UWUHRẸ AVỌ 57
Eme Who re Ru Otẹrọnọ Whọ Raha Uzi Ulogbo Jọ?
O make rọnọ who you Jihova gaga jẹ be daoma re who gbe ru oware ovo nọ o rẹ dhae eva ha na, u ti wo ẹsejọ nọ eware e te thọ owhẹ obọ. Rekọ izieraha jọ i yoma vi izieraha jọ. (1 Ahwo Kọrint 6:9, 10) Otẹrọnọ whọ raha uzi ulogbo jọ, kareghẹhọ nọ Jihova o gbe you owhẹ ghele; ọ gwọlọ nọ ọ rẹ rọvrẹ owhẹ je fiobọhọ kẹ owhẹ.
1. Eme ma re ru hrọ re Jihova ọ sae rọvrẹ omai?
O rẹ da ahwo nọ a you Jihova gaga nọ a tẹ raha uzi ulogbo jọ. Rekọ oma o rẹ sasa ae nọ a tẹ kareghẹhọ eyaa nọ Jihova ọ ya kẹ ahwo riẹ inọ: “Dede nọ izieraha rai e rrọ wawae, a ti ru ai jọ fuafo wọhọ ekpalekpa-ame.” (Aizaya 1:18) Ma te kurẹriẹ no eva ze, Jihova ọ rẹ rọvrẹ omai riẹriẹriẹ. Eme ma re ru ro dhesẹ nọ ma kurẹriẹ no? Oware nọ ma ruthọ na o rẹ da omai gaga, ma vẹ siọ iẹe ba, jẹ lẹ se Jihova re ọ rọvrẹ omai. Kẹsena ma vẹ daoma gaga re ma nwene ekpehre iroro hayo uruemu nọ o lẹliẹ omai raha uzi na, ma vẹ jẹ daoma koko izi Jihova nọ e rrọ fuafo na.—Se Aizaya 55:6, 7.
2. Ẹvẹ Jihova ọ rẹ rọ rehọ ekpako na fiobọhọ kẹ omai nọ ma tẹ raha uzi?
Nọ ma tẹ raha uzi ulogbo, Jihova ọ ta kẹ omai nọ ma “se ekpako ukoko na.” (Se Jemis 5:14, 15.) Ezae nana nọ a ro mu na a you Jihova gbe igodẹ riẹ. A rẹ sai fiobọhọ kẹ omai ruẹrẹ usu mai họ kugbe Jihova.—Ahwo Galesha 6:1.
Ẹvẹ ekpako na a re ro fiobọhọ kẹ omai nọ ma tẹ raha uzi ulogbo? Ekpako ivẹ hayo esa a rẹ rehọ Ebaibol na rọ kpọ omai họ. A rẹ jẹ tuduhọ omai awọ jẹ kẹ omai ehrẹ nọ i re fiobọhọ kẹ omai nọ ma gbẹ wariẹ raha uzi na ha. Otẹrọnọ ohwo nọ ọ raha uzi ulogbo ọ gbẹ rọwo kurẹriẹ hẹ, ekpako na a re si ei no ukoko re ọ gbẹ wha ekpehre uruemu na fihọ amọfa ha.
GBE WUHRẸ EWARE EFA
Wuhrẹ ziezi kpahe epanọ Jihova o re ro fiobọhọ kẹ omai nọ ma tẹ raha uzi ulogbo, gbe epanọ who re ro dhesẹ nọ o da owhẹ ẹro.
3. Ma tẹ feva izieraha mai, u re ru omai wariẹ wo emamọ usu kugbe Jihova
Uzi kpobi nọ ma raha o rẹ dha Jihova eva, fikiere ma rẹ feva kẹe. Se Olezi 32:1-5, kẹsena wha vẹ ta ẹme kpahe onọ nana:
-
Fikieme u ro woma re ma feva izieraha mai kẹ Jihova ukpenọ ma rẹ ko ai dhere?
U te no Jihova nọ ma rẹ feva kẹ no, ma rẹ vuẹ ekpako na re a fiobọhọ kẹ omai, yọ onana o rẹ wha omosasọ se omai. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Evaọ ividio na, ẹvẹ ekpako na a ro fiobọhọ kẹ Canon zihe bru Jihova ze?
U fo nọ ma rẹ ko oware ovo dhere ekpako na ha, ma rẹ ta uzẹme na kpobi kẹ ae, keme obọ a gwọlọ fihọ kẹ omai. Se Jemis 5:16, kẹsena wha vẹ ta ẹme kpahe onọ nana:
-
Ma tẹ ta uzẹme na kpobi kẹ ekpako na, ẹvẹ o sai ro ru ei lọhọ kẹ ae re a fiobọhọ kẹ omai?
Feva izieraha ra, ta uzẹme na kpobi kẹ ekpako na, re whọ jẹ obufihọ Jihova rehọ
4. Jihova ọ rẹ re ohrọ erahaizi
Nọ ohwo nọ ọ raha uzi ulogbo ọ gbẹ rọwo kurẹriẹ hẹ, a re si ei no ukoko na, yọ ma re gbe lele ohwo na nyusu hayo re da kugbe he. Se 1 Ahwo Kọrint 5:6, 11, kẹsena wha vẹ ta ẹme kpahe onọ nana:
-
Wọhọ epanọ ẹvi o re ru ukulu ebrẹdi fu na, ẹvẹ o sai ro gbe ukoko na ku nọ ma te bi kuomagbe hayo nyusu kugbe ọrahauzi nọ ọ rọwo kurẹriẹ hẹ?
Ekpako ukoko a rẹ rọ aro kele Jihova dhesẹ ohrọ-oriọ kẹ ahwo nọ a raha uzi. A rẹ daoma nyate ahwo nọ a si no ukoko oma, a ve fiobọhọ kẹ ai. Ahwo buobu nọ a si no ukoko a zihe ze no fikinọ ọwhọkuo nọ a kẹ rai na o ru rai bru oma kpiroro, dede nọ o rẹ da.—Olezi 141:5.
Ẹvẹ oghẹrẹ nọ Jihova o re ru ahwo nọ a raha uzi u ro dhesẹ nọ o wo ororokẹ gbe ohrọ-oriọ, ọ tẹ jẹ rrọ yoyou?
5. Jihova ọ rẹ rọvrẹ omai nọ ma te kurẹriẹ
Jesu ọ kẹ oriruo jọ ro dhesẹ epanọ o rẹ jọ kẹ Jihova nọ ohwo o te kurẹriẹ. Se Luk 15:1-7, kẹsena wha vẹ ta ẹme kpahe onọ nana:
-
Eme onana u wuhrẹ owhẹ kpahe Jihova?
Se Izikiẹl 33:11, kẹsena wha vẹ ta ẹme kpahe onọ nana:
-
Eme ohwo o re ru hrọ ro dhesẹ nọ o kurẹriẹ no?
Wọhọ othuru-igodẹ, Jihova o rri igodẹ riẹ ghaghae gaga
AHWO JỌ A RẸ TA NỌ: “Ozọ u bi mu omẹ nọ mẹ tẹ vuẹ ekpako na uzi nọ mẹ raha, a ti si omẹ no ukoko.”
-
Eme whọ rẹ ta kẹ ohwo nọ o bi roro ere?
EME WHO WUHRẸ NO?
Otẹrọnọ ma raha uzi ulogbo rekọ ma je kurẹriẹ jẹ gbaemu nọ ma re gbe ru oware uyoma na ha, Jihova ọ rẹ rọvrẹ omai.
Ọkiẹkpemu
-
Fikieme u ro woma re ma feva izieraha mai kẹ Jihova?
-
Eme o gwọlọ nọ ma re ru re Jihova ọ sae rọvrẹ omai?
-
Otẹrọnọ ma raha uzi ulogbo, fikieme u ro fo nọ ma nyabru ekpako na re a fiobọhọ kẹ omai?
KIẸ KPAHE EFA
Rri epanọ Jihova o ro dhesẹ ohrọ-oriọ kẹ ọzae jọ wọhọ epanọ ọ ta evaọ obe Aizaya 1:18.
Ẹvẹ ukoko nọ a re si ohwo no u re ro fiobọhọ kẹ ukoko na soso?
“Epanọ A Sae rọ Re Ohrọ Ohwo nọ Ọ Raha Uzi je Dhesẹ nọ A You Rie” (Uwou-Eroro Na, Aria 2024)
Se kpahe epanọ whọ sae rọ vuẹ omọfa nọ ọ rrọ ukoko na ha kpahe oware nọ u dhesẹ re a si ohwo no ukoko.
“Epanọ A Sae rọ Re Ohrọ Ohwo nọ Ọ Raha Uzi je Dhesẹ nọ A You Rie” (Uwou-Eroro Na, Aria 2024)
Jọ iku nọ uzoẹme riẹ o ta nọ “Me re zihe bru Jihova,” se kpahe oware nọ ọzae jọ nọ o ghoro no ukoko no vẹre ọ rọ ta nọ Jihova o si rie zihe ze.
“Ebaibol Na O Re Nwene Uzuazọ Ohwo” (Uwou-Eroro Na, Ane 1, 2012)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
