No oke emaha ze Samuẹle o je ro ru iruo evaọ obọ uwou Ọghẹnẹ, yọ etẹe ọ jẹ rria re. Uwou Ọghẹnẹ họ oria nọ ahwo a rẹ jọ gọ Ọghẹnẹ. Kọ whọ riẹ oware nọ o soriẹ ze nọ Samuẹle ọ jẹ rọ rria uwou Ọghẹnẹ? Joma kaki wuhrẹ kpahe oni Samuẹle nọ a re se Hana.

Hana ọ gwọlọ nọ o re wo ọmọ, rekọ ọ sai yẹ ọmọ họ evaọ ikpe buobu. Ọ tẹ lẹ se Jihova re o fi obọ họ kẹe. Ọ tẹ ya eyaa kẹ Ọghẹnẹ nọ ọ tẹ sai yẹ ọmọzae, ọ te rehọ iẹe kpohọ uwou Ọghẹnẹ re ọmọ na ọ rria obei jẹ jọ etẹe ru iruo. Jihova o yo olẹ riẹ, o te gine yẹ ọmọzae. O te se odẹ riẹ Samuẹle. Wọhọ epanọ Hana ọ ya eyaa kẹ Ọghẹnẹ na, ọ tẹ rehọ Samuẹle kpobọ uwou Ọghẹnẹ nọ o te ikpe esa hayo ene no, re ọ jọ obei ru iruo.

Ilai ọ jọ ozerẹ okpehru evaọ uwou Ọghẹnẹ na. Emezae ivẹ riẹ a je ru iruo evaọ etẹe re. Kareghẹhọ nọ uwou Ọghẹnẹ yọ oria nọ a jẹ jọ gọ Ọghẹnẹ, yọ u fo nọ eware iwoma ahwo a re ru evaọ etẹe. Rekọ emọ Ilai a je ru eware nọ i yoma gaga. Samuẹle ọ jẹ ruẹ eware nọ a je ru na. Kọ Samuẹle o je ru eware iyoma wọhọ emezae Ilai?— Ijo, o je ru oware uwoma wọhọ epanọ ọsẹgboni riẹ a wuhrẹ i rie.

Eme who roro nọ Ilai ọ hai ru kpahe emezae ivẹ riẹ na?— Ọ hai doku ai. Ọ hae gbẹ kẹ ae uvẹ re a ru iruo evaọ uwou Ọghẹnẹ hẹ. Rekọ Ilai o ru ere he, fikiere eva riẹ avọ emezae riẹ e tẹ dha Jihova gaga. Onana u te ru nọ Jihova ọ rọ ta nọ ọ te kẹ ae uye.

Evaọ aso ẹdẹjọ nọ Samuẹle ọ jọ owezẹ, o te yo uvou jọ nọ u se rie nọ, ‘Samuẹle.’ Ọ tẹ dhẹ bru Ilai, rekọ Ilai ọ tẹ ta nọ: ‘Me se owhẹ hẹ.’ Uvou na o tẹ wariẹ sei isiava efa. Nọ uvou na u sei orọ avọ isiasa, Ilai ọ tẹ ta kẹe nọ ọ tẹ wariẹ yo uvou na, jọ ọ ta nọ: ‘Iviena ta ẹme Jihova, me bi yo.’ Ere Samuẹle o gine ru. Jihova ọ tẹ ta kẹ Samuẹle nọ:  ‘Ta kẹ Ilai inọ mẹ te kẹ uviuwou riẹ uye fiki eware iyoma nọ a bi ru na.’ Kọ who roro nọ o lọhọ kẹ Samuẹle re ọ vuẹ Ilai uwou nana?— Ijo. Rekọ dede nọ ozọ u je mu Samuẹle, o ru oware nọ Jihova ọ ta kẹe nọ o ru na. Oware nọ Jihova ọ ta na o ginẹ via. A kpe emezae ivẹ Ilai evaọ ẹmo, yọ Ilai omariẹ o whu re.

Samuẹle o fi emamọ oriruo họ otọ kẹ omai. O ru oware uwoma dede nọ amọfa a je ru eware iyoma. Kọ owhẹ omara? Kọ whọ te rọ aro kele Samuẹle ru oware uwoma re? Who te ru ere, eva ra e te were Jihova gbe ọsẹgboni ra.