Rebeka o you Jihova gaga. Odẹ ọzae riẹ họ Aiziki. Aiziki o you Jihova re. Ẹvẹ Rebeka avọ Aiziki a rọ riẹ ohwohwo? Ẹvẹ Rebeka o ro dhesẹ nọ ọ gwọlọ ru eva were Jihova? Joma wuhrẹ eware efa kpahe Rebeka.

Abraham avọ Sera họ ọsẹgboni Aiziki. Ẹwho nọ a re se Kenan a jẹ rria. Ahwo Kenan a jẹ gọ Jihova ha. Rekọ Abraham ọ gwọlọ nọ ọmọ riẹ o wo aye nọ ọ be gọ Jihova. Fikiere o te vi odibo riẹ jọ re ọ nyae gwọlọ aye kẹ Aiziki evaọ ẹwho nọ a re se Heran, oria nọ imoni Abraham jọ a jẹ rria. O sae jọnọ Ẹlieza họ odibo riẹ nọ o vi na.

Idibo Abraham efa a lele Ẹlieza re. Oria na u thabọ gaga. A wha ekamẹle ikpe lele oma nọ e wọ emu nọ a te re gbe eware nọ a te rọ kẹ okẹ. Rekọ ẹvẹ Ẹlieza ọ te sae rọ riẹ aye nọ o re wo kẹ Aiziki? Nọ Ẹlieza avọ idibo edekọ na a te Heran, a tẹ daji oria jọ nọ ozae o rrọ, keme ọ riẹ nọ ahwo a te nyaze ti vo ame evaọ ozae na. Ọ tẹ lẹ se Jihova nọ: ‘Ọmọtẹ nọ mẹ te ta kẹ nọ, ivie kẹ omẹ ame da, ọ vẹ kẹ omẹ, jẹ kẹ ekamẹle mẹ da re, ọye mẹ te riẹ nọ whọ salọ kẹ Aiziki odibo ra.’

U kri hi, Rebeka ọ tẹ nyaze ozae na ti vo ame. Ebaibol na ọ ta nọ o wo erru gaga. Nọ Ẹlieza ọ ta kẹ Rebeka nọ ọ kẹe  ame re ọ da, Rebeka ọ tẹ ta nọ: ‘Mi whọ da. Me ti vo ame kẹ ekamẹle ra da re.’ Dai roro iei. Ekamẹle nọ uruame u bi kpe, a rẹ da ame gaga, fikiere Rebeka ọ dhẹ kpohọ ozae na nyai vo ame unuẹse buobu. Kọ whọ be ruẹ epanọ o bi ru iruo ga te evaọ uwoho na?— Oghẹrẹ nọ Jihova o ro yo olẹ Ẹlieza, u gbe rie unu.

Ẹlieza ọ kẹ Rebeka ekẹ iwoma buobu. Rebeka ọ tẹ ta nọ Ẹlieza avọ idibo edekọ na a lele iei kpobọ uwou. Ẹlieza ọ tẹ fodẹ oware nọ Abraham o vi rie ze ti ru, gbe epanọ Jihova o ro yo olẹ riẹ. O were ọsẹgboni Rebeka re ọ rehọ Aiziki.

Kọ who roro nọ o were Rebeka re ọ rehọ Aiziki?— Rebeka ọ riẹ nọ Jihova o vi Ẹlieza ze. Fikiere nọ a nọ Rebeka sọ o were riẹ nọ o re lele amọ Ẹlieza kpobọ Kenan re ọ rehọ Aiziki, o te yo nọ: ‘Ee, o were omẹ, mẹ be nya.’ Ọ tẹ nwani lele amọ Ẹlieza ruọ edhere. Nọ a te obei, ọ tẹ rehọ Aiziki.

Jihova ọ ghale Rebeka fikinọ o ru oware nọ Jihova ọ gwọlọ nọ o ru. Rebeka ọ jọ usu ini-ilogbo Jesu. Who te bi ru eva were Jihova wọhọ epanọ Rebeka o ru na, Jihova ọ te ghale owhẹ re.