UWUHRẸ AVỌ 51
Ẹvẹ Whọ Sae rọ Rehọ Ẹmeunu Ra Ru Eva Were Jihova?
Nọ Jihova ọ ma omai, ọ kẹ omai obọdẹ okẹ jọ, oye họ ẹgba nọ ma sae rọ ta ẹme. Kọ ọ rẹ daezọ oware nọ ma be hae rọ okẹ nana ru? Ee! (Se Jemis 1:26.) Nọ o rrọ ere na, ẹvẹ ma sae rọ rehọ okẹ ẹmeọta mai ru eva were Jihova?
1. Eme u fo nọ ma rẹ rehọ okẹ ẹmeọta mai ru?
Ebaibol na ọ ta kẹ omai nọ ma “gbẹ hae tuduhọ ohwohwo awọ jẹ hae bọ ohwohwo ga.” (1 Ahwo Tẹsalonika 5:11) Kọ u wo ahwo jọ nọ who roro nọ a gwọlọ uduotahawọ? Kọ eme whọ rẹ sae ta kẹ ae rọ sasa ae oma? Ta kẹ ae nọ whọ be hai roro kpahe ae. Whọ sae tubẹ ta kẹ ae nọ a rrọ ghaghae kẹ owhẹ. Kọ whọ sai roro kpahe oria Ebaibol jọ nọ o rẹ sae tuduhọ ohwo jọ awọ? Eria Ebaibol itieye e vọ riẹ. Kareghẹhọ re nọ, orọnikọ ẹme nọ whọ ta ọvo ọ rẹ sai ru eva were omọfa hayo ru eva dhae he, rekọ te oghẹrẹ nọ whọ rọ ta ẹme na. Fikiere, hae rọ unu uwowolẹ ta eme nọ e rrọ wowou.—Itẹ 15:1.
2. Oghẹrẹ eme vẹ ma rẹ whaha?
Ebaibol na ọ ta nọ: “Jọ ẹme ọtọtọ o no unu rai ze he.” (Se Ahwo Ẹfisọs 4:29.) Onana u dhesẹ nọ ma rẹ ta eme oworu hu, yọ ma rẹ la amọfa eka hayo yẹ eme kẹ ae he re o ruẹse da ae. Ma rẹ jẹ whaha iguẹgu gbe ọtaraha.—Se Itẹ 16:28.
3. Eme o re fiobọhọ kẹ omai ta eme nọ e rẹ bọ ohwo ga?
Evaọ ẹsibuobu, ẹme nọ ma be ta u re dhesẹ oware nọ o rrọ omai eva hayo oware nọ o be kẹ omai uye. (Luk 6:45) Fikiere ma rẹ daoma wuhrẹ omamai re ma hai roro kpahe emamọ eware, eware nọ i kiẹrẹe, nọ e fo, nọ e rẹ wha uyoyou họ aro, je fo ejiro. (Ahwo Filipai 4:8) Onana o gwọlọ nọ ma rẹ rọ areghẹ salọ egbẹnyusu mai, ighe nọ ma re rri gbe ile nọ ma rẹ gaviezọ kẹ. (Itẹ 13:20) Oware ofa họ, ma rẹ daoma roro taure ma tẹ te ta ẹme. Roro kpahe epanọ ẹme nọ whọ te ta ọ te jọ amọfa oma. Ebaibol na ọ ta nọ: “Eme nọ a roro te re a tẹ ta ha, e wọhọ ọgbọdọ nọ a ro duwu ohwo, rekọ ẹrọo ohwo owareghẹ o re siwi.”—Itẹ 12:18.
GBE WUHRẸ EWARE EFA
Wuhrẹ epanọ whọ rẹ rọ ta ẹme evaọ oghẹrẹ nọ o rẹ were Jihova jẹ bọ amọfa ga.
4. Hae kpọ ẹmeunu ra
U re wo ẹsejọ nọ ma rẹ ta eme nọ ma rẹ vioja rai uwhremu na. Yọ o sae via kẹ ohwo kpobi. (Jemis 3:2) Se Ahwo Galesha 5:22, 23, kẹsena wha vẹ ta ẹme kpahe enọ nana:
-
Uruemu vẹ evaọ usu iruemu nana whọ sae lẹ kẹ nọ u re fiobọhọ kẹ owhẹ kpọ ẹmeunu ra? Ẹvẹ iruemu nana e sai ro fiobọhọ kẹ owhẹ?
Se 1 Ahwo Kọrint 15:33, kẹsena wha vẹ ta ẹme kpahe onọ nana:
-
Ẹvẹ usu nọ whọ be nya gbe ighe hayo ile nọ whọ rẹ gaviezọ kẹ e sai ro kpomahọ oghẹrẹ eme nọ whọ rẹ ta?
Eme ọ rẹ sae lẹliẹ owhẹ ta ẹme oghẹrẹ jọ?
Se Ọtausiuwoma Na 3:1, 7, kẹsena wha vẹ ta ẹme kpahe onọ nana:
-
Oke vẹ u fo nọ ohwo o re ro fibo hayo hẹrẹ emamọ oke nọ ọ rẹ rọ ta ẹme?
5. Hae ta emamọ eme kpahe amọfa
Eme o re fiobọhọ kẹ omai nọ ma gbẹ la amọfa eka hayo ta ekpehre eme kẹ ai hi? Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Evaọ ividio na, eme ọ lẹliẹ oniọvo na gwọlọ nwene oghẹrẹ nọ ọ rẹ ta ẹme kpahe amọfa?
-
Eme o ru re ọ sai nwene uruemu na?
Se Ọtausiuwoma Na 7:16, kẹsena wha vẹ ta ẹme kpahe onọ nana:
-
Eme u fo nọ ma rẹ kareghẹhọ nọ ma tẹ gwọlọ ta ekpehre ẹme kpahe ohwo jọ?
Se Ọtausiuwoma Na 7:21, 22, kẹsena wha vẹ ta ẹme kpahe onọ nana:
-
Nọ ohwo jọ ọ tẹ ta ekpehre ẹme kpahe owhẹ, ẹvẹ oria Ebaibol nana ọ sai ro fiobọhọ kẹ owhẹ nọ eva e gbẹ dha owhẹ ga hrọ họ?
6. Hae rọ unu uwowolẹ ta ẹme kẹ ahwo uviuwou ra
Jihova ọ gwọlọ nọ ma rọ unu uwowolẹ ta eme nọ e rrọ wowou kẹ ahwo uviuwou mai. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Eme o ti fiobọhọ kẹ owhẹ rọ unu uwowolẹ ta ẹme kẹ ahwo uviuwou ra?
Se Ahwo Ẹfisọs 4:31, 32, kẹsena wha vẹ ta ẹme kpahe onọ nana:
-
Oghẹrẹ eme vẹ e rẹ bọ ahwo uviuwou ga?
Jihova ọ ta oghẹrẹ nọ o you Jesu, Ọmọ riẹ te. Se Matiu 17:5, kẹsena wha vẹ ta ẹme kpahe onọ nana:
-
Ẹvẹ whọ sae rọ rehọ aro kele Jihova evaọ oghẹrẹ nọ who re ro lele ahwo uviuwou ra ta ẹme?
Hae gwọlọ uvẹ nọ who re ro jiri amọfa
AHWO JỌ A RẸ TA NỌ: “Mẹ rẹ ta eva mẹ. Te o were ahwo te o were ahwo ho, ovuọvo u te omẹ hẹ.”
-
Ere who roro re? Fikieme whọ rọ ta ere, hayo kọ fikieme who gbe ro roro ere he?
EME WHO WUHRẸ NO?
Ẹme nọ ma ta ọ sai fiobọhọ kẹ omọfa hayo kẹe uye. U fo nọ ma re roro ziezi kpahe ẹme nọ ma gwọlọ ta, okenọ ma rẹ rọ tae, gbe oghẹrẹ nọ ma rẹ rọ tae.
Ọkiẹkpemu
-
Idhere jọ vẹ whọ sae rọ rehọ ẹmeunu ra fiobọhọ kẹ amọfa?
-
Oghẹrẹ eme vẹ u fo nọ whọ rẹ ta ha?
-
Eme ọ sai fiobọhọ kẹ omai ta eme nọ e rrọ wowou nọ e rẹ bọ amọfa ga?
KIẸ KPAHE EFA
Eme ọ rẹ sai fiobọhọ kẹ omai ta emamọ eme?
Wuhrẹ oware nọ o sai fiobọhọ kẹ owhẹ nọ whọ gbẹ rọ ta ekpehre ẹme he.
“Kọ Oware Jọ O Ginẹ Jọ Ekela Thọ?” (Uzoẹme nọ o rrọ itanẹte)
Rri epanọ whọ sae rọ whaha iguẹgu.
Se kpahe epanọ Jihova o ro fiobọhọ kẹ ọzae jọ siobọno ekela gbe iyei-iduwo.
“Me Je Roro Kpahe Oghẹrẹ Uzuazọ Nọ Me Bi Yeri” (Uwou-Eroro Na, Azie 1, 2013)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
