Ẹsejọ ahwo a rẹ hwẹ omai hayo eva mai e rẹ dha ae nọ ma tẹ ta kẹ ae kpahe Jihova. Onana o sai ru nọ ma gbẹ rọ gwọlọ ta kẹ ae kpahe Jihova ha. Kọ o via kẹ owhẹ ere no ẹdẹjọ?— Ebaibol na o gbiku ọmọzae jọ nọ o you Jihova gaga, rekọ ọ jẹ te gwọlọ gbẹ ta kpahe Jihova ha. Odẹ riẹ Jerimaya. Joma wuhrẹ kpahe iẹe.

Nọ Jerimaya ọ jọ ọmaha, Jihova ọ ta kẹe nọ ọ vuẹ ahwo na inọ a gbe ru eware iyoma ha. Jerimaya o roro nọ ọ te sai ru ere he, yọ ozọ u je mu ei. Ọ ta kẹ Jihova nọ: ‘Mẹ riẹ ẹme nọ mẹ rẹ ta ha. Mẹ ọmaha.’ Rekọ Jihova ọ tẹ ta kẹe nọ: ‘Ozọ u mu owhẹ hẹ. Me ti fi obọ họ kẹ owhẹ.’

 Fikiere Jerimaya ọ tẹ ta kẹ ahwo na nọ a gbẹ siọ eware iyoma ba ha, Ọghẹnẹ ọ te kẹ ae uye. Kọ who roro nọ ahwo na a ru oware nọ Jerimaya ọ ta?— Ijo. A jẹ hwẹ Jerimaya, yọ eva riẹ e jẹ dha ae gaga. Ejọ dede a jẹ gwọlọ kpei no. Ẹvẹ who roro nọ o jọ kẹ Jerimaya?— Ozọ u je mu ei, ọ tẹ ta nọ: ‘Mẹ gbẹ te ta kpahe Jihova vievie he.’ Kọ ọ ginẹ seba?— Ijo, o ru ere he. O you Jihova gaga, fikiere ọ sae siọ ẹme riẹ ba ẹta ha. Yọ onana u ru nọ Jihova ọ rọ sẹro riẹ.

Wọhọ oriruo, ẹdẹjọ ahwo oyoma jọ a gbolo Jerimaya fihọ ọgọdọ okokodo jọ nọ ọloho ọ vọ. Ọ jẹ ruẹ emu re hayo ruẹ ame da ha. Ahwo oyoma na a gwọlọ nọ Jerimaya o whu fihọ etẹe. Rekọ Jihova o fi obọ họ kẹe no etẹe ze.

Eme who wuhrẹ no iku Jerimaya na ze?— Dede nọ ozọ u je mu ei ẹsejọ , ọ jẹ ta kpahe Jihova ghele. Nọ whọ tẹ be ta kẹ ahwo kpahe Jihova, ẹsejọ a rẹ hwẹ owhẹ hayo eva ra e rẹ dha ae. Onana o sae lẹliẹ oma vuọ owhẹ hayo ru ozọ mu owhẹ dede. Rekọ whọ siọ Jihova ba ẹta kpahe vievie he. O ti fi obọ họ kẹ owhẹ ẹsikpobi wọhọ epanọ o ru kẹ Jerimaya na.