UWUHRẸ 13
O jẹ Were Timoti re O Fi Obọ Họ kẹ Ahwo
O jẹ hae were Timoti re o fi obọ họ kẹ ahwo ẹsikpobi. O kpohọ eria sa-sa re ọ sai ru onana. Fikiere eva e jẹ were iẹe ẹsikpobi. Kọ o gbẹ te were owhẹ re who wuhrẹ kpahe Timoti?—
Oni Timoti avọ oni ologbo riẹ a wuhrẹ Timoti kpahe Jihova
Ẹwho Listra a jọ yọrọ Timoti. Nọ ọ gbẹ jọ ọmaha, oni riẹ Yunisi avọ oni ologbo riẹ nọ a re se Lọis, a te je wuhrẹ iẹe kpahe Jihova. Nọ Timoti ọ be rro ze na, o tẹ jẹ were iẹe re o wuhrẹ amọfa kpahe Jihova.
Okenọ Timoti ọ gbẹ jọ ọmọzae, Pọl ọ tẹ ta kẹe nọ o lele iei kpohọ ewho efa nyae ta usiuwoma. Timoti ọ tẹ rọwo nọ o re gine lele iei re o fi obọ họ kẹ amọfa.
Timoti o te lele Pọl kpohọ ẹwho nọ a re se Tẹsalonika evaọ Masidonia. Re a sai te obei, a rọ owotọ nya ugbothabọ te oria jọ, a tẹ ruọ okọ no etẹe vrẹ. Nọ a te obei, a fi obọ họ kẹ ahwo buobu riẹ kpahe Jihova. Rekọ eva rai e jẹ dha ahwo jọ, a tẹ jẹ gwọlọ họrọ ae. Onana u te ru nọ Pọl avọ Timoti a ro no etẹe kpohọ oria ofa nyae ta usiuwoma.
Eva e jẹ were Timoti ẹsikpobi
Nọ emerae jọ e vrẹ no, Pọl ọ tẹ ta kẹ Timoti nọ ọ wariẹ zihe kpobọ Tẹsalonika re ọ nyae ruẹ inievo na. Re Timoti ọ sai zihe kpohọ ẹwho oyoma yena, o gwọlọ nọ ọ rẹ gudu. Rekọ Timoti ọ nya keme ọ gwọlọ ruẹ inievo nọ e rrọ obei na. O zihe bru Pọl ze avọ eva nọ e jẹ were iẹe. Ọ tẹ ta kẹ Pọl nọ inievo nọ e rrọ obọ Tẹsalonika a be daoma ziezi.
Timoti o lele Pọl kpohọ usiuwoma ota ikpe buobu. Okejọ Pọl o kere nọ Timoti yọ emamọ ohwo nọ ọ rẹ sai vi kpohọ ikoko re o fi obọ họ kẹ inievo na. Timoti o you Jihova gbe ahwo gaga.
Kọ who you ahwo jẹ gwọlọ fi obọ họ kẹ ae riẹ kpahe Jihova?— Who te ru ere, eva e te were owhẹ gaga wọhọ epanọ eva e jẹ were Timoti na.
