UWUHRẸ AVỌ 47
Kọ Whọ Ruẹrẹ Oma Kpahe Kẹ Ame-Ọhọ No?
Anwẹnọ who bi ro wuhrẹ Ebaibol na, who wuhrẹ eware buobu kpahe Jihova no. Yọ ẹsejọhọ whọ siọ eware jọ ba no re whọ sai ru eware nọ who bi wuhrẹ na. Rekọ o sae jọnọ u wo oware jọ nọ o be whaha owhẹ nọ whọ gbẹ be rọ rehọ uzuazọ ra mudhe kẹ Jihova re whọ họ-ame he. Ma te jọ uwuhrẹ nana ta kpahe eware jọ nọ e rẹ sae whaha ohwo ame-ọhọ gbe epanọ whọ sai ro fi ai kparobọ.
1. Ẹvẹ o gwọlọ nọ who re wo eriariẹ te re whọ tẹ te họ-ame?
Re whọ sae họ-ame, o gwọlọ nọ who re wo “eriariẹ egbagba uzẹme na.” (1 Timoti 2:4) Orọnikọ onana u dhesẹ nọ whọ rẹ riẹ uyo onọ kpobi nọ ahwo a te nọ owhẹ no Ebaibol na ze taure whọ tẹ te họ-ame he. Makọ Ileleikristi nọ e họ-ame kri no dede a gbe bi wuhrẹ. (Ahwo Kọlọsi 1:9, 10) Rekọ o gwọlọ nọ who re wo otoriẹ igogo iwuhrẹ Ebaibol na jọ. Ekpako ukoko a ti fiobọhọ kẹ owhẹ riẹ sọ who wo eriariẹ te no.
2. Eware jọ vẹ who re ru taure whọ tẹ te họ-ame?
Taure whọ tẹ te họ-ame, who re “kurẹriẹ” hrọ, who ve je “nwene idhere [ra].” (Se Iruẹru Ikọ 3:19.) Onana u dhesẹ nọ eware iyoma nọ who ru evaọ okenọ u kpemu e rẹ da owhẹ, whọ vẹ lẹ se Jihova re ọ rọvrẹ owhẹ. Who re je siobọno ekpehre uruemu kpobi jẹ gbaemu nọ who re yeri oghẹrẹ uzuazọ nọ o rẹ were Ọghẹnẹ. U te no ere no, whọ rẹ hai kpohọ iwuhrẹ ukoko, jẹ jọ owhowho-uvie nọ ọ re họ-ame he nọ ọ rẹ ta usi uwoma.
3. Fikieme whọ gbẹ rọ kuvẹ hẹ re ozọ u ru owhẹ siọ ame ba ẹhọ?
Ozọ u re mu ahwo jọ inọ a te sai ru oware nọ a ya eyaa riẹ kẹ Jihova ha. Uzẹme o rrọ inọ eware e te thọ owhẹ obọ ẹsejọ, yọ o jọ ere kẹ ezae gbe eyae nọ e gọ Jihova ziezi nọ a fodẹ evaọ Ebaibol na re. Rekọ Jihova o bi rẹro nọ ahwo nọ a be gọe a rẹ jọ gbagba ha. (Se Olezi 103:13, 14.) Eva e rẹ were iẹe nọ whọ tẹ be dawo ẹgba ra kpobi! O ti fiobọhọ kẹ owhẹ. Jihova ọ kẹ omai imuẹro nọ oware ovo “o rẹ sae hẹriẹ omai no uyoyou [riẹ] hẹ.”—Se Ahwo Rom 8:38, 39.
GBE WUHRẸ EWARE EFA
Wuhrẹ epanọ whọ sae rọ riẹ Jihova ziezi jẹ kuvẹ re o fiobọhọ kẹ owhẹ, re whọ sai fi ẹbẹbẹ kpobi nọ ọ rẹ sae whaha owhẹ ame-ọhọ kparobọ.
4. Daoma riẹ Jihova ziezi
Ẹvẹ o gwọlọ nọ whọ rẹ riẹ Jihova te taure whọ tẹ te họ-ame? O gwọlọ nọ whọ rẹ riẹe ziezi te epanọ who re ro you rie je ru eva were iẹe. Kporo IVIDIO na re whọ ruẹ epanọ ahwo nọ Isẹri Jihova a wuhrẹ Ebaibol na kugbe evaọ akpọ na soso a ro ru onana. Kẹsena wha vẹ ta ẹme kpahe onọ nọ ọ rrọ obotọ na.
-
Evaọ ividio na, eme o fiobọhọ kẹ ahwo na ruẹrẹ oma kpahe kẹ ame-ọhọ?
Se Ahwo Rom 12:2, kẹsena wha vẹ ta ẹme kpahe enọ nana:
-
Kọ amavro ọ dina rrọ owhẹ udu kpahe eware nọ who bi wuhrẹ evaọ Ebaibol na hayo sọ Isẹri Jihova a bi gine wuhrẹ uzẹme na?
-
O tẹ rrọ ere, eme whọ rẹ sai ru kpahe iẹe?
5. Fi ezadhe nọ e rẹ sae whaha owhẹ ame-ọhọ kparobọ
Nọ ma tẹ jiroro nọ ma rẹ roma mai mudhe kẹ Jihova jẹ họ-ame, ma rẹ rẹriẹ ovao dhe ebẹbẹ. Re whọ ruẹ oriruo jọ, kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Evaọ ividio na, eware jọ vẹ i je ru ei bẹbẹ kẹ Narangerel re ọ gọ Jihova?
-
Fikinọ o you Jihova, ẹvẹ ọ sai ro fi ebẹbẹ yena kparobọ?
Se Itẹ 29:25 gbe 2 Timoti 1:7, kẹsena wha vẹ ta ẹme kpahe onọ nana:
-
Eme ọ rẹ kẹ omai udu nọ ma re ro fi ezadhe kparobọ?
6. Fievahọ Jihova nọ o ti fiobọhọ kẹ owhẹ
Jihova o ti fiobọhọ kẹ owhẹ ru oware nọ o rẹ were iẹe. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Evaọ ividio na, eme o je ru ọzae nọ a je wuhrẹ Ebaibol na nọ ọ gbẹ jẹ rọ họ-ame he?
-
Eme o wuhrẹ nọ o fiobọhọ kẹe fievahọ Jihova ziezi?
Se Aizaya 41:10, 13, kẹsena wha vẹ ta ẹme kpahe onọ nana:
-
Fikieme u re ro mu owhẹ ẹro inọ whọ sai ru eyaa nọ whọ ya kẹ Jihova gba?
7. Ru oware nọ o rẹ lẹliẹ uyoyou nọ Jihova o wo kẹ owhẹ da owhẹ ẹro ziezi
Who te bi roro kpahe uyoyou nọ Jihova o wo kẹ owhẹ ẹsikpobi, o te wọ owhẹ jiri ei ẹsikpobi yọ whọ te gwọlọ nọ whọ rẹ gọe bẹdẹ bẹdẹ. Se Olezi 40:5, kẹsena wha vẹ ta ẹme kpahe onọ nana:
-
Eghale Jihova vẹ e mae were owhẹ?
Jerimaya ọruẹaro na o you Jihova gbe ẹme riẹ gaga, yọ o were riẹ gaga inọ a jẹ rọ odẹ Jihova sei. Ọ ta nọ: “Ẹme ra ọ tẹ lẹliẹ evawere gbe oghọghọ jọ udu mẹ, keme a be rehọ odẹ ra se omẹ, O Jihova.” (Jerimaya 15:16) Kẹ uyo enọ nana:
-
Fikieme o rọ rrọ obọdẹ uvẹ re ohwo ọ jọ omọvo Isẹri Jihova?
-
Kọ whọ gwọlọ họ-ame re whọ jọ omọvo Isẹri Jihova?
-
Kọ oware jọ o riẹ nọ o be whaha owhẹ?
-
Eme who roro nọ who re ru re whọ sae họ-ame?
AHWO JỌ A RẸ TA NỌ: “Me roro nọ mẹ te sai koko izi kpobi nọ ohwo nọ ọ họ-ame no o re koko ho.”
-
Kọ ere who roro re?
EME WHO WUHRẸ NO?
Jihova ọ rẹ sai fiobọhọ kẹ owhẹ fi ọzadhe kpobi nọ ọ be whaha owhẹ ame-ọhọ kparobọ.
Ọkiẹkpemu
-
Ẹvẹ o gwọlọ nọ who re wo eriariẹ Ebaibol te re whọ tẹ te họ-ame?
-
Eware jọ vẹ o sae gwọlọ nọ who re nwene evaọ uzuazọ ra re whọ tẹ te sae họ-ame?
-
Fikieme whọ gbẹ kuvẹ hẹ re ozọ o whaha owhẹ ame-ọhọ?
KIẸ KPAHE EFA
Se kpahe oware nọ o rẹ lẹliẹ owhẹ jiroro nọ whọ be họ-ame.
“Kọ Whọ Ruẹrẹ Oma Kpahe kẹ Ame-Ọhọ No?” (Uwou-Eroro Na, Asa 2020)
Wuhrẹ kpahe epanọ whọ sai ro fi ebẹbẹ jọ nọ e rẹ sae whaha owhẹ ame-ọhọ kparobọ.
Rri epanọ ọzae jọ ọ sai ro fi ebẹbẹ ilogbo jọ kparobọ re ọ sae họ-ame.
Evaọ oke ọsosuọ, ọzae jọ nọ a re se Ataa ọ jẹ gwọlọ họ-ame he. Rri oware nọ o kẹ riẹ udu jiroro nana nọ i wuzou gaga na.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
