Ro Se Inievo Eghaghae Mai:

Anwọ January 1, 2008 ze, nọ a kaki kere uvitha ẹgbede ọsosuọ ọrọ Uwou-Eroro Na ma be hai ro wo uzoẹme na “Rọ Aro Kele Ẹrọwọ Rai.” No umuo oke yena ze, uzoẹme yena o romavia unuẹse buobu no evaọ Uwou-Eroro na, yọ onana o were omai gaga.

Eme ahwo nọ a bi se ebe mai a ta no kpahe uzoẹme nana? Nọ ohwo jọ o se uzoẹme nọ o ta kpahe Mata no, o te kere nọ: “Nọ me se iku nana, mẹ jẹ hwẹ keme mẹ wọhọ Mata. O rẹ were omẹ re mẹ ghọ ahwo, yọ obọ mẹ o rẹ jọ oware ẹsikpobi, rekọ o rẹ jọ bẹbẹ k’omẹ ẹsejọ re me serihọ je kuomagbe egbẹnyusu mẹ.” Nọ uzoge jọ o se iku Ẹsta no, ọ tẹ ta nọ: “Mẹ riẹ nọ ẹsejọ osẹ gbe iwu nọ i kieze obọ i re mu omai. U fo re ma sẹ ziezi; rekọ u woma re ma se ẹgọ gboja hrọ họ.” Ọ ta re nọ: “Oghẹrẹ ohwo nọ ma rrọ evaọ obeva o mae rrọ Jihova oja.” Oniọvo-ọmọtẹ jọ nọ o se iku Pita ukọ na ọ ta nọ: “Iku na e da ruọ omẹ oma. O wọhọ ẹsenọ mẹ jọ etẹe. Makọ eware nọ a nwane ta kpahe gbiae evaọ iku na ha, mẹ jẹ ruẹ e rai.”

U te no ahwo nana no, amọfa buobu a kere ze no ro dhesẹ epanọ izoẹme nana e were rai te, yọ onana o rọwo kugbe ẹme nọ Pọl ukọ na o kere inọ: “Eware kpobi nọ a kere oke anwae, a kere ai rọ kẹ omai ohrẹ.” (Rom 15:4) Ẹhẹ, Jihova o fi iku nana họ Ebaibol na re o ro wuhrẹ omai. Mai kpobi, te enọ e rrọ ukoko na kri no, ma rẹ sai wuhrẹ no iku nana ze.

Ma tuduhọ owhai awọ nọ wha se obe nana ababọ oke oraha. Rehọ iẹe ru Egagọ Uviuwou ra, o te were emọ ra ziezi. Nọ a ti wuhrẹ obe nana evaọ Uwuhrẹ Ebaibol Ukoko, whọ jọ oka ovo u vo owhẹ vievie he. Romatotọ sei, whọ variẹ oma ha. Rehọ iẹe nọ whọ rrọ etẹe nọ eware na e be via na, inọ whọ be ruẹ eware nọ a jẹ ruẹ je bi yo edo nọ a je yo. Roro kpahe oware nọ ahwo na a ru gbe oware nọ whọ hai ti ru o hae jọnọ whẹ eware na e via kẹ.

Eva e were omai gaga nọ ma bi ro siobọno obe nana. Jọ o wha eghale se owhẹ avọ uviuwou ra. Ma you whai jẹ lẹ nọ u woma kẹ owhai,

Ugboma Esuo Orọ Isẹri Jihova