Kọ oke kpobi o rẹ jọ lọlọhọ re who yoẹme kẹ ọsẹgboni ra?— O rẹ lọhọ tere ẹsejọ họ. Kọ whọ riẹ nọ Jesu o yoẹme kẹ Jihova gbe ọsẹgboni riẹ?— Whọ tẹ rọ aro kele Jesu, u ti ru nọ who ti ro yoẹme kẹ ọsẹgboni ra dede nọ o rẹ lọhọ ẹsejọ họ. Joma wuhrẹ kpahe onana.

Taure Jesu ọ tẹ te ziọ otọakpọ, ọ jọ kugbe Ọsẹ riẹ, Jihova, evaọ obọ odhiwu. Rekọ Jesu o wo ọsẹgboni evaọ otọakpọ. Edẹ rai Josẹf avọ Meri. Kọ whọ riẹ epanọ a ro zihe ruọ ọsẹgboni riẹ?—

Jihova o fi uzuazọ Jesu họ eva Meri, kẹsena Meri o te yẹe evaọ obọ otọakpọ obonẹ. Onana u gbunu gaga. Jesu ọ tẹ jọ eva Meri rro wọhọ epanọ emọ efa a rẹ jọ eva oni rai rro na. Nọ emerae izii e gba no, a te yẹ Jesu. Enẹ Meri avọ Josẹf a ro zihe ruọ ọsẹgboni Jesu evaọ obọ otọakpọ obonẹ.

Nọ Jesu ọ jọ ikpe 12, o te ru oware jọ nọ u dhesẹ nọ o you Jihova gaga. Oware nana o via evaọ okenọ Jesu avọ ahwo uviuwou riẹ a kpobọ Jerusalẹm rọkẹ ehaa Ọnyavrẹ na. Nọ a je zihe kpo, Josẹf avọ Meri a gbẹ ruẹ Jesu hu. Kọ whọ riẹ obonọ ọ jọ?—

Josẹf avọ Meri a tẹ wariẹ dhẹ zihe kpobọ Jerusalẹm nyae gwọlọ Jesu. A jẹ ruawa gaga keme a jẹ kake ruẹ e riẹ hẹ. Rekọ nọ a gwọlọ iẹe edẹ esa soso no, a tẹ ruẹ e riẹ evaọ obọ etẹmpol. Kọ whọ riẹ oware nọ Jesu ọ rọ jọ obọ etẹmpol?— Fikinọ ọ sae jọ obei wuhrẹ kpahe Ọsẹ riẹ, Jihova. O you Jihova gaga, yọ ọ gwọlọ wuhrẹ oghẹrẹ nọ o re ro ru eva were iẹe. Makọ okenọ Jesu ọ rro te ọzae no dede, o yoẹme kẹ Jihova ẹsikpobi. Dede nọ Jesu ọ riẹ nọ o te yoẹme o te lẹliẹe ruẹ uye ẹsejọ, o yoẹme ghele. Kọ Jesu o je yoẹme kẹ Josẹf avọ Meri?— Ee, Ebaibol ọ ta nọ o ru ere.

Eme who wuhrẹ no iku Jesu na ze?— U fo nọ who yoẹme kẹ ọsẹgboni ra, dede nọ o rẹ lọhọ tere ẹsejọ họ. Kọ who ti ru ere?—