UWUHRẸ AVỌ 44
Kọ Ehaa Kpobi E rẹ Were Ọghẹnẹ?
Jihova ọ gwọlọ nọ ma reawere uzuazọ je tube ru ehaa ẹsejọ dede. O make rrọ ere na, kọ ehaa kpobi e rẹ were iẹe? Ẹvẹ ma sai ro dhesẹ nọ ma you Jihova evaọ ẹme nana?
1. Fikieme ehaa buobu e gbẹ rọ were Ọghẹnẹ hẹ?
Ẹsejọhọ u ti gbe owhẹ unu nọ whọ tẹ riẹ nọ ehaa buobu nọ ahwo a re ru na i no Ebaibol ze he, ukpoye, egagọ erue gbe egedhọ i mu rai họ. A sae jarai ru iruẹru-imizi. Yọ a re ru ehaa nana jọ fikinọ a roro nọ ohwo o te whu no, oware jọ u re noi oma kpohọ oria ofa. A re ru ehaa jọ fiki ugbẹrọwọ gbe iroro nọ u re ru ohwo wo emamuzo. (Aizaya 65:11) Jihova ọ vẹvẹ ahwo nọ a be gọe unu nọ: Wha “hẹriẹ oma no ai, . . . yọ wha gbẹ rọ obọ te oware ugbegbe na ha.”—2 Ahwo Kọrint 6:17. a
2. Ẹvẹ Jihova o rri ehaa nọ a rẹ jọ kẹ ahwo-akpọ ọghọ nọ o fo ho?
Jihova ọ vẹvẹ omai unu nọ ma “fievahọ ahwo-akpọ gheghe” he. (Se Jerimaya 17:5.) A re ru ehaa jọ rọ kẹ isu hayo egbaẹmo ọghọ. Efa e riẹ nọ ahwo a re ru rọ kẹ iwoho orẹwho rai ọghọ hayo fiki ẹdẹ nọ orẹwho rai u ro wo esuo obọriẹ. (1 Jọn 5:21) A re ru ehaa efa jọ dede fiki itu isuẹsu hayo egwae sa-sa. Kọ ẹvẹ Jihova o re rri rie nọ ma tẹ be rọ ọghọ kẹ ohwo jọ hayo ukoko akpọ na jọ, maero onọ u bi ru eware nọ e wọso oreva Riẹ?
3. Iruemu jọ vẹ e sai ru ehaa fihọ yoyoma?
Ebaibol na ọ ta nọ, ‘idi nọ a rẹ da vrẹta, ehaa nọ a rẹ jọ ru eware odode, gbe ehaa idieda’ i woma ha. (1 Pita 4:3) A rẹ jọ ehaa jọ ru eware odode gbe iruemu ọfariẹ-ogbe. Re ma gbẹ sae jọ egbẹnyusu Jihova, ma rẹ kẹnoma kẹ iruemu iyoma itieye na.
GBE WUHRẸ EWARE EFA
Wuhrẹ epanọ whọ sae rọ jẹ emamọ iroro evaọ ẹme edẹ-eriosehọ gbe ehaa re whọ sai ru Jihova eva were.
4. Who du ru ehaa nọ Jihova o mukpahe he
Se Ahwo Ẹfisọs 5:10, kẹsena wha vẹ ta ẹme kpahe enọ nana:
-
Eme ma rẹ daoma riẹ nọ ma tẹ be jiroro sọ ma re ru ehaa jọ?
-
Ehaa vẹ ahwo a re ru gaga evaọ oria nọ whọ be rria?
-
Kọ who roro nọ ehaa yena e be were Jihova?
Wọhọ oriruo, kọ who roro kpahe oghẹrẹ nọ Ọghẹnẹ o rri ehaa ẹdẹ-eyẹ no ẹdẹ jọ? Ebaibol na o gbiku ohwo ọvo nọ ọ be gọ Jihova nọ o ru ehaa ẹdẹ-eyẹ hẹ, rekọ o gbiku ehaa ẹdẹ-eyẹ ivẹ jọ nọ ahwo nọ a be gọe he a ru. Se Emuhọ 40:20-22 gbe Matiu 14:6-10. Kẹsena wha vẹ ta ẹme kpahe enọ nana:
-
Eme o jọ ehaa ẹdẹ-eyẹ ivẹ na via?
-
Nọ ma te rri oria Ebaibol nana nọ ma se na ziezi, ẹvẹ who roro nọ Jihova o rri ehaa ẹdẹ-eyẹ?
Ẹsejọhọ whọ be nọ omara nọ, ‘Kọ Jihova ọ be ginẹ daezọ sọ me re ru ehaa ẹdẹ-eyẹ hayo ehaa efa jọ kpobi nọ i no Ebaibol na ze he?’ Se Ọnyano 32:1-8. Kẹsena wha ve kporo IVIDIO na jẹ ta ẹme kpahe enọ nọ e rrọ obotọ na.
-
Fikieme o rọ gwọlọ nọ ma rẹ daoma riẹ oware nọ o rẹ were Jihova?
-
Ẹvẹ ma sai ro ru ere?
Epanọ ma sae rọ riẹ sọ ehaa jọ e rẹ dha Ọghẹnẹ eva
-
Kọ iwuhrẹ erue ehaa na i no ze? Re whọ riẹ uyo na, daoma riẹ epanọ ehaa na i ro muhọ.
-
Kọ a rẹ jariẹ rọ ọghọ nọ o fo ho kẹ ahwo-akpọ, ukoko akpọ na jọ, hayo iwoho orẹwho jọ? Jihova ma rẹ rọ ọghọ kẹ vi omọfa kpobi, yọ ọye ma re fievahọ nọ o ti ku ebẹbẹ akpọ na họ.
-
Kọ iruemu nọ a rẹ jariẹ ru e wọso izi Ebaibol? U fo nọ ma rẹ kẹnoma kẹ ikpehre iruemu kpobi.
5. Ru oware nọ o rẹ sae lẹliẹ amọfa wo adhẹẹ kẹ oware nọ whọ rọwo
Nọ amọfa a tẹ be tẹzẹ owhẹ hayo gba owhẹ họ re who ru ehaa jọ nọ e rẹ dha Jihova eva, o rẹ sae jọ bẹbẹ re whọ se. Rọ areghẹ vuẹ amọfa oware nọ whọ rọwo je wo odiri. Re whọ ruẹ oriruo epanọ whọ sai ro ru onana, kporo IVIDIO na.
Se Matiu 7:12, kẹsena wha vẹ ta ẹme kpahe enọ nana:
-
Wọhọ epanọ oria Ebaibol nana o ta na, kọ u fo re whọ gba ahwo uviuwou ra nọ a rrọ ukoko ho họ inọ a ru ehaa jọ họ?
-
Eme whọ rẹ sai ru ro dhesẹ kẹ ahwo uviuwou ra inọ dede nọ who bi lele ai ru ehaa jọ họ, who you rai yọ a rrọ ghaghae kẹ owhẹ?
6. Jihova ọ gwọlọ nọ ma wereva
Jihova ọ gwọlọ nọ ma re omaweromẹ kugbe ahwo uviuwou gbe egbẹnyusu mai. Se Ọtausiuwoma Na 8:15, kẹsena wha vẹ ta ẹme kpahe onọ nana:
-
Ẹvẹ oria Ebaibol nana u ro dhesẹ nọ Jihova ọ gwọlọ nọ ma wereva?
Jihova ọ gwọlọ nọ ahwo riẹ a rẹ wereva jẹ zahamaro kugbe. Kporo IVIDIO na re whọ ruẹ epanọ a be hai ro ru onana gaga evaọ ikokohọ akpọ-soso.
Se Ahwo Galesha 6:10, kẹsena wha vẹ ta ẹme kpahe enọ nana:
-
Kọ o gwọlọ nọ ma re ru ehaa akpọ na jọ taure ma te ti ru “oware uwoma” kẹ amọfa?
-
Eme o te mae lẹliẹ eva were owhẹ, okẹ nọ o gba owhẹ họ nọ whọ rẹ kẹ evaọ oke ehaa manikọ onọ whọ rẹ rọ iroro obọra kẹ?
-
Isẹri Jihova buobu a re ru epanọ a rẹ rọ zahamaro kugbe emọ rai noke toke, jẹ tubẹ dẹ oware ro ru ai ọghọ nọ emọ na a rẹro riẹ hẹ. Otẹrọnọ who wo emọ, obọdẹ eware jọ vẹ whọ rẹ sai ru kẹ ae?
AHWO JỌ A RẸ TA NỌ: “Oria nọ ehaa i muhọ no ze u muẹme he. Thakpinọ whọ be rọ oke na wereva kugbe ahwo uviuwou gbe egbẹnyusu ra.”
-
Eme whọ te vuẹ ohwo otiọye na?
EME WHO WUHRẸ NO?
Jihova ọ gwọlọ nọ ma wo oke nọ ma rẹ rọ re omaweromẹ kugbe ahwo uviuwou gbe egbẹnyusu mai. Rekọ ọ gwọlọ re nọ ma du ru ehaa nọ e rẹ dhae eva ha.
Ọkiẹkpemu
-
Enọ vẹ ma rẹ sae nọ re ma riẹ sọ oghẹrẹ ehaa jọ e rẹ dha Jihova eva?
-
Ẹvẹ ma sai ro fiobọhọ kẹ ahwo uviuwou gbe egbẹnyusu mai riẹ oware nọ ma gbe ro ru ehaa jọ họ?
-
Ẹvẹ whọ rọ riẹ nọ Jihova ọ gwọlọ nọ ma wereva jẹ zahamaro ẹsejọ?
KIẸ KPAHE EFA
Se kpahe ehaa jọ nọ Ileleikristi a re ru hu.
“Fikieme Isẹri Jihova A Gbe ro Ru Ehaa jọ Họ?” (Uzoẹme nọ o rrọ itanẹte)
Se kpahe ẹjiroro ene nọ ma rọ rọwo nọ ehaa ẹdẹ-eyẹ e rẹ dha Ọghẹnẹ eva.
“Fikieme Isẹri Jihova A Gbe ro Ru Ehaa Ẹdẹ-Eyẹ Hẹ?” (Uzoẹme nọ o rrọ itanẹte)
Rri epanọ uzoge jọ nọ a je se ẹkoko evaọ obọ isukulu fikinọ o re ru Kresimesi hi ọ rọ rehọ areghẹ ta oware nọ ọ rọwo.
Ileleikristi nọ i bu te ima buobu a jiroro nọ a re ru Kresimesi hi. Kọ a be vioja iroro nọ a jẹ na?
“A Duku Oware Ofa nọ O Mai Woma” (Uwou-Eroro Na, Akpegbivẹ 1, 2012)
a Rri Ẹme-Oruvẹ avọ 5 re whọ riẹ oware nọ who re ru nọ ahwo a te bi ru oghẹrẹ ehaa jọ.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
