ABỌ 1
“Mẹ Rẹte Gwọlọ Ọnọ O Vru Na”
Ogodẹ na o reghe no. Epanọ ọ jẹ rọ re ẹbe na, ọ tẹ rọ oghẹrẹ jọ nyasiọ igodẹ nọ i kiọkọ ba. Whaọ ọ gbẹ be ruẹ uthuru na hayo othuru-igodẹ na ha. Oke u bi kpo no. Yọ ọye ọvo ọ rrọ ukiekpotọ nana nọ erao ijihẹ e vọ na. Ẹsiẹvo na, o te yo urru jọ nọ ọ riẹ, urru othuru-igodẹ na nọ ọ be dhẹ bru rie ze, ọ tẹ wọe, rehọ otogbo riẹ ruru ei, ọ tẹ woi kpo.
JIHOVA o dhesẹ omariẹ wọhọ othuru-igodẹ otiọye unuẹse buobu. Ọ jọ Ẹme riẹ kẹ omai imuẹro nọ: “Mẹ ọvo ọ rẹ te gwọlọ igodẹ mẹ na, mẹ vẹ te [rẹrote, NW] ae.”—Izikiẹl 34:11, 12.
“Igodẹ nọ Mẹ be Rẹrote”
Amono họ igodẹ Jihova? Igodẹ Jihova họ ahwo nọ a you rie jẹ be gọe. Ebaibol ọ ta nọ: “Wha nyaze ma gọ e, ma kiekpotọ, re ma diguẹ obọ aro ỌNOWO, ọnọ ọ ma omai! Keme ọye họ Ọghẹnẹ mai, mai họ ahwo riẹ nọ ọ rẹ kuọ, gbe igodẹ nọ e rọ obọ riẹ.” (Olezi 95:6, 7) Wọhọ igodẹ gheghe nọ i re lele othuru-igodẹ, o rrọ idibo Jihova oja nọ a re lele Othuru rai. Kọ a rrọ ahwo nọ oware o rẹ thobọ họ? Ijo. U wo ẹsejọ nọ idibo Ọghẹnẹ e jọ igodẹ nọ “e vaha abọ,” nọ “i vru” jẹ “jọ wọhọ igodẹ nọ i bi vru.” (Izikiẹl 34:12; Matiu 15:24; 1 Pita 2:25) O make rrọ ere na, nọ ohwo o te reghe vrẹ, Jihova o re gbabọkẹ ẹe he inọ u re kẹe no.
Kọ who roro nọ Jihova ọ gbẹ be sẹro ra wọhọ Othuru-igodẹ? Ẹvẹ Jihova o bi ro dhesẹ nọ ọ rrọ Othuru-igodẹ nẹnẹ? Joma ta kpahe eware esa:
Ọ be rọ ẹme riẹ kuọ omai. Jihova ọ ta nọ: “Mẹ rẹte rehọ emamọ ẹbe rọ kuọ ae, . . . etẹe a jẹ te keria totọ . . . , emamọ ẹbe a rẹte rọ kuoma.” (Izikiẹl 34:14) Jihova ọ be rehọ idhere sa-sa rọ eme riẹ kuọ omai evaọ ẹruoke nọ u re ru omai jọ poriẹporiẹ. Kọ whọ sae kareghẹhọ uzoẹme jọ evaọ ebe mai, ẹme jọ nọ a ru, hayo ividio mai jọ nọ u fiobọhọ kẹ owhẹ evaọ oware jọ nọ whọ lẹ kẹ? Kọ o gbẹ kẹ owhẹ imuẹro inọ Jihova ọ be daezọ ra?
Ọ be thọ omai je fiobọhọ kẹ omai. Jihova ọ ya eyaa nọ: “Mẹ vẹte rehọ ọnọ ọ nyathọ na ziheze, enọ e ko na mẹ vẹte gba eria rai nọ i wiri na, enọ oma o rọẹrọ me veti ru ai oma ga.” (Izikiẹl 34:16) Jihova o re ru enọ oma o lọhọ no fiki awaọruọ ga. Ọ rẹ gba oria nọ u wiri evaọ oma igodẹ riẹ re u kpo ruẹhọ, o tẹ make rọnọ ibe ọg’Ọghẹnẹ rai ọ nwa rai oma na. Ọ rẹ rehọ enọ e nyathọ zihe ze je fiobọhọ kẹ enọ i bi lele iroro ethọthọ muabọ.
Ọ rehọ e riẹ nọ owha-iruo riẹ o rrọ re ọ rẹrote omai. Jihova ọ ta nọ: “Me ve ti koko ai kpobi họ no eria nọ e vaha kpohọ ze.” Ọ tẹ jẹ ta nọ: “Mẹ rẹte gwọlọ ọnọ o vru na.” (Izikiẹl 34:12, 16) Rọkẹ Jihova, ogodẹ nọ o vru yọ o vru kufiẹ no ho. Nọ ogodẹ o te vru ọ rẹ riẹ, ọ rẹ gwọlọ ogodẹ na, yọ ọ rẹ ghọghọ nọ ọ tẹ ruẹ e riẹ. (Matiu 18:12-14) Ẹvẹ o gbẹ jọ ere he, binọ o se ahwo nọ a be gọe “igodẹ mẹ, igodẹ nọ mẹ be rẹrote.” (Izikiẹl 34:31) Whẹ yọ omọvo igodẹ yena.
Rọkẹ Jihova, ogodẹ nọ o vru yọ o vru kufiẹ no ho. Ọ rẹ ghọghọ nọ ọ tẹ ruẹ e riẹ
“Ru Edẹ Mai Epanọ E Jọ Oke Anwae”
Fikieme Jihova ọ be rọ gwọlọ owhẹ je bi se owhẹ nọ who zihe bru ei ze? Fikinọ ọ gwọlọ nọ who wo evawere. Ọ ya eyaa inọ o ti ru ‘eghale hwẹ ze wọhọ iso’ rọkẹ igodẹ riẹ. (Izikiẹl 34:26) Onana yọ eyaa ifofe vievie he. Whọ ruẹ imuẹro onana no.
Kareghẹhọ epanọ o jọ okenọ who mu Jihova họ ewuhrẹ kpahe obọ. Wọhọ oriruo, ẹvẹ oma o jọ owhẹ evaọ oke ọsosuọ nọ who wuhrẹ kpahe odẹ Ọghẹnẹ gbe ẹjiroro riẹ kẹ ahwo-akpọ? Kọ whọ kareghẹhọ eva nọ e jẹ hae were owhẹ nọ who te kuomagbe inievo na evaọ ikokohọ esese gbe ilogbo? Okenọ whọ tẹ sae ta usiuwoma kẹ ohwo jọ nọ ọ gaviezọ kẹ owhẹ, kọ oma o gbẹ jẹ hae were owhẹ nọ who te bi zihe kpo?
Whọ rẹ sae wariẹ wo evawere yena. Idibo Ọghẹnẹ evaọ oke anwae a lẹ nọ: “ỌNOWO, zihe omai rehọ, re ma ruẹse jọ epanọ ma jọ; re who ru edẹ mai epanọ e jọ oke anwae.” (Enuobro 5:21) Jihova ọ kuyo olẹ yena o te fiobọhọ kẹ ahwo riẹ zihe ze te gọe avọ evawere. (Nehemaya 8:17) Jihova o ti ru ere kẹ owhẹ re.
O make rrọ ere na, o mae lọhọ re a ta nọ zihe bru Jihova ze vi re whọ ginẹ jowọ na. Joma ta kpahe eware jọ nọ i re ru ei bẹbẹ gbe epanọ who re ro fi ai kparobọ.
