ.” (1 Ahwo Kọrint 6:9, 10) Ahwo nọ a kere Ebaibol na evaọ ẹvẹrẹ Griki a rọ ẹme na por·neiʹa ta kpahe ọfariẹ-ogbe. Ẹme na u re dhesẹ (1) imava nọ e rrọ orọo ho nọ e wezẹ kugbe, a (2) ọzae avọ ọzae hayo aye avọ aye nọ a wezẹ kugbe, gbe (3) ohwo avọ arao nọ a wezẹ kugbe. Nọ ma te “siomano ọfariẹ-ogbe,” ma re ru eva were Jihova yọ ma re wo erere noi ze.—1 Ahwo Tẹsalonika 4:3.
GBE WUHRẸ EWARE EFA
Wuhrẹ kpahe epanọ who gbe ro gbe-ọfariẹ hẹ gbe irere nọ i re te owhẹ nọ who gbe bi gbe-ọfariẹ hẹ.
3. Dhẹ siọ ọfariẹ-ogbe ba
Josẹf ọ dhẹ siọ aye jọ ba okenọ aye na ọ jẹ gbae họ re o lele iei wezẹ. Se Emuhọ 39:1-12, kẹsena wha vẹ ta ẹme kpahe enọ nana:
-
Eme ọ lẹliẹ Josẹf dhẹ?—Rri owọ avọ 9.
-
Kọ who roro nọ emamọ iroro Josẹf ọ jẹ na? Fikieme who ro roro ere?
Ẹvẹ izoge na a sae rọ rehọ aro kele Josẹf a vẹ dhẹ siọ ọfariẹ-ogbe ba nẹnẹ? Kporo IVIDIO na.
Jihova ọ gwọlọ nọ mai kpobi ma dhẹ siọ ọfariẹ-ogbe ba. Se 1 Ahwo Kọrint 6:18, kẹsena wha vẹ ta ẹme kpahe enọ nana:
-
Eware vẹ e sai ru ohwo thọ uzi ọfariẹ-ogbe?
-
Ẹvẹ whọ sae rọ dhẹ siọ ọfariẹ-ogbe ba?
4. Eware nọ who re ru nọ who gbe ro kie ruọ odawọ họ
Eme ọ rẹ sai ru ei bẹbẹ kẹ ohwo re ọ whaha ọfariẹ-ogbe? Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Nọ oniọvo nọ a dhesẹ evaọ ividio na ọ ruẹ nọ eware nọ o bi roro gbe eware nọ o bi ru e sae lẹliẹe gbe-ọfariẹ, eme o ru?
O rẹ sae jọ bẹbẹ kẹ makọ Ileleikristi nọ i kruga ziezi re a siọ ikpehre eware ba eroro kpahe. Ẹvẹ whọ sae rọ siọ eware etọtọ ba eroro kpahe? Se Ahwo Filipai 4:8, kẹsena wha vẹ ta ẹme kpahe enọ nana:
-
Oghẹrẹ eware vẹ u fo nọ ma re roro kpahe?
-
Ẹvẹ Ebaibol na nọ ma re se gbe obọ nọ ma re wo ziezi evaọ egagọ Jihova o sai ro fiobọhọ kẹ omai nọ ma gbe ro kieruọ odawọ họ?
5. Izi Jihova e rẹ kẹ omai erere
Jihova ọ riẹ oware nọ o mai woma kẹ omai. Ọ vuẹ omai oware nọ ma re ru re ma gbe gbe-ọfariẹ hẹ gbe irere nọ i re noi ze. Se Itẹ 7:7-27 hayo kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Ẹvẹ ọmọzae na ọ rọ rehọ owọ riẹ kọ ruọ odawọ?—Rri Itẹ 7:8, 9.
-
Wọhọ epanọ o rrọ Itẹ 7:23, 26, ọfariẹ-ogbe ọ sae wha uye ulogbo ze. Nọ ma gbe bi gbe-ọfariẹ hẹ, ebẹbẹ vẹ i re te omai hi?
-
Nọ ma gbe bi gbe-ọfariẹ hẹ, ẹvẹ o sai ro fiobọhọ kẹ omai reawere uzuazọ bẹdẹ bẹdẹ?
Ahwo jọ a roro nọ u kiehọ họ nọ Ebaibol ọ rọ ta nọ ọzae avọ ọzae hayo aye avọ aye a du wezẹ kugbe he. Rekọ Jihova yọ Ọghẹnẹ nọ ọ rrọ yoyou yọ ọ gwọlọ nọ ohwo kpobi ọ reawere uzuazọ bẹdẹ bẹdẹ. Re o sae jọ ere, o gwọlọ nọ ma re koko izi riẹ. Se 1 Ahwo Kọrint 6:9-11, kẹsena wha vẹ ta ẹme kpahe onọ nana:
-
Evaọ aro Ọghẹnẹ, kọ ọzae avọ ọzae hayo aye avọ aye nọ a rẹ wezẹ kugbe ọvo họ iruemu nọ e thọ?
Re ma sai ru eva were Ọghẹnẹ, o gwọlọ nọ mai kpobi ma re nwene uruemu mai. Kọ erere jọ ọ riẹ? Se Olezi 19:8, 11, kẹsena wha vẹ ta ẹme kpahe enọ nana:
-
Kọ who roro nọ ma sai gine koko izi Jihova kpahe owezẹ ọzae-avọ-aye? Fikieme whọ rọ ta ere, hayo kọ fikieme who gbe ro roro ere he?
Jihova o fiobọhọ kẹ ahwo buobu no nọ a be sai ro koko izi riẹ kpahe owezẹ ọzae-avọ-aye. Ọ sai fiobọhọ kẹ owhẹ re
AHWO JỌ A RẸ TA NỌ: “Ohwo kpobi ọ sae wezẹ kugbe ohwo nọ u je rie, thakpinọ a you ohwohwo, te a make rrọ ọzae avọ ọzae hayo aye avọ aye dede.”
-
Eme whọ rẹ ta kẹ ohwo otiọye na?
EME WHO WUHRẸ NO?
Owezẹ ọzae-avọ-aye yọ okẹ nọ u no obọ Jihova ze, ọ gwọlọ nọ ọzae-avọ-aye nọ a rọo no ọvo a rẹ wezẹ kugbe.
Ọkiẹkpemu
-
Eware jọ vẹ a re se ọfariẹ-ogbe?
-
Eme o re fiobọhọ kẹ omai nọ ma gbe ro gbe-ọfariẹ hẹ?
-
Irere vẹ i re te omai nọ ma te bi koko izi Jihova kpahe owezẹ ọzae-avọ-aye?
KIẸ KPAHE EFA
Wuhrẹ oware nọ Ọghẹnẹ ọ rọ gwọlọ nọ ọzae-avọ-aye a rẹ ruọ orọo taure a tẹ te rria kugbe.
“Eme Ebaibol na Ọ Ta Kpahe Imava nọ E re Rọo Ho nọ A rẹ Rria Kugbe?” (Uzoẹme nọ o rrọ itanẹte)
Dede nọ Ebaibol ọ ta nọ o thọ re ọzae avọ ọzae hayo aye avọ aye a wezẹ kugbe, wuhrẹ oware nọ ma gbe ro mukpahe ahwo nọ a bi ru ere he.
“Kọ O Thọ re Ọzae O Lele Ọzae Wezẹ Hayo re Aye O Lele Aye Wezẹ?” (Uzoẹme nọ o rrọ itanẹte)
Wuhrẹ kpahe oghẹrẹ nọ izi Ọghẹnẹ e rẹ rọ thọ omai evaọ ẹme kpobi nọ o kiekpahe owezẹ ọzae-avọ-aye.
“Kọ A rẹ Sae Se Ẹba Omọfa nọ A Wọ Họ Unu Nọ Owezẹ?” (Uzoẹme nọ o rrọ itanẹte)
Jọ iku nọ uzoẹme riẹ o ta nọ “A Bru Ọghọ Họ Omẹ Oma” ruẹ oware nọ o lẹliẹ ọzae jọ nọ ọ jẹ hai lele ezae efa wezẹ nwene uzuazọ riẹ re ọ sai ru eva were Ọghẹnẹ.
“Ebaibol na O re Nwene Uzuazọ Ohwo” (Uwou-Eroro Na, Ahrẹ 1, 2011)
a Ekpehre uruemu nana u kugbe owezẹ ọzae-avọ-aye, ẹba ọzae hayo aye nọ a rẹ rọ unu vi, ẹba ọzae nọ a re dhe fihọ uvinẹ aye hayo uvinẹ ọzae ọfa, gbe abọ nọ a rẹ rọ whrawhra ẹba omọfa nọ ọ rrọ ọrivẹ-orọo ohwo ho.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
