NỌ UDU u te bi brukpe ohwo o sae jọ owha ogbẹgbẹdẹ nọ o rẹ whọlọ ohwo oma fihotọ. Devidi o kere nọ: “Eyoma mẹ o kie ruru uzou mẹ wọhọ owha ogbẹgbẹdẹ; o gbẹdẹ vi omẹ.” (Olezi 38:4) Ọkora ọgaga o kpe Ileleikristi jọ kuotọ no, fikinọ a bi roro nọ Jihova ọ sae rọvrẹ rai vievie he. (2 Ahwo Kọrint 2:7) Kọ ere o ginẹ rrọ? O tẹ make rọnọ whọ raha izi ilogbo dede, kọ whe thabọ no Jihova te epanọ ọ gbẹ sae rọvrẹ owhẹ vievie he no? Ijo, o rrọ ere he!

Nọ erahaizi i te kurẹriẹ, Jihova o re gbabọkẹ ae he. Ọ rẹ tubẹ gwọlọ ae dede! Evaọ ọtadhesẹ ọmọ ogbọfariẹ na, Jesu ọ rehọ Jihova dhesẹ ọsẹ nọ ọmọ riẹ ọ kwa no uwou ọ tẹ nyai yeri uzuazọ ofafariẹ. Oke jọ o vrẹ no, ọmọ na ọ tẹ jiroro nọ o re zihe kpobọ uwou ọsẹ riẹ. “Nọ [ọmọ na] ọ gbẹ jọ ugbothabọ, ọsẹ riẹ ọ tẹ kparo ruẹ e riẹ, ohrọ o tẹ riẹe, ọ tẹ dhẹ bru rie jẹ gbalọ iẹe, ọ tẹ nabe viọlọ iẹe.” (Luk 15:11-20) Kọ whọ gwọlọ si kẹle Jihova rekọ o rrọ owhẹ oma nọ whọ gbẹ rrọ “ugbothabọ” noi? Wọhọ ọsẹ nọ Jesu o dhesẹ evaọ ọtadhesẹ na, ohrọ ra o be re Jihova. Ọ be hẹrẹ epanọ o ti ro dede owhẹ zihe ze.

Kọ otẹrọnọ who bi roro nọ izieraha ra e rro hayo bu vi epanọ Jihova ọ sae rọvrẹ owhẹ? Iviena roro kpahe uzizie nọ Jihova ọ kẹ evaọ Aizaya 1:18: “Wha nyaze, ma jẹ iroro kugbe, enẹ ỌNOWO na ọ tae: dede nọ izieraha rai e ware wọhọ azẹ, e rẹ te fo wọhọ ukpoiwo.” Ẹhẹ, Jihova ọ sae rọ makọ izieraha nọ e wọhọ azẹ nọ o gbe ewu ọfuafo nọ o wọhọ nọ a sae fọrọ fo ho rọvrẹ ohwo.

Jihova ọ gwọlọ nọ whọ ruẹ uye udu nọ u re brukpe owhẹ ribri hi. Kọ ẹvẹ whọ sai ro wo erọvrẹ Jihova gbe udu ofuafo nọ u re ru oma fọ owhẹ? Roro kpahe eware ivẹ jọ nọ Devidi o ru. Orọ ọsosuọ, ọ ta nọ: “Mẹ rẹ ta izieraha mẹ via kẹ ỌNOWO na.” (Olezi 32:5) Kareghẹhọ nọ Jihova ọ kaki zizie owhẹ no inọ whọ lẹ sei re wha gbẹ “jẹ iroro kugbe,” koyehọ re whọ ruẹrẹhọ kugbei. Jẹ uzizie yena rehọ. Fa izieraha ra kẹ Jihova, jẹ ta eva ra kẹe. Fikinọ o via ere kẹe, Devidi ọ ta ududu nọ: ‘Ru omẹ fo no izieraha mẹ. Ẹzi uweri gbe eva-efuafo whẹ Ọghẹnẹ ọ rẹ jẹfiẹ hẹ.’​—Olezi 51:2, 17.

Orọ avivẹ, Devidi ọ jẹ obufihọ nọ ọruẹaro Ọghẹnẹ nọ a re se Netan ọ kẹ riẹ rehọ. (2 Samuẹle 12:13) Nẹnẹ, Jihova ọ kẹ omai ekpako ukoko nọ a wuhrẹ no re a fiobọhọ kẹ ahwo nọ a raha uzi nọ a kurẹriẹ re a wariẹ wo usu kugbe Jihova.  Whọ tẹ nyabru ekpako na, a te rehọ Ikereakere na gbe olẹ nọ a rẹ lẹ kugbe owhẹ ru udu ra totọ, ru owhẹ kpairoro vrẹ hayo si ekpehre iroro no eva, je fiobọhọ kẹ owhẹ wariẹ kru oma ga evaọ egagọ Jihova.​—Jemis 5:14-16.

Uzẹme, o sae jọ owhẹ oma nọ re whọ fa izieraha ra kẹ Jihova Ọghẹnẹ jẹ nyabru ekpako na yọ oware obẹbẹ gaga kẹ owhẹ. O wọhọ nọ o jọ Devidi oma ere re. Ọ kuọ izieraha riẹ dhere evaọ omoke jọ. (Olezi 32:3) Rekọ uwhremu na, nọ ọ fa izieraha riẹ je nwene o wha irere sei.

Erere ologbo jọ nọ o te Devidi họ, ọ wariẹ wo evawere. O kere nọ: “O ghale ohwo nọ a rehọ izieraha riẹ oke nọ u kpemu vrẹ, gbe ọnọ a ruru umuomu riẹ.” (Olezi 32:1) Ọ tẹ jẹ lẹ nọ: “ỌNOWO, rovie igbenu mẹ, re unu mẹ u dhesẹ ejiro ra via.” (Olezi 51:15) Fikinọ owha udu nọ u je brukpei na u no rie uzou no, yọ eva e were riẹ nọ Ọghẹnẹ ọ rọvrẹ riẹ, oma o tẹ wọ Devidi vuẹ amọfa kpahe Jihova.

Jihova ọ gwọlọ nọ who wo udu ofuafo nọ o rẹ lẹliẹ udu t’owhẹ otọ. Yọ ọ gwọlọ nọ whọ vuẹ amọfa kpahe ọyomariẹ gbe ẹjiroro riẹ, yọ orọnikọ avọ udu obrukpe he rekọ avọ eva efuafo gbe evawere. (Olezi 65:1-4) Kareghẹhọ nọ o bi se owhẹ inọ nyaze ‘re a rọ izieraha ra rọvrẹ owhẹ, re ezi omosasọ ọ ruẹsi no obọ Jihova omariẹ bru owhẹ ze.’​—Iruẹru Ikọ 3:19.

Ere o via kẹ Martha. Ọ ta nọ: “Ọmọzae mẹ ọ jẹ hai vi Uwou-Eroro gbe Awake! na se omẹ ẹsikpobi. Ẹmẹrera na, mẹ tẹ te wariẹ riẹ Jihova. Oware nọ o mae ga kẹ omẹ evaọ okenọ me je zihe ze họ re mẹ yare Jihova nọ ọ rehọ eware iyoma kpobi nọ me ru na rọvrẹ omẹ. Rekọ uwhremu na, mẹ tẹ te lẹ se Ọghẹnẹ jẹ lẹe nọ ọ rọvrẹ omẹ. O jẹ kaki mu omẹ ẹro ho inọ ikpe udhuvẹ soso e vrẹ taure me te zihe bru Jihova ze. Mẹ yọ oriruo nọ u dhesẹ inọ, ohwo ọ tẹ maki kie te ikpe buobu no, ọ sae wariẹ wo uvẹ nọ ọ rẹ rọ gọ Ọghẹnẹ, yọ Ọghẹnẹ ọ sae wariẹ you rie.”