UWUHRẸ AVỌ 48
Rọ Areghẹ Salọ Egbẹnyusu Ra
Ma te wo egbẹnyusu ekpekpe, a re lele omai ghọghọ nọ eware e tẹ be riẹ nya, yọ a rẹ bọ omai ga evaọ oke obẹbẹ. Rekọ Ebaibol na ọ vẹvẹ omai unu nọ orọnọ ohwo kpobi ọ rẹ sae jọ emamọ ogbẹnyusu hu. Nọ o rrọ ere na, ẹvẹ whọ sae rọ salọ emamọ egbẹnyusu? Joma ta ẹme kpahe enọ nọ e rrọ obotọ na.
1. Ẹvẹ egbẹnyusu nọ who wo e sae lẹliẹ owhẹ jọ?
Ma rẹ gwọlọ ru wọhọ ahwo nọ ma rẹ jọ kugbe ẹsikpobi. Yọ onana o sae jọ evaọ abọ owoma hayo abọ oyoma. O rẹ jọ ere otẹrọnọ ma be hae jọ kugbe ahwo na dẹẹ hayo itanẹte ma be hai ro lele ai ta ẹme. Wọhọ epanọ Ebaibol na ọ ta, “ọnọ o bi lele iwareghẹ nya usu o re wo areghẹ, rekọ ọnọ o ku usu gbe ahwo ogheghẹ o re kie ruọ ẹbẹbẹ.” (Itẹ 13:20) Egbẹnyusu nọ i you Jihova jẹ be gọe e rẹ sai fiobọhọ kẹ owhẹ si kẹle Jihova jẹ jẹ emamọ iroro. Rekọ ma te mu usu okpekpe kugbe ahwo nọ a rrọ ukoko na ha, a rẹ sai si omai thabọ no Jihova. Agbẹta nọ Ebaibol na ọ rọ tuduhọ omai awọ nọ ma rọ areghẹ salọ egbẹnyusu mai na! Nọ egbẹnyusu mai a tẹ rrọ ahwo nọ a you Ọghẹnẹ, a sai ru omai wo emamọ uruemu, yọ ma sai ru ai wo emamọ uruemu re. Ma sae “tuduhọ ohwohwo awọ jẹ hae bọ ohwohwo ga.”—1 Ahwo Tẹsalonika 5:11.
2. Ẹvẹ Jihova o bi rri egbẹnyusu nọ whọ salọ?
Jihova ọ rẹ romatotọ salọ egbẹnyusu riẹ. “O wo usu okpekpe kugbe enọ i kiete.” (Itẹ 3:32) Ẹvẹ Jihova o ti rri rie otẹrọnọ ma salọ egbẹnyusu nọ i you rie he? Eva e te were iẹe vievie he! (Se Jemis 4:4.) Rekọ ma tẹ siọ ekpehre usu je si kẹle Jihova gbe ahwo nọ a you rie, eva e te were Jihova gaga yọ ọ te salọ omai re ma jọ egbẹnyusu riẹ.—Olezi 15:1-4.
GBE WUHRẸ EWARE EFA
Wuhrẹ oware nọ u ro wuzou re ma salọ emamọ egbẹnyusu, jẹ ruẹ epanọ whọ sai ro wo egbẹnyusu nọ i re fiobọhọ kẹ owhẹ evaọ uzuazọ.
3. Yọroma kpahe ekpehre usu
Ohwo ọ tẹ be nya usu kugbe ahwo nọ a you Ọghẹnẹ hẹ, nọ a bi koko izi riẹ hẹ yọ ekpehre usu. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Oghẹrẹ vẹ ma sae rọ rehọ ẹmẹrera mu usu kugbe ekpehre ahwo?
Se 1 Ahwo Kọrint 15:33, kẹsena wha vẹ ta ẹme kpahe enọ nana:
-
Oghẹrẹ ohwo vẹ ọ rẹ sae jọ ekpehre ogbẹnyusu kẹ owhẹ? Fikieme?
Se Olezi 119:63, kẹsena wha vẹ ta ẹme kpahe onọ nana:
-
Eme u re dhesẹ nọ ohwo ọ te jọ emamọ ogbẹnyusu kẹ owhẹ?
Apo ọvo nọ o gbo no ọ rẹ sae lẹliẹ apo efa nọ e rrọ kugbei gbo re. Ẹvẹ ekpehre ogbẹnyusu ọvo ọ sae lẹliẹ owhẹ jọ?
4. Ahwo nọ a wo ohẹriẹ no omai a sae jọ emamọ egbẹnyusu mai
Ebaibol na o gbiku ezae ivẹ jọ nọ e jọ ahwo Izrẹl oke anwae, edẹ rai họ Devidi avọ Jonatan. Jonatan ọ kpako vi Devidi thethabọ. Jonatan ọ jọ ọmọ ovie, Devidi ọ tẹ jọ othuru-igodẹ gheghe, ghele na, a jọ egbẹnyusu ekpekpe. Se 1 Samuẹle 18:1, kẹsena wha vẹ ta ẹme kpahe onọ nana:
-
Fikieme u gbe du gwọlọ nọ ehwa mai ọvo hayo ahwo nọ a wọhọ omai ọvo ma re mu usu kugbe he?
Se Ahwo Rom 1:11, 12, kẹsena wha vẹ ta ẹme kpahe onọ nana:
-
Ẹvẹ egbẹnyusu nọ i you Jihova a sae rọ tuduhọ ohwohwo awọ?
Jọ ividio nana rri epanọ oniọvo-ọmọzae jọ nọ ọ rrọ uzoge o ro mu egbẹnyusu evaọ oria nọ o rẹro riẹ hẹ. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Evaọ ividio na, fikieme ọsẹgboni Akil a jẹ rọ ruawa kpahe oghẹrẹ egbẹnyusu nọ o je mu evaọ obọ isukulu?
-
Evaọ oke ọsosuọ, fikieme ahwo nọ Akil o je mu usu kugbe na a rọ were iẹe?
-
Eme Akil o ru nọ ọ gbẹ rọ jọ goli hi?
5. Epanọ whọ sai ro wo emamọ egbẹnyusu
Rri epanọ whọ sai ro wo emamọ egbẹnyusu, gbe epanọ whẹ omara whọ sae rọ jọ emamọ ogbẹnyusu kẹ amọfa. Kporo IVIDIO na.
Se Itẹ 18:24 gbe 27:17, kẹsena wha vẹ ta ẹme kpahe enọ nana:
-
Ẹvẹ emamọ egbẹnyusu a re ro fiobọhọ kẹ ohwohwo?
-
Kọ who wo emamọ egbẹnyusu itieye? Otẹrọnọ who wo ho, ẹvẹ whọ sai ro wo ai?
Se Ahwo Filipai 2:4, kẹsena wha vẹ ta ẹme kpahe onọ nana:
-
Re whọ sai wo emamọ egbẹnyusu, o gwọlọ nọ whọ rẹ jọ emamọ ogbẹnyusu re. Ẹvẹ whọ sai ro ru ere?
Re whọ sai wo emamọ egbẹnyusu, o gwọlọ nọ whọ rẹ jọ emamọ ogbẹnyusu re
AHWO JỌ A RẸ TA NỌ: “Oghẹrẹ ohwo kpobi ọ sae jọ ogbẹnyusu ra.”
-
Ẹvẹ who roro?
EME WHO WUHRẸ NO?
Ma tẹ rọ areghẹ salọ egbẹnyusu mai, ma re ru eva were Jihova yọ u re je fiobọhọ kẹ omai re.
Ọkiẹkpemu
-
Fikieme Jihova ọ rọ vẹvẹ omai unu kpahe oghẹrẹ egbẹnyusu nọ ma re wo?
-
Oghẹrẹ egbẹnyusu vẹ u fo nọ ma rẹ whaha?
-
Ẹvẹ whọ sai ro mu usu okpekpe kugbe emamọ ahwo?
KIẸ KPAHE EFA
Se kpahe epanọ emamọ egbẹnyusu e sai ro fiobọhọ kẹ omai evaọ oke uye.
“Si Kẹle Ibe Ileleikristi Ra Taure Urere na O tẹ te Ze” (Uwou-Eroro Na, Akpegbọvo 2019)
Se kpahe eware jọ nọ whọ rẹ sai ru re who wo emamọ egbẹnyusu.
Eme u fo nọ whọ rẹ riẹ kpahe egbẹnyusu nọ a re mu evaọ itanẹte?
Jọ iku nọ uzoẹme riẹ o rrọ “Mẹ Jẹ Vioja Ọsẹ,” se kpahe oware nọ o lẹliẹ ọzae jọ nwene egbẹnyusu riẹ.
“Ebaibol na O re Nwene Uzuazọ Ohwo” (Uwou-Eroro Na, Ane 1, 2012)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
