JỌ U mu owhẹ ẹro nọ Jihova ọ te jọ kugbe owhẹ nọ who bi zihe bru ei ze na. O ti fiobọhọ kẹ owhẹ họre awaọruọ, siọ evedha ba, je ti ru owhẹ wo udhedhẹ udu gbe orọ iroro nọ u re no udu ofuafo ze. Whọ vẹ te wariẹ wo ọwhọ nọ whọ rẹ rọ gọ Jihova kugbe amọfa nọ a be gọe. Uyero ra o te jọ wọhọ orọ Ileleikristi ikpe-udhusoi ọsosuọ jọ nọ Pita ukọ na o kere se nọ: “Wha jọ wọhọ igodẹ nọ i bi vru, rekọ enẹna wha zihe bru othuru-igodẹ gbe ọsẹro uzuazọ rai ze no.”—1 Pita 2:25.

Re who zihe bru Jihova ze họ oware nọ o mai woma nọ who re ru. Ẹvẹ o rọ rrọ ere? Whọ te rọ ere wha oghọghọ se Jihova. (Itẹ 27:11) Wọhọ epanọ whọ riẹ, oware nọ ma ru o sae wha evawere se Jihova hayo dae. Ghele na, orọnikọ Jihova ọ be gba omai họ nọ ma you rie hayo gọe he. (Iziewariẹ 30:19, 20) Enẹ ọzae jọ nọ ọ rẹ kiẹ eme Ebaibol o fi rie họ: “Ẹthẹ udu ohwo-akpọ o jọ obọ otafe wo obọ-ẹthẹ hẹ. Obeva whọ rẹ jọ rovie ei.” Ma tẹ be gọ Jihova fiki uyoyou nọ ma wo kẹe no udu ze, ma sai rovie ẹthẹ na. Ma vẹ te rọ ere kẹe obọdẹ okẹ, oye họ, udu mai kpobi nọ ma rẹ rọ gọe, yọ ma te wha oghọghọ ulogbo sei. Uzẹme o rrọ inọ, a sae rọ oware ovo wawọ evawere nọ ma re wo ho nọ ma tẹ be gọ Jihova evaọ oghẹrẹ nọ u fo.—Iruẹru Ikọ 20:35; Eviavia 4:11.

U te no ere no, nọ whọ tẹ wariẹ mu eware nọ Oleleikristi o re ru họ no, who ti wo evawere nọ u re no ẹriẹ Ọghẹnẹ ze. (Matiu 5:3) Evaọ oghẹrẹ vẹ? Ahwo buobu wariẹ akpọ na họ a be nọ inọ, ‘Fikieme ma rọ rrọ uzuazọ?’ A be gwọlọ iyo enọ kpahe ẹjiroro uzuazọ. Ahwo-akpọ a wo ẹgwọlọ nana keme Jihova ọ ma ẹgwọlọ yena fihọ ai oma. Ọ ma omai oghẹrẹ nọ ma rẹ rọ gọe avọ evawere. Oware nọ o rẹ mae kẹ omai evawere họ nọ ma tẹ riẹ nọ ma be gọ Jihova fikinọ ma you rie.—Olezi 63:1-5.

Iviena riẹ nọ Jihova ọ gwọlọ nọ who zihe bru ei ze. Ẹvẹ o sai ro mu owhẹ ẹro? Roro kpahe eware nana: A romatotọ kere ibroshọ nana avọ olẹ nọ a lẹ unuẹse buobu. Ẹsejọhọ ọkpako ukoko hayo ibe ọg’Ọghẹnẹ ra jọ ọ rehọ e riẹ se owhẹ. Oma o tẹ jẹ wọ owhẹ bi sei re who ru lele eware nọ a jariẹ ta. Enana kpobi i dhesẹ nọ whọ re thọrọ Jihova ẹro ho. Ukpoye, ọ be rọ ẹmẹrera si owhẹ zihe bru oma riẹ.—Jọn 6:44.

Oma o rẹ sae sasa omai nọ ma tẹ riẹ nọ idibo Jihova nọ i vru e rẹ thọrọ iẹe ẹro vievie he. Ere o jọ kẹ oniọvo-ọmọtẹ nọ a re se Donna. Ọ ta nọ: “Ẹmẹrera me ro no ukoko na, rekọ ẹsibuobu me je roro kpahe Olezi 139:23, 24, nọ o ta nọ: ‘Gwọlọ omẹ, O Ọghẹnẹ, re whọ riẹ iroro udu mẹ! Dawo omẹ re whọ riẹ ẹjiroro mẹ! Re who vuhu mu sọ mẹ rọ eva edhere umuomu, re who je su omẹ eva edhere ebẹdẹ!’ Mẹ riẹ nọ obọ akpọ na yọ oria mẹ hẹ, mẹ jẹ sai ru epanọ a bi ru dẹẹ hẹ, mẹ riẹ nọ ukoko Jihova họ oria nọ u fo nọ mẹ rẹ jọ. Me te ti muhọ evuhumu nọ Jihova ọ re nyasiọ omẹ ba ha; oware nọ o gwọlọ mi omẹ kpobi họ, me re zihe bru rie. Yọ eva e be were omẹ gaga nọ me ru ere!”

Ma be lẹ nọ whẹ oma ra whọ te wariẹ wo “evawere” nọ Jihova ọ rẹ kẹ. (Nehemaya 8:10) Whọ te vioja vievie he inọ who zihe bru Jihova ze.