1, 2. Ẹvẹ Jihova ọ gwọlọ nọ uviuwou kpobi o jọ?

JIHOVA ỌGHẸNẸ họ ọnọ ọ tuọ orọo ọsosuọ họ. Ebaibol na ọ ta nọ okenọ ọ ma aye ọsosuọ na no “ọ tẹ rehọ aye na se ọzae na.” Eva e were Adamu te epanọ ọ rọ ta nọ: “Ọnana họ ugbonwa igbenwa mẹ gbe uwo uwo-oma mẹ.” (Emuhọ 2:22, 23) Onana u dhesẹ nọ Jihova ọ gwọlọ nọ ahwo nọ a rọo no a wereva.

² U yoma kẹhẹ inọ evawere e rrọ uviuwou ahwo buobu nẹnẹ hẹ. Rekọ Ebaibol na ọ fodẹ eware buobu nọ e rẹ sai fiobọhọ kẹ ahwo kpobi nọ e rrọ uviuwou wereva je wo usu okpekpe kugbe ohwohwo.​—Luk 11:28.

3, 4. (a) Ẹvẹ ọzae o re yerikugbe aye riẹ? (b) Fikieme u ro wuzou re ọzae-avọ-aye a hae rọvrẹ ohwohwo?

³ Ebaibol na ọ ta nọ emamọ ọzae o re you aye riẹ je bru ọghọ họ iẹe oma. Ivie se obe Ahwo Ẹfisọs 5:25-29. Ere u fo nọ ọzae o re lele aye riẹ yeri ẹsikpobi. Ọ rẹ jẹ thọe, rẹrotei, jẹ whaha oware kpobi nọ o rẹ nwae oma.

⁴ Rekọ eme u fo nọ ọzae o re ru nọ oware jọ o tẹ thọ aye riẹ obọ? Ebaibol na ọ ta kẹ ezae nọ: “Wha gbẹ hai you eyae rai, wha dha eva kẹ ae gaga ha.” (Ahwo Kọlọsi 3:19) Ezae, wha kareghẹhọ nọ eware e rẹ thọ owhai obọ re. Yọ otẹrọnọ whọ gwọlọ nọ Ọghẹnẹ ọ rọvrẹ owhẹ, whọ rẹ rọvrẹ aye ra re. (Matiu 6:12, 14, 15)  Nọ ọzae-avọ-aye a tẹ be rọvrẹ ohwohwo, a re wo evawere evaọ orọo rai.

5. Fikieme ọzae o re ro bru ọghọ họ aye riẹ oma?

⁵ Jihova ọ gwọlọ nọ ọzae o bru ọghọ họ aye riẹ oma. O gwọlọ nọ ọzae ọ rẹ romatotọ roro kpahe oware nọ aye riẹ ọ gwọlọ. Onana u wuzou gaga. Nọ ọzae ọ gbẹ be riẹ aye riẹ ru hu, Jihova o re yo elẹ riẹ hẹ. (1 Pita 3:7) Oware nọ o rẹ lẹliẹ ohwo were Jihova họ nọ o te you Ọghẹnẹ. Orọnikọ ezae e rẹ were Ọghẹnẹ vi eyae he.

6. Eme u dhesẹ re ọzae-avọ-aye a jọ “uwo ovo”?

⁶ Jesu ọ ta nọ ọzae-avọ-aye “a gbẹ rrọ uwo ivẹ hẹ rekọ uwo ovo.” (Matiu 19:6) A rẹ talamu ohwohwo, ọjọ ọ rẹ nyasiọ ọrivẹ riẹ ba nyai lele omọfa wezẹ vievie he. (Itẹ 5:15-21; Ahwo Hibru 13:4) O gwọlọ nọ ezae avọ eyae a re ru ẹgwọlọ ọrivẹ rai gba kẹe evaọ abọ owezẹ ọzae-avọ-aye. (1 Ahwo Kọrint 7:3-5) U fo nọ ọzae ọ rẹ kareghẹhọ inọ, “ọzae ọvo o re mukpahe ugboma obọriẹ hẹ, rekọ ọ rẹ kuọ oma na je rri rie ghaghae.” Fikiere o gwọlọ nọ ọzae o re you aye riẹ je rri rie ghaghae. Oware nọ aye ọ mae gwọlọ họ re ọzae riẹ o you rie jẹ hai tete iei.​—Ahwo Ẹfisọs 5:29.

7. Fikieme u ro fo re uviuwou u wo ohwo nọ o wuzou riẹ?

⁷ U fo nọ uviuwou kpobi u re wo ohwo nọ o re wuzou riẹ, nọ o re koko uviuwou na họ re eware e riẹ nya. Ebaibol na ọ ta evaọ obe 1 Ahwo Kọrint 11:3, inọ: “Ọnọ o wuzou ọzae kpobi họ Kristi; yọ ọnọ o wuzou aye họ ọzae; yọ ọnọ o wuzou Kristi họ Ọghẹnẹ.”

8. Ẹvẹ aye o re ro dhesẹ nọ o wo adhẹẹ odidi kẹ ọzae riẹ?

⁸ Eware e rẹ thọ ọzae kpobi obọ. Rekọ nọ aye o te bi yoẹme kẹ ọzae riẹ no eva ze, ọ gbẹ be wọso iroro nọ  ọzae riẹ ọ jẹ ze he, ahwo nọ e rrọ uwou na kpobi a re wo erere. (1 Pita 3:1-6) Ebaibol ọ ta nọ: “Jọ aye o wo adhẹẹ odidi kẹ ọzae riẹ.” (Ahwo Ẹfisọs 5:33) Kọ eme aye o re ru otẹrọnọ ọzae riẹ ọ rọwo iwuhrẹ egagọ riẹ hẹ? Ọ rẹ gbẹ rọ adhẹẹ odidi kẹ ọzae riẹ ghele. Ebaibol na ọ ta nọ: “Whai eyae wha romakpotọ kẹ ezae rai, re otẹrọnọ ejọ i bi lele Ẹme Ọghẹnẹ hẹ, ẹsejọhọ a vẹ te rọ fiki emamọ uruemu eyae rai kurẹriẹ ababọ ẹme nọ a ta kẹ ae, keme a be rọ ẹro ruẹ uruemu ezi rai gbe adhẹẹ odidi nọ wha wo.” (1 Pita 3:1, 2) Aye o te wo emamọ uruemu, onana u re fiobọhọ kẹ ọzae riẹ wo isiuru kpahe eware nọ Ebaibol na o wuhrẹ, ọ vẹ jẹ rọ adhẹẹ kẹ egagọ riẹ.

9. (a) Eme aye o re ru otẹrọnọ oware nọ ọzae riẹ ọ ta o were riẹ hẹ? (b) Ohrẹ vẹ a kẹ eyae na evaọ obe Taitọs 2:4, 5?

⁹ Eme aye o re ru otẹrọnọ oware nọ ọzae riẹ ọ ta o were riẹ hẹ? Ọ rẹ ta eva riẹ avọ adhẹẹ. Wọhọ oriruo, Sera ọ ta ẹme jọ nọ ọ were Abraham hu, rekọ Jihova ọ ta kẹ Abraham nọ: “Gaviezọ kẹe.” (Emuhọ 21:9-12)  O te vẹrẹ hẹ re ọzae ọ jiroro nọ e wọso oware nọ Ebaibol ọ ta, fikiere u fo re aye ọ hai ru oware nọ ọzae riẹ ọ ta. (Iruẹru Ikọ 5:29; Ahwo Ẹfisọs 5:24) Emamọ aye ọ rẹ rẹrote ahwo uwou riẹ. (Se Taitọs 2:4, 5.) Nọ ọzae riẹ gbe emọ riẹ a tẹ ruẹ nọ o bi kru obọ ga ru iruo, a re you rie jẹ kẹe ọghọ.​—Itẹ 31:10, 28.

10. Eme Ebaibol na ọ ta kpahe ẹhẹriẹ gbe orọo-ofa?

¹⁰ Ẹsejọ, ahwo nọ a rọo no a rẹ rọ okpakpa jiroro inọ a gwọlọ hẹriẹ hayo fa orọo rai. Rekọ Ebaibol na ọ ta nọ, “aye ọ rẹ hẹriẹ no ọzae riẹ hẹ” yọ “ọzae ọ rẹ nyasiọ aye riẹ ba ha.” (1 Ahwo Kọrint 7:10, 11) Eware jọ e riẹ nọ e rẹ whae ze nọ ọzae-avọ-aye a rẹ sae rọ hẹriẹ, rekọ re a hẹriẹ yọ ẹme evere he. Kọ ẹvẹ kpahe orọo-ofa? Ebaibol na ọ ta nọ oware ọvo nọ o rẹ sae lẹliẹ ohwo fa orọo riẹ họ otẹrọnọ ọzae hayo aye ọ nyai lele omọfa jọ wezẹ.​—Matiu 19:9.

11. Eme emọ a mae gwọlọ vi oware ofa kpobi?

¹¹ Whai esẹgbini, wha raha oke ziezi kugbe emọ rai te epanọ o rẹ sae lọhọ te kpobi. Emọ ra a gwọlọ nọ whọ jọ kugbe ai, yọ oware nọ emọ ra a mae gwọlọ vi oware ofa kpobi họ ewuhrẹ nọ who re wuhrẹ ai kpahe Jihova.​—Iziewariẹ 6:4-9.

12. Eme esẹgbini a re ru re a sae thọ emọ rai?

¹² Akpọ nana nọ Setan o bi su na o bi dhe eyeyoma gaga, yọ ahwo jọ a riẹ nọ a gwọlọ raha emọ mai, be tubẹ gwọlọ gba ae du dede. O rrọ bẹbẹ kẹ esẹgbini jọ re a lele emọ rai ta ẹme kpahe oware nana. Rekọ o gwọlọ nọ esẹgbini a rẹ vẹvẹ emọ rai unu kpahe ahwo nọ a rẹ gwọlọ rọ obọ te ẹba rai, je wuhrẹ ai epanọ a rẹ rọ kẹnoma  kẹ oghẹrẹ ahwo otiọnana. Esẹgbini, o gba owhai họ nọ wha rẹ thọ emọ rai no ebẹbẹ nana. *​—1 Pita 5:8.

13. Ẹvẹ esẹgbini a re ro wuhrẹ emọ rai?

¹³ Esẹgbini họ enọ i re wuhrẹ emọ rai emamọ uruemu. Ẹvẹ whọ sai ro wuhrẹ emọ ra? O gwọlọ nọ who re wuhrẹ emọ ra, rekọ orọnikọ ofu gbe evedha whọ rẹ rọ kpọ ai vi hi. (Jerimaya 30:11) Fikiere whọ whọku emọ ra okenọ eva e tẹ be dha owhẹ hẹ. Whọ jọ eme ra i duwu wọhọ “ọgbọdọ nọ a ro duwu ohwo” ho nọ ọ  rẹ nwa ohwo oma. (Itẹ 12:18) Wuhrẹ emọ ra re a riẹ oware nọ u ro fo re a hai yoẹme.​—Ahwo Ẹfisọs 6:4; Ahwo Hibru 12:9-11; rri Ẹme-Oruvẹ 30.

14, 15. Fikieme u ro fo re emọ a yoẹme kẹ esẹgbini rai?

¹⁴ Jesu o yoẹme kẹ Ọsẹ riẹ ẹsikpobi makọ okenọ o jọ bẹbẹ re o ru ere. (Luk 22:42; Jọn 8:28, 29) Jihova ọ gwọlọ nọ emọ a yoẹme kẹ esẹgbini rai.​—Ahwo Ẹfisọs 6:1-3.

¹⁵ Whai emọ, o tẹ make rọnọ o rrọ bẹbẹ re wha yoẹme kẹ esẹgbini rai, wha kareghẹhọ nọ wha te bi yoẹme, eva rai e rẹ were Jihova gbe esẹgbini rai. *​—Itẹ 1:8; 6:20; 23:22-25.

16. (a) Ẹvẹ Setan ọ rẹ rọ dawo izoge na re a ru oware nọ u yoma? (b) Fikieme u ro wuzou gaga re who mu ogbẹnyusu kugbe ahwo nọ a you Jihova?

¹⁶ Ẹdhọ ọ rẹ sae rehọ egbẹnyusu ra gbe emaha efa dawo owhẹ re who ru oware nọ o thọ. Ọ riẹ nọ o rrọ bẹbẹ kẹ owhẹ re whọ se inọ who re ru oware nọ a gwọlọ na ha. Wọhọ oriruo, ọmọtẹ Jekọp nọ a re se Daena o wo egbẹnyusu nọ a you Jihova ha. Onana u fi rie avọ ahwo uwou riẹ họ uye. (Emuhọ 34:1, 2) Otẹrọnọ egbẹnyusu ra a you Jihova ha, a rẹ sai gele owhẹ fihọ odawọ, onọ o rẹ lẹliẹ owhẹ ru oware nọ Jihova o mukpahe, o vẹ te wha idhọvẹ se owhẹ, uviuwou ra, gbe Ọghẹnẹ. (Itẹ 17:21, 25) Oyejabọ nọ u ro wuzou gaga re who mu ogbẹnyusu kugbe ahwo nọ a you Jihova.​—1 Ahwo Kọrint 15:33.

17. Iruo vẹ i te ohwo kpobi evaọ uviuwou na?

¹⁷ Nọ ahwo uviuwou a te bi ru eware nọ Ọghẹnẹ ọ ta nọ a ru, a ti wo ebẹbẹ buobu hu. Fikiere, whọ tẹ rrọ ọzae, you aye ra jẹ hai tete iei. Whọ tẹ rrọ aye, kẹ ọzae ra adhẹẹ, hae romakpotọ kẹe, re whọ jẹ hae rọ aro kele oriruo emamọ aye nọ a ta ẹme kpahe evaọ obe Itẹ 31:10-31. Otẹrọnọ whẹ yọ ọsẹ hayo oni, wuhrẹ emọ ra re a you Ọghẹnẹ. (Itẹ 22:6) Whọ tẹ rrọ ọsẹ, kpọ uviuwou ra “ziezi.” (1 Timoti 3:4, 5; 5:8) Whai emọ, wha yoẹme kẹ esẹgbini rai. (Ahwo Kọlọsi 3:20) Kareghẹhọ nọ eware e rẹ thọ ohwo kpobi evaọ uviuwou na obọ, fikiere daoma wo omaurokpotọ re whọ ta kẹ ohwo nọ who ruthọ inọ ọ rọvrẹ owhẹ. Ẹhẹ, Ebaibol na o wo ehrẹ nọ i re fiobọhọ kẹ ohwo kpobi evaọ uviuwou na.