EPANỌ A RE RO MU ẸME HỌ
UWUHRẸ AVỌ 5
Ma Ẹme Ra Te
Oware nọ Ebaibol ọ ta: “Jọ eme rai e hae jọ wowou ẹsikpobi.”—Kọl. 4:6.
Oware nọ Pọl O Ru
1. Rri IVIDIO na, hayo se Iruẹru Ikọ 17:22, 23. Kẹsena whọ vẹ kẹ iyo enọ nọ e rrọ obotọ na:
-
Ẹvẹ o jọ kẹ Pọl nọ ọ ruẹ emedhọ nọ e vọ Athẹns? —Rri Iruẹru 17:16.
-
O make rọnọ Pọl ọ ta eme nọ i dhesẹ nọ orọ ahwo Athẹns na u re no ho, oghẹrẹ vẹ ọ rọ rehọ areghẹ rọ eware nọ a rọwo ta usi uwoma kẹ ae?
Eme Ma Wuhrẹ Mi Pọl?
2. Ahwo a te mae gaviezọ kẹ omai nọ ma tẹ romatotọ roro ẹme nọ ma te ta, oghẹrẹ nọ ma te rọ tae, gbe okenọ ma rẹ rọ tae.
Rọ Aro Kele Pọl
3. Rorote ziezi re whọ sae ta eme nọ e rẹ were ahwo ezọ. Wọhọ oriruo, nọ who te bi lele ohwo nọ ọ rrọ Oleleikristi hi ta ẹme, whọ rẹ sai nwene oghẹrẹ nọ whọ rẹ rọ ta ẹme te Ebaibol na hayo Jesu.
4. Whọ kpọ ohwo họ vẹrẹ vẹrẹ hẹ. Kẹ ohwo na uvẹ re ọ ta ẹme nọ ọ riẹe eva. Nọ ohwo na ọ tẹ ta ẹme jọ nọ ọ rọwokugbe Ebaibol na ha, who lele iei vro avro ho. (Jem. 1:19) Gaviezọ kẹe re whọ sae riẹ epanọ o rri ẹme na.—Itẹ 20:5.
5. Rọwo fihọ ẹme ohwo na je jiri ei nọ u te fo ere. O sae jọ nọ ọ rọwo nọ eware nọ a bi wuhrẹ iẹe evaọ egagọ riẹ na e gba. Fikiere, kake ta ẹme kpahe eware nọ whai imava wha jọ rọwokugbe, kẹsena whọ vẹ rọ ẹmẹrera fiobọhọ kẹe riẹ oware nọ Ebaibol na o gine wuhrẹ.
