UWUHRẸ AVỌ 56
Ru Epanọ Okugbe Ọ rẹ rọ Jọ Ukoko Na
Nọ ma tẹ rrọ kugbe ahwo nọ ma gbẹ be gọ Jihova, oma o rẹ jọ omai wọhọ epanọ o jọ Devidi ovie na okenọ ọ ta nọ: “Rri! U woma jẹ were kẹhẹ re inievo e rria kugbe evaọ okugbe!” (Olezi 133:1) Orọnọ igheghe ma ro wo okugbe he. Mai omomọvo ma be daoma re okugbe nana ọ jariẹ.
1. Eme whọ rẹ ruẹ evaọ udevie ahwo Ọghẹnẹ?
Otẹrọnọ who kpohọ ewuhrẹ ukoko evaọ orẹwho ofa, udu u re te owhẹ otọ o tẹ make rọnọ who bi yo ẹvẹrẹ nọ a be ta ha. Fikieme? Keme oghẹrẹ ebe evona ma bi ro wuhrẹ Ebaibol na evaọ oria kpobi. Yọ ma rẹ daoma dhesẹ uyoyou kẹ ohwohwo. Ghelọ oria nọ ma be rria kẹhẹ, mai kpobi ma bi “se odẹ Jihova, re [ma] gọe evaọ okugbe.”—Zẹfanaya 3:9, ẹme-obotọ.
2. Eme whọ rẹ sai ru re okugbe ọ gbẹ jariẹ?
“Wha you ohwohwo gaga no udu ze.” (1 Pita 1:22) Ẹvẹ ma sai ro ru lele ohrẹ yena? Ma re muẹrohọ iruemu iwoma amọfa viukpenọ ma rẹ tẹrovi eware nọ e be thọ ae obọ. Ma rẹ daoma riẹ oghẹrẹ ahwo kpobi nọ a rrọ ukoko na viukpenọ ma rẹ nya usu kugbe ahwo nọ a re ru eware nọ e were omai ọvo. Ma re wo uruemu omagbẹre vievie he, nọ ma re ro rri ahwo uyẹ jọ nọ a woma ha.—Se 1 Pita 2:17. a
3. Eme who ti ru nọ whẹ avọ ibe Oleleikristi ra jọ wha te wo ẹwhọ?
O make rọnọ ma wo okugbe na, mai yọ ahwo nọ a gba ha. Ẹsejọ ma re ru ohwohwo thọ. Fikiere, Ẹme Ọghẹnẹ ọ vuẹ omai nọ ma “[hae] . . . rọvrẹ ohwohwo.” O te fibae nọ: “Wọhọ epanọ Jihova ọ rọvrẹ owhai riẹriẹriẹ na, wha re ru epọvo na hrọ re.” (Se Ahwo Kọlọsi 3:13.) Ma re ru Jihova eva dha unuẹse buobu, rekọ ọ rẹ rọvrẹ omai. Fikiere o rẹro mi omai re nọ ma rẹ rọvrẹ inievo mai. Whọ tẹ ruẹ nọ who ru ohwo jọ eva dha, daoma nyabru ohwo na re wha ku ẹme na họ.—Se Matiu 5:23, 24. b
GBE WUHRẸ EWARE EFA
Roro kpahe eware nọ whọ rẹ sai ru re okugbe gbe udhedhẹ e gbẹ sae jọ ukoko na.
Eme who ti ru re whọ ruẹrẹhọ kugbe oniọvo ra?
4. Who mukpahe ahwo uyẹ ofa hayo ahwo nọ a wo ohẹriẹ no owhẹ hẹ
Ma gwọlọ you inievo mai kpobi. Rekọ o sae jọnọ o rrọ bẹbẹ kẹ omai re ma you ohwo jọ nọ o wo ohẹriẹ no omai. Eme ọ sai fiobọhọ kẹ omai? Se Iruẹru Ikọ 10:34, 35, kẹsena wha vẹ ta ẹme kpahe enọ nana:
-
Jihova ọ rọwo nọ oghẹrẹ ahwo kpobi a jọ Isẹri riẹ. Ẹvẹ u fo nọ oyena o rẹ lẹliẹ owhẹ rri amọfa nọ a wo ohẹriẹ no owhẹ?
-
Oghẹrẹ vẹ ahwo nọ a rrọ oria ra a bi ro dhesẹ nọ a mukpahe amọfa? Kọ eme who re ru re whọ gbẹ rọ aro kele ai hi?
Se 2 Ahwo Kọrint 6:11-13, kẹsena wha vẹ ta ẹme kpahe onọ nana:
-
Eme whọ rẹ sai ru re who gbe you inievo-emezae gbe erọ emetẹ na kpobi ziezi?
5. Rọvrẹ omọfa riẹriẹriẹ jẹ ruẹrẹhọ kugbei
Jihova ọ be rọvrẹ omai riẹriẹriẹ, dede nọ u ti wo ẹdẹvo nọ ma te rọvrẹ riẹ hẹ. Se Olezi 86:5, kẹsena wha vẹ ta ẹme kpahe enọ nana:
-
Ẹvẹ Jihova ọ rẹ rọvrẹ te?
-
Fikieme o rọ were owhẹ nọ ọ rẹ rọvrẹ?
-
Eware vẹ e rẹ sai ru ei jọ bẹbẹ re ma riẹ yeri kugbe amọfa?
Ẹvẹ ma sae rọ rehọ aro kele Jihova, ma vẹ gbẹ jọ okugbe ọvo kugbe inievo mai kpobi? Se Itẹ 19:11, kẹsena wha vẹ ta ẹme kpahe onọ nana:
-
Nọ ohwo jọ o te ru owhẹ eva dha hayo ru owhẹ thọ, eme whọ rẹ sai ru re wha ruẹrẹhọ?
Ẹsejọ ma re ru amọfa eva dha. Nọ o tẹ via ere, eme u fo nọ ma re ru? Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Evaọ ividio na, eme oniọvo-ọmọtẹ na o ru re udhedhẹ o jariẹ?
6. Roro kpahe iruemu iwoma nọ inievo ra a wo
Ma tẹ kẹle inievo mai ziezi, ma rẹ riẹ emamọ iruemu nọ a wo jẹ riẹ eria nọ a be jọ ru te he. Ẹvẹ ma sae rọ tẹrovi emamọ iruemu rai? Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Eme ọ rẹ sai fiobọhọ kẹ owhẹ ruẹ emamọ iruemu inievo-emezae gbe emetẹ ra?
Iruemu iwoma mai Jihova ọ be tẹrovi. Se 2 Iruẹru-Ivie 16:9a, kẹsena wha vẹ ta ẹme kpahe onọ nana:
-
Kọ eva e were owhẹ nọ whọ rọ riẹ nọ iruemu iwoma mai Jihova ọ be tẹrovi?
Edaemọno nọ ọ maki wo erru gaga o re wo eka jọ nọ i woma ha, ghele na, ọ rrọ ghaghae. Ere ọvona re, dede nọ mai kpobi ma gba ha na, ma rrọ ghaghae kẹ Jihova ghele
AHWO JỌ A RẸ TA NỌ: “Taure mẹ tẹ rọvrẹ ohwo, ohwo na ọ rẹ lẹ omẹ tao.”
-
Fikieme ma rẹ rọvrẹ amọfa nọ a gbẹ make lẹ omai tao ho?
EME WHO WUHRẸ NO?
Whọ tẹ be rọvrẹ amọfa je bi dhesẹ uyoyou kẹ inievo na kpobi whọ sae rọ ere ru okugbe gbẹ jọ ukoko na.
Ọkiẹkpemu
-
Eme who re ru re who gbe mukpahe ahwo jọ họ?
-
Eme who ti ru otẹrọnọ whẹ avọ Oleleikristi ọfa wha wo ẹwhọ?
-
Fikieme whọ rọ gwọlọ rọ aro kele Jihova rọvrẹ amọfa?
KIẸ KPAHE EFA
Wuhrẹ kpahe epanọ ọtadhesẹ Jesu jọ o sai ro fiobọhọ kẹ omai nọ ma gbe gu amọfa ẹdhọ họ.
Kọ o gwọlọ nọ ma re wounu ghele nọ ma tẹ maki roro nọ ma ru oware ovo thọ họ?
“Unu-Uwou—Owojẹ nọ U re Su Kpohọ Udhedhẹ” (Uwou-Eroro Na, Akpegbọvo 1, 2002)
Rri epanọ ahwo jọ a ro wuhrẹ re a gbe kienyẹ ohwo ọvo ho
Se kpahe epanọ whọ sai ro ku ẹwhọ nọ whẹ avọ ohwo jọ wha wo họ taure o tẹ te raha udhedhẹ ukoko na.
a Ẹme-oruvẹ avọ 6 o ta kpahe epanọ uyoyou u re ro fiobọhọ kẹ Ileleikristi nọ a gbẹ rọ wha ẹyao nọ o re vo fihọ amọfa ha.
b Ẹme-oruvẹ avọ 7 o ta kpahe epanọ a sai ro ku ẹme nọ o kiekpahe iruo, ekiọthuọ, gbe uzi egọmeti họ.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
