UWUHRẸ AVỌ 60
Gbẹ Hai Wo Ẹnyaharo
Who wuhrẹ eware buobu kpahe Jihova no evaọ uwuhrẹ Ebaibol nana. Yọ ẹsejọhọ whọ roma mudhe kẹe jẹ họ-ame no fikinọ eware nọ who wuhrẹ na i ru owhẹ you rie gaga. Otẹrọnọ who ri ru ere he, o sae jọnọ who bi roro kpahe epanọ who ti ro ru ere kẹle na. Rekọ orọnikọ nọ whọ tẹ họ-ame no yọ whọ nyaharo ba no ho. Who re ru epanọ who re gbe ro si kẹle Jihova bẹdẹ bẹdẹ. Ẹvẹ whọ sai ro ru ere?
1. Fikieme who re gbe ro ru re usu ra kugbe Jihova o jọ gaga?
O gba omai họ nọ ma rẹ daoma gaga re ma gbe ru usu mai kugbe Jihova jọ gaga. Fikieme? “Re ma gbe su vrẹ vievie” se iẹe ba ha. (Ahwo Hibru 2:1) Eme ọ rẹ sai fiobọhọ kẹ omai re ma gbẹ gọ Jihova ziezi? Ma re duomahọ iruo usi uwoma ota na ziezi jẹ gwọlọ idhere efa nọ ma sai ro wobọ ziezi evaọ egagọ Ọghẹnẹ. (Se Ahwo Filipai 3:16.) Jihova nọ ma rẹ gọ họ uzuazọ nọ o mai woma kpaobọ!—Olezi 84:10.
2. Eme ọfa whọ rẹ gbẹ hai ru?
O make rọnọ uwuhrẹ Ebaibol nana u bi kuhọ no na, who ti gbe yeri uzuazọ nọ u fo nọ Oleleikristi o re yeri. Ebaibol na ọ ta nọ ma “whẹ uruemu okpokpọ na họ oma.” (Ahwo Ẹfisọs 4:23, 24) Nọ who gbe bi wuhrẹ Ẹme Ọghẹnẹ je bi kpohọ iwuhrẹ ukoko na, who ti wuhrẹ eware ekpokpọ kpahe Jihova gbe iruemu riẹ. Hae daoma rọ aro kele iruemu riẹ ziezi evaọ uzuazọ ra. Hai nwene uruemu kpobi nọ whọ ruẹ nọ u woma ha re whọ sai ru Jihova eva were.
3. Ẹvẹ Jihova o ti ro fiobọhọ kẹ owhẹ re who gbe wo ẹnyaharo?
Ebaibol na ọ ta nọ: “Ọghẹnẹ . . . o ti wuhrẹ owhai totọ. O ti ru owhai ga, o ti ru owhai dikihẹ ga, o ti ru owhai dowọ muotọ ziezi.” (1 Pita 5:10) Edawọ i bi te omai kpobi. Rekọ Jihova o bi fiobọhọ kẹ omai nọ ma gbe bi ro kie kẹ ai hi. (Olezi 139:23, 24) Ọ ya eyaa nọ ọ te kẹ owhẹ isiuru na gbe ogaga nọ whọ rẹ rọ gọe ziezi.—Se Ahwo Filipai 2:13.
GBE WUHRẸ EWARE EFA
Wuhrẹ kpahe epanọ whọ sai gbe ro wo ẹnyaharo gbe epanọ Jihova ọ te rọ ghale owhẹ.
4. Hai lele Ogbẹnyusu ra nọ ọ mae kpekpe owhẹ oma na ta ẹme jẹ gaviezọ kẹe
Olẹ gbe Ebaibol na nọ who bi wuhrẹ i fiobọhọ kẹ owhẹ zihe ruọ ogbẹnyusu Jihova no. Kọ ẹvẹ eware nana evona e sai ro fiobọhọ kẹ owhẹ si kẹle iẹe vi epaọ anwẹdẹ?
Se Olezi 62:8, kẹsena wha vẹ ta ẹme kpahe onọ nana:
-
Re who ru usu ra kugbe Jihova ga ziezi, ẹvẹ whọ sai ro ru elẹ ra woma vi epaọ anwẹdẹ?
Se Olezi 1:2 gbe ẹme-obotọ riẹ, kẹsena wha vẹ ta ẹme kpahe onọ nana:
-
Re who ru usu ra kugbe Jihova ga ziezi, ẹvẹ whọ sai ro ru isase Ebaibol ra woma vi epaọ anwẹdẹ?
Eme whọ rẹ sai ru re who wo erere no uwuhrẹ omobọ ra ze ziezi? Re whọ ruẹ eware jọ, kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Eware jọ vẹ a ta evaọ ividio na nọ whọ rẹ sai ru?
-
Izoẹme vẹ whọ gwọlọ nọ who re wuhrẹ kpahe?
5. Fi itee họ evaọ egagọ Jihova
Who te fi itee họ evaọ egagọ Jihova, u ti fiobọhọ kẹ owhẹ gbe wo ẹnyaharo. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Evaọ ividio nana, ẹvẹ itee nọ Cameron o fihọ evaọ egagọ Jihova u ro fiobọhọ kẹe?
Orọnikọ ohwo kpobi ọ rẹ sae kwa kpohọ orẹwho ofa fiki usi uwoma ota ha. Rekọ mai kpobi ma sai fi itee họ nọ ma re le tobọ evaọ ukoko na. Se Itẹ 21:5, kẹsena who ve roro kpahe eware nọ whọ sae ma omaa rai nọ who ti ru . . .
-
evaọ ukoko na.
-
evaọ usi uwoma ota na.
Ẹvẹ ẹme nọ ọ rrọ oria ikere nana ọ sai ro fiobọhọ kẹ owhẹ le itee ra tobọ?
Itee jọ nọ whọ rẹ sai fihọ
-
Ru elẹ ra woma vi epaọ anwẹdẹ.
-
Se Ebaibol na soso re.
-
Daoma riẹ ahwo kpobi nọ wha gbẹ rrọ ukoko.
-
Mu Ebaibol họ ewuhrẹ kugbe ohwo jọ.
-
Ru ọkobaro obufihọ hayo ọkobaro oke-kpobi.
-
Otẹrọnọ whẹ yọ oniọvo-ọmọzae, daoma re who te odibo oruiruo.
6. Reawere uzuazọ bẹdẹ bẹdẹ!
Se Olezi 22:26, kẹsena wha vẹ ta ẹme kpahe onọ nana:
-
Eme whọ rẹ sai ru re whọ reawere uzuazọ enẹna gbe bẹdẹ bẹdẹ?
EME WHO WUHRẸ NO?
Gbẹ hai ru re usu ra kugbe Jihova o jọ gaga, who ve je fi itee họ nọ who re le evaọ egagọ Jihova. Kẹsena whọ vẹ te reawere uzuazọ bẹdẹ bẹdẹ!
Ọkiẹkpemu
-
Fikieme o sai ro mu owhẹ ẹro nọ Jihova o ti fiobọhọ kẹ owhẹ gọe ziezi?
-
Eme who re ru re usu ra kugbe Jihova o jọ gaga?
-
Ẹvẹ itee nọ who re fihọ evaọ egagọ Jihova e sai ro fiobọhọ kẹ owhẹ wo ẹnyaharo?
KIẸ KPAHE EFA
Ovẹ o rẹ mae were Jihova, okpoware jọ nọ ma re ru ẹsiẹvo evaọ egagọ riẹ manikọ oke uzuazọ mai kpobi nọ ma rẹ rọ gọe?
Eware jọ e sae via nọ i re ru makọ ohwo nọ ọ be gọ Jihova ziezi nọ o gbe ro wo evawere he. Rri epanọ ọ sae rọ wariẹ wo evawere.
Ẹvẹ whọ sai ro fi itee họ evaọ ukoko na, who ve je le ai tobọ?
“Ma Omaa Eware nọ Who re Ru Evaọ Egagọ Ọghẹnẹ re Whọ Wha Orro Sei” (Uwou-Eroro Na, Ahrẹ 15, 2004)
Fikieme u ro wuzou re whọ jọ Oleleikristi nọ ọ kpako ziezi, kọ ẹvẹ whọ sai ro ru ei?
“Joma Kpako Evaọ Abọ-Ẹzi Keme ‘Ẹdẹ Ologbo Ọnowo Na Ọ Kẹle I No’” (Uwou-Eroro Na, Asoi 15, 2009)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
