KỌ ONIỌVO jọ evaọ ukoko na o ru owhẹ oware jọ nọ o da owhẹ gaga wọhọ epanọ o via kẹ Linda na? U yoma kẹhẹ inọ oware nọ amọfa a ru o kẹ ejọ uye te epanọ a ro siuke kpemu evaọ egagọ Ọghẹnẹ. Kọ ere o via kẹ owhẹ?

Uzẹme, o rẹ sae jọ bẹbẹ gaga re ma rọvrẹ ibe ọg’Ọghẹnẹ nọ o ru omai eva dha. Eme o gbẹ jọ ere he, ma riẹ nọ u fo re Ileleikristi a you ohwohwo! (Jọn 13:34, 35) Otẹrọnọ oniọvo jọ o ru omai thọ, o rẹ sae da gaga.​—Olezi 55:12.

Ebaibol na dede o dhesẹ nọ ẹsejọ Oleleikristi ọ sai ru ibe Oleleikristi riẹ “oware jọ nọ u re ru ei go.” (Ahwo Kọlọsi 3:13) Ghele na, otẹrọnọ mai dẹẹ onana o via kẹ, o sae jọ bẹbẹ re ma kpairoro vrẹ. Kọ oware jọ o riẹ nọ u re fiobọhọ kẹ omai? Roro kpahe eware esa jọ nọ Ebaibol na o wuhrẹ omai:

Ọsẹ Obọ Odhiwu Mai Ọ be Ruẹ Oware Kpobi. Jihova o bi muẹrohọ oware kpobi nọ o be via, te eware nọ a bi jo kienyẹ omai gbe uye nọ u bi noi ze. (Ahwo Hibru 4:13) Ofariẹ, o rẹ da Jihova nọ uye o tẹ be bẹ omai. (Aizaya 63:9) Ọ rẹ kuvẹ re “uye hayo idhọvẹ,” hayo odibo riẹ ọfa ọ “hẹriẹ omai no uyoyou [Riẹ] hẹ.” (Ahwo Rom 8:35, 38, 39) Kọ onana o gbẹ wọ omai ru epọvo na, nọ ma gbẹ kuvẹ re oware jọ hayo ohwo jọ ọ hẹriẹ omai no Jihova ha?

Ohwo ọ tẹ rọvrẹ orọnikọ u dhesẹ nọ oware uyoma o rẹ were iẹe he. Ma tẹ rọvrẹ ahwo nọ a ru omai thọ, orọnikọ u dhesẹ nọ ma rri iruthọ na kakao ho, hayo rri rai nọ i woma ha, hayo rri rai vo ho, hayo dhesẹ nọ e were omai hi. Kareghẹhọ, uzioraha o rẹ were Jihova vievie he, rekọ ọ rẹ rọvrẹ nọ ọ tẹ ruẹ ẹjiroro nọ o re ro ru ere. (Olezi 103:12, 13; Habakuk 1:13) Nọ ọ be tuduhọ omai awọ nọ ma rọvrẹ amọfa na, koyehọ ọ be ta nọ ma rọ aro kele ọyomariẹ. O re “muofu riẹ bẹdẹ hẹ.”​—Olezi 103:9; Matiu 6:14.

Ma te si ẹgo no eva, omobọ mai ma fiobọhọ kẹ. Ẹvẹ o rọ rrọ ere? Dai roro kpahe oriruo nana. Ma rehọ iẹe nọ whọ tọlọ utho nọ o gbẹdẹ hrọ họ, whọ tẹ riẹ obọ na. Nọ who te kru rie omoke kakao, obọ o te nwane rrọ owhẹ hẹ. Rekọ ẹvẹ o rẹ jọ nọ whọ tẹ riẹ obọ na ere krẹkri? Ẹvẹ who ti kru rie kri te re obọ o tẹ rrọ owhẹ; iminiti jọ? auwa ọvo? hayo kri viere? Ababọ avro, obọ na o te rrọ owhẹ gaga! Orọnikọ utho na o gbẹdẹ vi epanọ o kake jọ họ. Rekọ epanọ who kru rie kri te ere o rẹ gbẹdẹ owhẹ obọ te. Ere ọvona o rẹ jọ re nọ a te fi ẹgo họ eva. Epanọ ma fi ẹgo họ eva kri te, o tẹ make rrọ ẹmẹgo, ere ma rẹ nwa omobọ mai  oma te. Agbẹta nọ Jihova ọ be rọ tuduhọ omai awọ nọ ma si ẹgo no eva na. Ma te ru ere, omobọ mai ma fiobọhọ kẹ.​—Itẹ 11:17.

Eme o fiobọhọ kẹ Linda nọ o gbe ro fi ẹgo họ eva ha evaọ okenọ oniọvo jọ o ru ei thọ? Oware jọ họ, o roro kpahe ẹjiroro sa-sa nọ Ikereakere na e rọ ta nọ ma rọvrẹ amọfa. (Olezi 130:3, 4) Oware nọ o mai duobọte Linda họ evuhumu inọ ma tẹ rọvrẹ amọfa, Jihova ọ rẹ rọvrẹ omai re. (Ahwo Ẹfisọs 4:32–5:2) Enẹ ọ ta kpahe oghẹrẹ nọ eme nana i duobọtei te: “O wọhọ ẹsenọ Jihova ọ jẹ ta ẹme kẹ omẹ.”

Nọ oke o be nyaharo na, Linda o te si ẹgo no eva. Ọ tẹ rọvrẹ oniọvo-ọmọtẹ na, yọ enẹna oniọvo yena yọ emamọ ogbẹnyusu riẹ. Linda ọ gbẹ be gọ Jihova. Jọ u mu owhẹ ẹro nọ Jihova ọ gwọlọ fiobọhọ kẹ owhẹ ru epọvo na.