Kọ whọ be ruẹ ezae nọ e rrọ ifoto na?— Edẹ rai Matiu, Mak, Luk, Jọn, Pita, Jemis, Jud, gbe Pọl. Ezae nana kpobi a jariẹ evaọ okenọ Jesu ọ jọ otọakpọ, yọ a kere kpahe Jesu. Joma wuhrẹ kpahe ae.

Imasa evaọ usu rai a jọ ikọ Jesu nọ i je lele iei ta usiuwoma. Kọ whọ riẹ edẹ rai?— Matiu, Jọn, gbe Pita. Matiu avọ Jọn a riẹ Jesu ziezi, yọ a kere kpahe iẹe. Jọn ukọ na o te je kere obe nọ a re se Eviavia  gbe ileta esa nọ a se Jọn Ọsosuọ, Jọn Avivẹ, gbe Jọn Avesa. Pita ukọ na o kere ileta ivẹ evaọ Ebaibol na nọ a re se Pita Ọsosuọ gbe Pita Avivẹ. Evaọ ileta avivẹ riẹ, Pita o kere nọ Jihova ọ ta ẹme no obọ odhiwu ze kpahe Jesu inọ: ‘Ọnana họ ọmọ mẹ. Me you rie, yọ ọ were omẹ gaga.’

Ezae nọ i kiọkọ evaọ ifoto na a kere ebe jọ evaọ Ebaibol na nọ ma sai jo wuhrẹ kpahe Jesu re. Ọjọ họ Mak. O wọhọ nọ ọ jariẹ evaọ okenọ a mu Jesu, yọ ọ ruẹ oware kpobi nọ o via. Ọfa họ Luk. Edọkita ọ jọ; yọ o wọhọ nọ Jesu o whu no taure o te ti zihe ruọ Oleleikristi.

Ezae ivẹ jọ evaọ usu ezae nọ e rrọ ifoto na yọ inievo Jesu. Kọ whọ riẹ edẹ rai?— Jemis avọ Jud. Aimava na a kake rọwo Jesu hu, yọ a je tube roro nọ ọ be mọ oruẹ dede. Rekọ ukuhọ riẹ, a rọwo Jesu je zihe ruọ Ileleikristi.

Ọzae nọ o kiọkọ nọ whọ be ruẹ evaọ ifoto na họ Pọl. Yọ o kere ebe jọ evaọ Ebaibol na re. Taure o te ti zihe ruọ Oleleikristi, a je sei Sọl. Eva Ileleikristi e jẹ dhae, yọ ọ jẹ kẹ ae uye gaga. Kọ whọ riẹ oware nọ o lẹliẹ Pọl zihe ruọ Oleleikristi?— Ẹdẹjọ nọ Pọl ọ jọ edhere je kpohọ erẹ, o te yo uvou jọ nọ o ta ẹme kẹe no obọ odhiwu ze. Jesu ọ jẹ ta ẹme kẹe na. Ọ tẹ nọ Pọl nọ: ‘Fikieme who bi ro kpokpo ahwo mẹ?’ Nọ oyena o vrẹ no, Pọl o te kurẹriẹ je zihe ruọ Oleleikristi. Pọl o kere ebe 14 evaọ Ebaibol na, no obe Ahwo Rom rite Ahwo Hibru.

Kẹdẹ kẹdẹ ma re se Ebaibol na, ogbẹrọ ere?— Ma te bi se Ebaibol na, ma re wuhrẹ eware buobu kpahe Jesu. Kọ whọ gwọlọ gbe wuhrẹ kpahe Jesu?—