UWUHRẸ AVỌ 02
Ebaibol na O re Ru Ohwo Wo Ẹruore
Ahwo buobu wariẹ akpọ na họ a wo ebẹbẹ sa-sa nọ e be lẹliẹ ae jọ ọkọkora, be ruawa, jẹ tubẹ ruẹ uye edada dede. Kọ oware jọ o via kẹ owhẹ no ẹdẹ jọ nọ o lẹliẹ oma jọ owhẹ ere? Ẹsejọhọ o sae jọnọ whọ be ruẹ uye fiki ẹyao hayo fiki ohwo jọ nọ o whu ku owhẹ. O tẹ lẹliẹ owhẹ nọ whọ be hae rọ nọ omara nọ, ‘Kọ akpọ na o ti woma vi enẹ ẹdẹ jọ?’ Ebaibol na ọ kẹ uyo nọ o rẹ sae lẹliẹ udu te owhẹ otọ.
1. Ẹruore vẹ Ebaibol na o ru omai wo?
Ebaibol na ọ fodẹ oware nọ ebẹbẹ e rọ da akpọ na fia, ọ tẹ jẹ vuẹ omai emamọ usi jọ inọ ebẹbẹ nọ ma wo na kpobi yọ eware ubroke, i ti no otọ no kẹle. Eyaa nọ e rrọ Ebaibol na e sai ru owhẹ rẹro nọ ‘eware i ti woma evaọ obaro je ru owhẹ wo ẹruore.’ (Se Jerimaya 29:11, 12.) Eyaa nana e rẹ sai fiobọhọ kẹ omai thihakọ ebẹbẹ nọ ma wo obọnana, rẹro nọ eware i ti woma, je wo evawere nọ e rẹ jọ bẹdẹ bẹdẹ.
2. Ẹvẹ Ebaibol na ọ ta nọ akpọ na ọ te jọ evaọ obaro?
Ebaibol na o dhesẹ nọ evaọ obaro kẹle na “uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.” (Se Eviavia 21:4.) Ebẹbẹ kpobi nọ i ru akpọ na rrọ bẹbẹ nẹnẹ na, e gbẹ te jọ ofa ha, ebẹbẹ wọhọ uvuhu, okienyẹ, ẹyao, gbe uwhu. Ebaibol na ọ ya eyaa nọ ahwo-akpọ a te rria Aparadase evaọ otọakpọ na, yọ a te reawere uzuazọ bẹdẹ bẹdẹ.
3. Ẹvẹ o sai ro mu owhẹ ẹro nọ eyaa nọ e rrọ Ebaibol na i ti rugba?
Ahwo buobu a bi rẹro emamọ eware nọ e te via, rekọ u mu rai ẹro ho sọ eware nọ a bi rẹro rai na e te ginẹ via ẹdẹ jọ. Rekọ o sai mu omai ẹro nọ eyaa Ebaibol na i ti rugba. Re ma sai fievahọ eyaa nana ziezi, o gwọlọ nọ ma rẹ “romatotọ kiẹ Ikereakere na riwi.” (Iruẹru Ikọ 17:11) Fikiere nọ who bi wuhrẹ Ebaibol na, whẹ ọvo whọ te sae jiroro kẹ omara sọ who re fievahọ oware nọ Ebaibol na ọ ta kpahe obaro na.
GBE WUHRẸ EWARE EFA
Wuhrẹ kpahe eware jọ nọ Ebaibol na ọ ya eyaa nọ e te via evaọ obaro. Jẹ ruẹ epanọ ẹruore nọ ọ rrọ Ebaibol na o bi ro fiobọhọ kẹ ahwo nẹnẹ.
4. Ebaibol na ọ ya eyaa nọ ma te rria otọakpọ na bẹdẹ bẹdẹ ababọ uye-oruẹ
Rri eyaa sa-sa nọ a fodẹ evaọ Ebaibol na nọ e rrọ obotọ na. Evẹ e mae were owhẹ evaọ usu rai na? Kọ fikieme?
Se oria Ebaibol nọ a fodẹ kẹle eyaa nana, kẹsena wha vẹ ta ẹme kpahe enọ nana:
-
Kọ who roro nọ eria Ebaibol nana i ru owhẹ wo ẹruore? Kọ who roro nọ ahwo uviuwou gbe egbẹnyusu ra a te wuhrẹ eware nana, o sae lẹliẹ ai wo ẹruore re?
Dai roro epanọ o te jọ nọ whọ tẹ be rria akpọ nọ
|
OHWO ỌVO Ọ TE JỌ . . . |
OHWO KPOBI . . . |
|---|---|
|
|
|
|
|
|
|
|
|
|
5. Eyaa nọ e rrọ Ebaibol na e rẹ sae lẹliẹ owhẹ kru udu ga je wo evawere
Oma o be lọhọ ahwo buobu nẹnẹ yọ ofu o bi tube dhe ejọ dede fiki eware iyoma nọ e be via. O tẹ lẹliẹ ejọ be gwọlọ họre re a sai nwene eware. Rekọ eyaa nọ Ebaibol na ọ ya nọ eware i ti woma na u bi fiobọhọ kẹ ahwo enẹna, rri epanọ onana o rọ rrọ ere. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Evaọ ividio na, oware okienyẹ vẹ o jẹ kẹ Rafika uye?
-
Dede nọ okienyẹ nọ ọ ruẹ evaọ oke yena u no otọ họ, ẹvẹ Ebaibol na o ro fiobọhọ kẹe?
Ẹruore nọ Ebaibol na ọ kẹ kpahe obaro na, o sai fiobọhọ kẹ omai nọ oma o gbẹ rọ lọhọ omai no ho, u ve je ru nọ ma re ro thihakọ ebẹbẹ mai wowoma. Se Itẹ 17:22 gbe Ahwo Rom 12:12, kẹsena wha vẹ ta ẹme kpahe enọ nana:
-
Kọ who roro nọ whọ tẹ rọwo oware nọ Ebaibol na ọ ta kpahe obaro na, o sai ru uzuazọ ra woma vi epanọ o rrọ anwẹdẹ? Fikieme whọ rọ ta ere?
AHWO JỌ A RẸ TA NỌ: “Eware nọ Ebaibol na ọ ta nọ e te via evaọ obaro na e sae via vievie he.”
-
Fikieme who ro roro nọ u wuzou re whẹ omara whọ kiẹ kpahe oware nọ ma sae rọ rọwo eyaa na?
EME WHO WUHRẸ NO?
Ebaibol na ọ ya eyaa emamọ eware buobu nọ ma te reawere rai evaọ obaro, yọ onana o sai fiobọhọ kẹ omai thihakọ avọ evawere enẹna.
Ọkiẹkpemu
-
Fikieme o rọ gwọlọ nọ ahwo a rẹ riẹ kpahe eyaa nọ e rrọ Ebaibol na?
-
Eware vẹ Ebaibol na ọ ta nọ e te via evaọ obaro na?
-
Ẹvẹ ẹruore inọ eware i ti woma evaọ obaro na o sai ro fiobọhọ kẹ owhẹ enẹna?
KIẸ KPAHE EFA
Gbe wuhrẹ kpahe epanọ ẹruore o sai ro fiobọhọ kẹ owhẹ nọ who te wo ebẹbẹ.
Ruẹ epanọ ẹruore inọ eware i ti woma evaọ obaro o rẹ sai ro fiobọhọ kẹ ahwo nọ a be mọ okpẹyao.
“Ohwo nọ Ọ be Mọ Okpẹyao—Kọ Ebaibol na Ọ sai Fiobọhọ Kẹe?” (Uzoẹme nọ o rrọ itanẹte)
Nọ who ti rri ividio ile nana, daoma ruẹ omara avọ ahwo uviuwou ra nọ wha be rria Aparadase nọ Ebaibol na ọ ya eyaa riẹ na.
Se kpahe epanọ uzuazọ ohwo nọ ọ jẹ họre kẹ epanọ akpọ na o re ro woma u ro nwene nọ o wuhrẹ kpahe eyaa nọ e rrọ Ebaibol na kpahe obaro na.
“Enẹna Me Gbe Bi Roro Nọ Me Ti Nwene Eware He” (Uwou-Eroro Na, Ahrẹ 1, 2013)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
