UWUHRẸ AVỌ 55
Fiobọhọ Evaọ Ukoko nọ Whọ Rrọ
Evaọ akpọ na soso, ima ahwo buobu a be rọ evawere gọ Jihova evaọ ikoko nọ i te idu buobu. Eware nọ a bi wuhrẹ gbe ehrẹ nọ a be kẹ ae e be were ae oma, fikiere a be rọ idhere buobu fiobọhọ evaọ ukoko na. Kọ ere who rri ukoko nọ whọ rrọ re?
1. Idhere jọ vẹ whọ sae rọ rehọ oke gbe ẹgba ra fiobọhọ evaọ ukoko na?
Mai kpobi ma sai fiobọhọ evaọ ukoko na. Wọhọ oriruo, kọ ahwo jọ a riẹ nọ a kpako no hayo nọ oma o ga tere he evaọ ukoko ra? Kọ whọ sai fiobọhọ wọ ae kpohọ iwuhrẹ? Kọ whọ sai fiobọhọ kpobọ eki kẹ ae hayo lele ai ru eware jọ evaọ uwou rai? (Se Jemis 1:27.) Ma sae jẹ fialoma via re ma ru Ọgwa Uvie mai fo jẹ rẹrotei. A rẹ gba ohwo họ ru eware nana ha. Uyoyou nọ ma wo kẹ Ọghẹnẹ gbe inievo mai o be wọ omai rọ “unevaze fialoma via.”—Olezi 110:3.
Idhere efa e riẹ nọ Isẹri Jihova nọ e họ-ame no a sai ro fiobọhọ evaọ ukoko na. Inievo-emezae nọ e be gọ Jihova ziezi a sae jọ idibo iruiruo, yọ oke o be nya na, a sae jọ ekpako ukoko. Te inievo-emezae te erọ emetẹ a sae jọ ekobaro, onọ u re ru ae rọ oke rai ta usi uwoma na ziezi. Inievo jọ a sai fiobọhọ bọ eria egagọ mai, hayo kwa kpohọ oria nọ a sae jọ fiobọhọ kẹ ukoko nọ o gwọlọ obufihọ.
2. Ẹvẹ ma sae rọ rehọ ugho gbe eware efa nọ ma wo fiobọhọ evaọ ukoko na?
Ma sae rehọ “eware eghaghae [mai] kẹ Jihova orro.” (Itẹ 3:9) Eva e be were omai nọ ma be rọ zọhọ igho mai gbe eware efa nọ ma wo ro fiobọhọ evaọ ukoko mai gbe iruo usi uwoma ota nọ ma bi ru evaọ akpọ-soso na. (Se 2 Ahwo Kọrint 9:7.) A rẹ jẹ rehọ okẹ unevaze mai fiobọhọ nọ eware okpẹtu e tẹ via. Ibuobu ahwo a re “fi oware jọ họ akotọ” nọ a rẹ rọ kẹ okẹ unevaze kẹse kẹse. (Se 1 Ahwo Kọrint 16:2.) Ma sai fi ugho unevaze họ itehe unevaze nọ e rẹ jọ eria egagọ mai hayo rehọ donate.pr418.com evaọ itanẹte ru onana. Jihova ọ kẹ omai uvẹ nọ ma rẹ rọ rehọ eware nọ ma wo ro dhesẹ nọ ma you rie.
GBE WUHRẸ EWARE EFA
Wuhrẹ kpahe idhere jọ nọ whọ sai ro fiobọhọ evaọ ukoko na.
3. Ma sae rehọ eware nọ ma wo fiobọhọ
Ohwo nọ ọ rẹ rehọ evawere kẹ okẹ, ọ rẹ were Jihova gaga, yọ ere ọ rẹ were Jesu re. Wọhọ oriruo, nọ aye-uku oyogbe jọ ọ daoma kẹ okẹ unevaze, Jesu o muẹrohọ iẹe. Se Luk 21:1-4, kẹsena wha vẹ ta ẹme kpahe enọ nana:
-
Kọ o gwọlọ nọ ma rẹ rọ igho buobu kẹ okẹ unevaze re ma te ru eva were Jihova?
-
Ẹvẹ Jihova avọ Jesu a bi rri okẹ unevaze nọ ma be kẹ?
Re whọ ruẹ eware nọ a be rọ ekẹ unevaze mai ru, kporo IVIDIO na. Kẹsena wha vẹ ta ẹme kpahe onọ nọ ọ rrọ obotọ na.
-
Oghẹrẹ vẹ a be rọ rehọ ekẹ unevaze nọ a kẹ ro fiobọhọ kẹ ikoko nọ e rrọ akpọ na soso?
4. Ma sae fialoma via re ma fiobọhọ
Evaọ oke Ebaibol, ahwo nọ a jẹ gọ Jihova a ru iruo gaga re a rẹrote eria egagọ rai. Yọ orọnọ ugho ọvo a jẹ zọhọ ze he. Se 2 Iruẹru-Ivie 34:9-11, kẹsena wha vẹ ta ẹme kpahe onọ nana:
-
Oghẹrẹ vẹ ahwo Izrẹl kpobi a ro fiobọhọ rẹrote uwou Jihova, hayo oria egagọ riẹ?
Re whọ ruẹ epanọ Isẹri Jihova a bi ro lele oriruo oke anwae yena, kporo IVIDIO na. Kẹsena wha vẹ ta ẹme kpahe enọ nọ e rrọ obotọ na.
-
Fikieme u ro wuzou re ma ru Ọgwa Uvie mai fo, jẹ ruẹrẹ eware nọ e jariẹ raha?
-
Idhere jọ vẹ whọ sai ro fiobọhọ?
5. Inievo-emezae a sae daoma re a te kẹ iruo efa
Ebaibol na ọ tuduhọ inievo-emezae awọ inọ a daoma re a rọ edhere kpobi fiobọhọ evaọ ukoko na. Re whọ ruẹ oriruo jọ, kporo IVIDIO na. Kẹsena whọ vẹ kẹ uyo onọ nọ o rrọ obotọ na.
-
Evaọ ividio na, ẹvẹ Ryan ọ rọ daoma re o fiobọhọ ziezi evaọ ukoko na?
Ebaibol na ọ fodẹ eware nọ inievo-emezae a re ru re a sai te idibo iruiruo gbe ekpako ukoko. Se 1 Timoti 3:1-13, kẹsena wha vẹ ta ẹme kpahe enọ nana:
OHWO JỌ Ọ TẸ NỌ OWHẸ NỌ: “Ẹvẹ Isẹri Jihova a be rọ ruẹ ugho ru iruo rai?”
-
Didi uyo whọ tẹ kẹe?
EME WHO WUHRẸ NO?
O rẹ were Jihova gaga nọ ma tẹ be daoma rọ oke, ẹgba, gbe eware nọ ma wo ro fiobọhọ evaọ ukoko na.
Ọkiẹkpemu
-
Ẹvẹ ma sae rọ rehọ oke gbe ẹgba mai fiobọhọ evaọ ukoko na?
-
Ẹvẹ ma sae rọ rehọ ugho gbe eware efa nọ ma wo fiobọhọ evaọ ukoko na?
-
Oghẹrẹ vẹ whọ rọ gwọlọ fiobọhọ evaọ ukoko na?
KIẸ KPAHE EFA
Kọ Ọghẹnẹ ọ gbẹ gwọlọ nọ ahwo nọ a be gọe a rẹ wha abọvo abakpe? Se oware nọ Ebaibol na ọ ta.
“Eme Ebaibol na Ọ Ta Kpahe Okẹ Abọvo Abakpe?” (Uzoẹme nọ o rrọ itanẹte)
U wo iruo nọ Ebaibol na ọ ta nọ ezae nọ e họ-ame no i re ru. Rekọ, ẹvẹ o rẹ jọ nọ o tẹ gbahọ nọ aye nọ ọ họ-ame no o re ru iruo na.
Rri epanọ inievo-emezae jọ nọ e gudu ziezi a be daoma te re a wha ebe ukoko na te inievo efa obọ.
Se kpahe epanọ ma be rọ ruẹ ugho ru iruo mai, onọ u wo ohẹriẹ gaga no egagọ efa.
“Ẹvẹ Wha be rọ Ruẹ Ugho Ru Iruo Usiuwoma Ota Rai?” (Uzoẹme nọ o rrọ itanẹte)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
