1, 2. Eme Sọl ọ jẹ nyai ru evaọ obọ Damaskọs?

 EZAE jọ nọ ofu o bi dhe gaga a rrọ edhere bi kpobọ Damaskọs. Iroro imuomu e be wọ ae nya, yọ a kẹle obei no. A ti si ilele Jesu no iwou rai ze, gba ae, ru ai oma vo, je si rai kpobọ Jerusalẹm re ogbẹgwae Sanhẹdrin o jọ obei kẹ ai uye.

² Ọzae nọ a re se Sọl nọ o wuzou rai ọ jọ usu ahwo nọ a kpe ọzae jọ nọ a re se Stivin kẹle na. a Okenọ a jẹ rọ itho fi Stivin nọ ọ jọ olele Jesu nọ o wo ẹrọwọ ziezi, Sọl ọ rọwo fihọ iẹe. (Iruẹru 7:57–8:1) Ukpokpoma nọ ọ jẹ kẹ ilele Jesu evaọ Jerusalẹm o vọ riẹ eva ha, o te mu ilele na họ ẹgwọlọ evaọ ikpẹwho efa re o kpokpo ai re. Ọ gwọlọ nọ o re si utu egagọ nọ a je se “Edhere Na” notọ, onọ ahwo a rri fihọ ekpehre ahwo.—Iruẹru 9:1, 2; rri ẹkpẹti na “ Epanọ Sọl O ro Wo Udu nọ O re ro Mu Ahwo Evaọ Damaskọs.”

3, 4. (a) Eme ọ via kẹ Sọl? (b) Kọ enọ vẹ ma te ta ẹme kpahe?

³ Ẹsiẹvo na, elo ọgaga jọ o te lo ruru Sọl. Ezae nọ a gbẹ jọ usu na a ruẹ elo na, akpọ o te gbe ai unu, a gbẹ riẹ ẹme nọ a rẹ ta ha. Elo ọgaga na ọ lẹliẹ Sọl tuaro, o te kie fihọ otọ. Kẹsena o te yo urru jọ nọ u do no obọ odhiwu ze nọ o ta nọ: “Sọl, Sọl, fikieme who bi ro kpokpo omẹ?” Sọl ọ tẹ nọ avọ ozọ nọ: “Whẹ yọ ono, Olori?” Uyo nọ a kẹ Sọl u gbe rie unu gaga, urru na o ta kẹe nọ: “Mẹ yọ Jesu, ọnọ who bi kpokpo na.”—Iruẹru 9:3-5; 22:9.

⁴ Eme ma rẹ sai wuhrẹ no eme ọsosuọ nọ Jesu ọ ta kẹ Sọl ze? Ẹvẹ o sai ro fiobọhọ kẹ omai nọ ma te wuhrẹ kpahe eware nọ e via evaọ okenọ Sọl o ro kurẹriẹ? Nọ Sọl o kurẹriẹ no, eme ma rẹ sai wuhrẹ evaọ oware nọ ukoko na u ru okenọ a wo udhedhẹ no?

5, 6. Eme ma wuhrẹ no eme nọ Jesu ọ ta kẹ Sọl na ze?

⁵ Okenọ Jesu ọ da Sọl ji evaọ edhere nọ o je kpobọ Damaskọs na,  orọnikọ ọ nọe nọ: “Fikieme who bi ro kpokpo ilele mẹ hẹ?” Rekọ wọhọ epanọ o rrọ obehru na, ọ nọ riẹ nọ: “Fikieme who bi ro kpokpo omẹ?” (Iruẹru 9:4) Onana u dhesẹ nọ okenọ ilele Jesu a tẹ be ruẹ uye, o rẹ wọhọ nọ Jesu omariẹ ọ be ruẹ uye na.—Mat. 25:34-40, 45.

⁶ Otẹrọnọ a bi kpokpo owhẹ fiki ẹrọwọ nọ who fihọ Jesu, jọ u mu owhẹ ẹro nọ Jihova avọ Jesu a riẹ epanọ eware e rrọ kẹ owhẹ. (Mat. 10:22, 28-31) O sae jọ nọ a te nwani si ẹbẹbẹ na no obọnana ha. Kareghẹhọ nọ Jesu ọ ruẹ oware nọ Sọl o ru evaọ okenọ a je kpe Stivin, gbe okenọ o je si ilele riẹ no iwou rai ze evaọ Jerusalẹm. (Iruẹru 8:3) Rekọ Jesu o ru ukpokpoma na serihọ evaọ oke yena ha. O make jọ ere na, Jihova ọ rehọ Kristi kẹ Stivin gbe ilele efa ẹgba nọ a ro kru ẹrọwọ rai.

7. Eme who re ru re whọ sai thihakọ ukpokpoma?

⁷ Whẹ omara whọ sai thihakọ ukpokpoma re nọ who te ru eware nọ ma be te fodẹ na: (1) Gbaemu nọ whọ rẹ jọ abọ Jihova ghelọ oware nọ o rẹ via kpobi kẹhẹ. (2) Lẹ se Jihova re o fiobọhọ kẹ owhẹ. (Fil. 4:6,7) (3) Nyasiọ orukele ba kẹ Jihova. (Rom 12:17-21) (4) Fievahọ nọ Jihova ọ te kẹ owhẹ ẹgba nọ who re ro thihakọ bẹsenọ o re si ẹbẹbẹ na no.—Fil. 4:12, 13.

8, 9. Ẹvẹ o wọhọ nọ o jọ kẹ Ananayas evaọ okenọ Jesu ọ kẹe iruo jọ?

⁸ Nọ Jesu ọ kẹ uyo onọ nọ Sọl ọ nọ inọ, “Whẹ yọ ono, Olori?” no, Jesu ọ tẹ ta kẹe nọ: “Kpama re whọ ruọ eva okpẹwho na, a te vuẹ owhẹ oware nọ who re ru.” (Iruẹru 9:6) A te su Sọl nọ o tuaro no na kpohọ uwou nọ o wohọ evaọ Damaskọs, oria nọ ọ jọ siọ emuọriọ ba evaọ edẹ esa yọ ọ be lẹ. Evaọ oke yena, Jesu ọ tẹ ta ẹme kpahe Sọl kẹ olele riẹ jọ nọ a re se Ananayas nọ ọ jẹ rria okpẹwho yena, ọnọ ahwo Ju kpobi nọ a jẹ rria Damaskọs a jẹ “ta emamọ ẹme riẹ.” (Iruẹru 22:12)

⁹ Dai roro kpahe epanọ onana o jọ kẹ Ananayas! Jesu Kristi nọ ọ kparoma no nọ o wuzou ukoko na ọ be ta ẹme kẹe na, yọ ọ salọ e riẹ re o ru obọdẹ iruo jọ. Nọ  uvẹ ulogbo u rovie fihọ kẹe na, rekọ iruo na okolo iruo ho! Nọ Jesu ọ vuẹe nọ o lele Sọl ta ẹme, Ananayas ọ tẹ ta nọ: “Olori, me yo mi ahwo buobu no kpahe ọzae nana, kpahe eware iyoma kpobi nọ o ru erẹri ra evaọ obọ Jerusalẹm. Yọ ọ nyaze obonẹ avọ udu nọ ilori izerẹ na a kẹ riẹ re o mu ahwo kpobi nọ a bi se odẹ ra.”—Iruẹru 9:13, 14.

10. Eme ma wuhrẹ mi Jesu evaọ oghẹrẹ nọ ọ rọ ta ẹme kẹ Ananayas?

¹⁰ Nọ Ananayas ọ ta oware nọ o riẹe iroro, Jesu ọ whọku ei hi. Ukpoye, Jesu ọ vuẹ riẹ oware nọ o re ru. Jesu o roro kẹ Ananayas, ọ tẹ vuẹe oware nọ ọ rọ gwọlọ nọ o ru iruo nọ ọ kẹ riẹ na. Jesu ọ ta kpahe Sọl nọ: “Ọzae nana yọ ohwo nọ mẹ salọ no re o whowho odẹ mẹ kẹ erẹwho na, te ivie gbe emọ Izrẹl. Yọ me ti dhesẹ kẹe vevẹ eware kpobi nọ ọ te ruẹ  uye rai hrọ fiki odẹ mẹ.” (Iruẹru 9:15, 16) Ananayas o te ru oware nọ Jesu ọ ta na ababọ oke oraha. Ọ gwọlọ Sọl nọ o je kpokpo Ileleikristi vẹre na ruẹ, ọ tẹ ta kẹe nọ: “Sọl, oniọvo, Olori na Jesu, ọnọ ọ romavia kẹ owhẹ evaọ edhere okenọ whọ jẹ nyaze na, o vi omẹ ze re whọ sae wariẹ ruẹ ude jẹ vọ avọ ẹzi ọfuafo.”—Iruẹru 9:17.

11, 12. Eme ma wuhrẹ no iku Jesu, Ananayas, gbe Sọl na ze?

¹¹ Ma wuhrẹ eware buobu evaọ iku nana nọ i kiekpahe Jesu, Ananayas, gbe Sọl na. Wọhọ oriruo, Jesu ọ be kpọ iruo usi uwoma ota na wọhọ epanọ ọ ya eyaa nọ o ti ru. (Mat. 28:20) Dede nọ Jesu ọ be ta ẹme kẹ omomọvo ovavo ho, ọ be rehọ ọrigbo nọ a re fievahọ na kpọ iruo usi uwoma ota na. Ọ rehọ ọrigbo na mu re ọ rẹrote idibo uwou riẹ. (Mat. 24:45-47) Fikinọ iwhowho-uvie avọ ekobaro a bi ru lele oware nọ Utu Ẹruorote na o be ta, a be hae nyae gwọlọ ahwo nọ a gwọlọ gbẹ riẹ kpahe Kristi. Wọhọ epanọ ma ta evaọ uzou nọ o vrẹ na, ahwo otiọye na buobu a lẹ se Ọghẹnẹ re o fiobọhọ kẹ ae, yọ Isẹri Jihova e ginẹ nyabru rai.—Iruẹru 9:11.

¹² Ananayas o yoẹme, o te ru iruo nọ Jesu ọ kẹ riẹ, yọ o wo eghale. Kọ whọ be hae daoma se isẹri ziezi, o tẹ make rọnọ ozọ o be hai mu owhẹ ẹsejọ? Rọkẹ ahwo jọ, ozọ nọ a rẹ rọ ta usi uwoma no uwou ruọ uwou, gbe ozọ nọ a te nyaku ahwo nọ a riẹ vẹre he u re mu ai. O rẹ jọ bẹbẹ kẹ amọfa jọ re a ta usi uwoma evaọ oria iruo rai, evaọ iyẹrẹ, hayo re a rehọ ifonu hayo ileta ta usi uwoma. Ananayas o si ozọ no ẹro, ọ tẹ sai fiobọhọ kẹ Sọl nọ o ro wo ẹzi ọfuafo. b Ananayas ọ sai ru ere fikinọ o fievahọ Jesu, o te je rri Sọl nọ ọ sai kurẹriẹ. Ma sai si ozọ no ẹro re wọhọ Ananayas otẹrọnọ ma fievahọ nọ Jesu họ ọnọ ọ be kpọ iruo usi uwoma ota na, nọ ma te wo ọdawẹ kẹ ahwo, je bi rri ahwo nọ a ri kurẹriẹ hẹ inọ a sai zihe ruọ inievo mai ẹdẹ jọ, makọ ahwo nọ a yoma gaga dede.—Mat. 9:36.

13, 14. Otẹrọnọ who bi wuhrẹ Ebaibol na rekọ whọ re họ-ame he, eme whọ rẹ sai wuhrẹ no oriruo Sọl ze?

¹³ Sọl o mu eware nọ o wuhrẹ họ eru ababọ oke oraha. Nọ ọ wariẹ mu ude họ ẹruẹ no, ọ tẹ họ-ame, o te mu oma họ ekugbe ilele na nọ e rrọ Damaskọs. Rekọ ere ọvo o ru hu. “Ọ tẹ nwani muhọ ẹta kpahe Jesu evaọ isinagọgo na, inọ ọnana họ Ọmọ Ọghẹnẹ.”—Iruẹru 9:20.

¹⁴ Otẹrọnọ who bi wuhrẹ Ebaibol na rekọ whọ re họ-ame he, kọ whọ  te jọ wọhọ Sọl re who ru eware nọ who bi wuhrẹ na ababọ oke oraha, whọ vẹ họ-ame? Ma riẹ nọ iruo igbunu nọ Jesu o ru nọ Sọl ọ ruẹ u duobọtei nọ ọ rọ họ-ame. Rekọ amọfa jọ a jariẹ re nọ a ruẹ iruo igbunu Jesu rekọ a jowọ ọvo ho. Wọhọ oriruo, utu ahwo Farisi jọ a ruẹ Jesu evaọ okenọ o ro siwi ọzae jọ nọ obọ riẹ o ko. Ogbotu ahwo Ju buobu a tẹ jẹ riẹ nọ Jesu ọ kpare Lazarọs no uwhu ze. Ghele na, ibuobu rai a daezọ re a lele Jesu hu, ukpoye a wọso iẹe. (Mak 3:1-6; Jọn 12:9, 10) Sọl o wo ohẹriẹ no ahwo yena, o nwene. Fikieme Sọl o ro kurẹriẹ kpakiyọ amọfa a rọwo ru ere he? Keme ọ jẹ dhozọ Ọghẹnẹ vi ohwo-akpọ. Ohrọ nọ Kristi ọ re riẹ o tẹ jẹ dae ẹro ziezi. (Fil. 3:8) Who te ru wọhọ Sọl, whọ te kuvẹ hẹ re oware jọ o whaha owhẹ usi uwoma na nọ who re muhọ ẹta, gbe oma nọ whọ rẹ dawo re who te ohwo nọ ọ rẹ họ-ame.

15, 16. Eme Sọl o je ru evao isinagọgo na, kọ eme ahwo Ju nọ a jọ Damaskọs a ru?

¹⁵ Dai roro kpahe oware nọ ogbotu ahwo na a ru nọ Sọl o mu usi uwoma họ ẹta kpahe Jesu evaọ isinagọgo. U gbe ejọ unu gaga, yọ o sae jọ nọ eva e jẹ dha ejọ gaga dede. A jẹ nọ nọ: “Kọ ogbẹrọnọ ọzae nana o je kpokpo enọ e rrọ Jerusalẹm nọ i bi se odẹ nana?” (Iruẹru 9:21) Nọ Sọl ọ jẹ ta oware nọ o lẹliẹ e riẹ nwene uruemu riẹ kpahe Jesu, ọ “kẹ imuẹro ivevẹ unọjọ utọjọ inọ Jesu họ Kristi na.” (Iruẹru 9:22) Rekọ orọnọ ohwo kpobi ọ rọwo ho ghelọ imuẹro ivevẹ nọ ọ kẹ na. Nọ ohwo ọ tẹ talamu iruemu ẹwho riẹ, yọ o wo omorro, imuẹro e sai fiobọhọ kẹe nwene he. O make jọ ere na, Sọl ọ gbẹ jẹ ta usi uwoma ghele.

¹⁶ Ikpe esa e make vrẹ no, ahwo Ju nọ a jọ Damaskọs a gbẹ jẹ wọso Sọl. Ukuhọ riẹ, a tẹ jẹ gwọlọ nọ a re kpei no. (Iruẹru 9:23; 2 Kọr. 11:32, 33; Gal. 1:13-18) Nọ omaa rai na o fere via, Sọl ọ tẹ rọ areghẹ no okpẹwho na. Ọ rọwo nọ a wọe fihọ ekete, a tẹ rọ eghogho jọ nọ ọ rrọ ugbẹhẹ na si ei kpotọ. Luk o se ahwo nọ a rọ ekete si Sọl kpotọ evaọ aso yena “ilele riẹ,” koyehọ erọ Sọl. (Iruẹru 9:25) Ẹme nana o dhesẹ nọ o wọhọ nọ ahwo jọ nọ a yo usi uwoma Sọl evaọ Damaskọs a nwene uruemu rai, a te zihe ruọ ilele Kristi.

17. (a) Eme ahwo a sai ru nọ whọ tẹ be ta ẹme no Ebaibol ze kẹ ae? (b) Eme ma re gbe ru ghele, kọ fikieme?

¹⁷ Ẹsejọhọ evaọ oke ọsosuọ nọ who ro mu usi uwoma họ ẹta kẹ ahwo uviuwou ra, egbẹnyusu ra, gbe amọfa, who je roro nọ ohwo kpobi ọ te rọwo uzẹme uvevẹ nọ o rrọ Ebaibol na. O sae jọ nọ ejọ e rọwo, rekọ ibuobu e rọwo ho. Ẹsejọhọ ahwo uwou ra dede a te mu owhẹ họ eru wọhọ ẹsenọ whọ rrọ ọwegrẹ. (Mat. 10:32-38) Rekọ whọ tẹ be daoma re oghẹrẹ nọ whọ be hae rehọ Ebaibol na wuhrẹ ahwo u woma vi epanọ o jọ, jẹ be hai dhesẹ emamọ uruemu, makọ ahwo nọ a be wọso owhẹ na dede a sai nwene uruemu rai nọ oke o be nyaharo na.—Iruẹru 17:2; 1 Pita 2:12; 3:1, 2, 7.

18, 19. (a) Eme o no rie ze nọ Banabas o fiobọhọ kẹ Sọl? (b) Ẹvẹ ma sae rọ rehọ aro kele Banabas avọ Sọl?

 ¹⁸ Nọ Sọl ọ ruọ Jerusalẹm, u mu rai ẹro ho inọ Sọl o gine zihe ruọ olele Jesu no. Rekọ nọ Banabas ọ ta nọ Sọl o gine kurẹriẹ no, ikọ na a tẹ jẹe rehọ, ọ tẹ jọ kugbe ai evaọ omoke jọ. (Iruẹru 9:26-28) Sọl ọ jẹ yọroma nọ ọ jẹ ta usi uwoma na, rekọ orọnọ oma o jẹ vuọ ẹe he. (Rom 1:16) Ọ ta usi uwoma na ududu evaọ Jerusalẹm, oria ọvona nọ ọyomariẹ ọ jọ kpokpo ilele Jesu Kristi gaga na. Eva e dha ahwo Ju nọ e jọ Jerusalẹm gaga nọ a ruẹ nọ ohwo nọ a je roro nọ o ti voro Ileleikristi na notọ o zihe ruọ Oleleikristi no, a tẹ jẹ gwọlọ oghẹrẹ nọ a re ro kpei no. Ebaibol na ọ ta nọ: “Nọ inievo na a riẹ kpahe onana, a tẹ rehọ iẹe kpohọ Sisaria, a tẹ jọ etẹe vi ei kpohọ Tasọs.” (Iruẹru 9:30) Sọl o ru oware nọ inievo na a vuẹ riẹ nọ o ru keme o rri rie nọ Jesu ọ be kpọe na. Onana o wha erere se Sọl gbe ukoko na soso.

¹⁹ Muẹrohọ nọ Banabas ọ fialoma via nọ o re fiobọhọ kẹ Sọl. O rrọ vevẹ nọ obọ nọ o fihọ kẹ Sọl na u ru nọ aimava nọ a rrọ idibo Jihova nọ i wo ajọwha ziezi na a ro zihe ruọ emamọ egbẹnyusu. Wọhọ Banabas, kọ whọ be hae rọ unevaze fiobọhọ kẹ ahwo nọ a kurẹriẹ ziọ ukoko na obọ? Kọ whọ be hai lele ai kpohọ usi uwoma ota je fiobọhọ kẹ ai kruga ziezi? Whọ tẹ be hai ru ere, Jihova ọ te ghale owhẹ. Otẹrọnọ who mu usi uwoma họ ẹta obọ, kọ whọ be hae rọwo re amọfa a fiobọhọ kẹ owhẹ wọhọ epanọ Sọl o ru na? Whọ tẹ be hai lele iwhowho-uvie nọ e ta usi uwoma na kri no kpohọ usi uwoma, whọ te sae riẹ usi uwoma ta vi epaọ anwẹdẹ, who ti wo oghọghọ ziezi, yọ who ti wo emamọ egbẹnyusu nọ e te tọ.

20, 21. Eme ahwo Ọghẹnẹ evaọ oke anwae gbe oke mai na a ru no evaọ ‘etoke nọ a ro wo udhedhẹ’?

²⁰ Nọ Sọl o kurẹriẹ no jẹ dhẹ no Jerusalẹm omakọkọ no, “ukoko na evaọ Judia gbe Galili gbe Sameria soso o tẹ te ruọ etoke udhedhẹ.” (Iruẹru 9:31) Eme ilele na a rehọ etoke udhedhẹ na ru? (2 Tim. 4:2) Iku na e ta nọ, a jẹ “ga evaọ ẹrọwọ na.” Ikọ na avọ inievo efa nọ e jẹ kobaro evaọ iruo na a ru ẹrọwọ ilele na ga je fiobọhọ kẹ inievo ukoko na soso nọ a rọ “nya evaọ ozodhẹ Jihova je bi wo omosasọ nọ ẹzi ọfuafo na ọ rẹ kẹ na.” Wọhọ oriruo, Pita ọ rọ oke yena ru ẹrọwọ ilele nọ e jọ ẹwho Lida evaọ Otọ Opraprara Sharọn ga ziezi. Oma nọ ọ dawo u ru nọ ahwo buobu nọ a jẹ rria ẹkwotọ na a ro kurẹriẹ “bru Olori na ze.” (Iruẹru 9:32-35) Ilele na a kuvẹ hẹ re eware obọrai i ru ai reghe no ẹrọwọ na no, rekọ a je fiobọhọ kẹ ohwohwo yọ a be ta usi uwoma na. Fikiere, ukoko na u te je “dhe evievihọ.”

²¹ Evaọ oware wọhọ ukpe 1990, Isẹri Jihova evaọ erẹwho buobu a  dina wo udhedhẹ. Esuo egọmeti nọ e jẹ wọso ahwo Ọghẹnẹ evaọ ikpe buobu i kie idudhe, Isẹri Jihova a tẹ sai mu usi uwoma họ ẹta ziezi evaọ erẹwho nọ a jọ whaha ae vẹre. Isẹri Jihova nọ i te idu buobu a tẹ jẹ rọ uvẹ nana ta usi uwoma na ziezi evaọ ẹgbede, yọ ahwo buobu a gaviezọ.

22. Eme who re ru evaọ oke nana nọ wha ro wo udhedhẹ na?

²² Kọ whọ be rehọ oke nana nọ who ro wo udhedhẹ hayo ufuoma na ru iruo ziezi? Otẹrọnọ whọ be rria orẹwho nọ wha jọ wo uvẹ nọ wha rẹ rọ ta usi uwoma na, Setan ọ te gwọlọ nọ who le efe viukpenọ whọ rẹ rehọ oke ra ru iruo Uvie na. (Mat. 13:22) Whọ kuvẹ re who reghe no ho. Rehọ oke nọ wha dina ro wo udhedhẹ na ru iruo avọ areghẹ. Rri rie wọhọ uvẹ nọ whọ rẹ rọ ta usi uwoma na ziezi jẹ bọ amọfa ga evaọ ukoko na. Kareghẹhọ nọ eware e sai nwene idudhe.

23, 24. (a) Eme ma wuhrẹ no iku Tabita ze? (b) Eme ma rẹ gbaemu nọ ma re ru?

²³ Roro kpahe oware nọ o via kẹ olele jọ nọ a re se Tabita, hayo Dọkas. Ẹwho jọ nọ a re se Jọpa nọ o thabọ no Lida ha ọ jẹ rria. Emamọ oniọvo-ọmọtẹ nana ọ jẹ hae rehọ oke riẹ gbe eware nọ o wo ru iruo avọ areghẹ, “ọ vọ avọ ewoma oruo,” yọ ọ jẹ hae kẹ “ekẹ ohrọ.” Rekọ idudhe na, ẹyao o te ki ei, o te whu. c Uwhu riẹ o da ilele nọ e jọ Jọpa gaga, maero kọ eyae-uku nọ ọ jẹ hai fiobọhọ kẹ. Nọ Pita ọ ruẹ eva uwou nọ ori na ọ jọ, o te ru iruo igbunu jọ nọ ukọ Jesu ọvuọvo o ri ru hu. Pita ọ lẹ, ọ tẹ kpare Tabita no uwhu ze! A rẹ ruẹ unu gbiku oghọghọ nọ eyae-uku na avọ ilele edekọ na a wo ho nọ Pita o se ai zihe ruọ eva ubrukpẹ na, a jẹ ruẹ Tabita nọ ọ rrọ uzuazọ! O rrọ vevẹ nọ eware nana nọ e via na i ru ẹrọwọ rai ga nọ a te sai ro thihakọ edawọ nọ i ti te ai kẹle na! Usi iruo igbunu na u “do ruọ Jọpa soso, ibuobu i te kurẹriẹ bru Olori na ze.”—Iruẹru 9:36-42.

²⁴ Ma wuhrẹ eware ivẹ jọ nọ i wuzou no iku Tabita ze. (1) Eware e sai nwene kẹ ohwo idudhe evaọ uzuazọ, hayo ohwo ọ sai whu idudhe dede. Fikiere u wuzou gaga re ma daoma wo emamọ odẹ kugbe Ọghẹnẹ enẹna nọ uvẹ na o gbẹ riẹ na! (Ọtausi. 7:1) (2) A te kpare ahwo nọ a whu no zihe ziọ uzuazọ. Jihova o muẹrohọ iruo iwoma kpobi nọ Tabita o ru,  yọ ọ ghale riẹ. Ọ te kareghẹhọ iruo iwoma mai jẹ kpare omai zihe ziọ uzuazọ otẹrọnọ ma whu taure Amagidọn o te ti fi. (Hib. 6:10) Fikiere, te ma bi thihakọ “oke obẹbẹ” enẹna, hayo ma rrọ “etoke udhedhẹ,” jọ mai kpobi ma gbẹ hai se isẹri ziezi kpahe Kristi.—2 Tim. 4:2.