Ezae avọ eyae nọ e talamu ohwohwo yọ ahwo nọ a re rri orọo rai ghaghae, a re rri rie wọhọ oware nọ ohwo ọ rẹ dhẹ no oke kpobi nọ u je rie he. Yọ onana u re ru udu te ai otọ inọ eware e tẹ make ga evaọ orọo na, a te dhẹ siọ ohwohwo ba ha.

Oware nọ u bi ru ezae-avọ-eyae jọ thihakọ evaọ orọo rai họ, a riẹ nọ a tẹ fa orọo na, ahwo uviuwou gbe egbẹnyusu rai a te rọ eme fa ae ovao. Rekọ oware nọ u fo nọ o rẹ lẹliẹ ae talamu ohwohwo họ, uyoyou gbe adhẹẹ nọ a wo kẹ ohwohwo.

EHRI-UZI EBAIBOL: “Ọzae ọ rẹ nyasiọ aye riẹ ba ha.”​—1 Ahwo Kọrint 7:11.

“Nọ who te rri orọo ra ghaghae, eva e te kake dha owhẹ hẹ nọ ọzae hayo aye ra ọ tẹ maki ru owhẹ oware jọ thọ. Yọ whọ te rọvrẹ riẹ hayo wounu kẹe ababọ oke-oraha. Nọ ebẹbẹ e tẹ make romavia, who ti rri rai wọhọ eware nọ e rẹ sae fa orọo na ha, rekọ wọhọ eware nọ a rẹ sai kuhọ.”​—Micah.

Nọ ọzae-avọ-aye nọ a talamu ohwohwo ho a te bi wo ebẹbẹ, oware nọ o rẹ jarai udu kpobi họ, ‘Ma fo ohwohwo vẹre he,’ a vẹ be gwọlọ epanọ a rẹ rọ dhẹ no orọo na.

“Ahwo buobu a tẹ be ruọ orọo obọ yọ a be nwane jọ iroro rai ta nọ eware e gbẹ riẹ nya ha a vẹ fa orọo na. Nọ ahwo a tẹ nwane rọ iroro itiena mu orọo họ, u re ru nọ a gbe ro rri orọo na ghaghae he.”​—Jean.

KIẸ OMARA RIWI

Nọ ẹwhọ ọ tẹ rrọ otọ . . .

• Kọ whọ be hae vioja nọ whọ riẹ whọ hae te ruọ orọo na ha?

• Kọ u wo ohwo jọ nọ whọ be hai roro kpahe inọ, ‘dodokọ ọye mẹ rehọ’?

• Kọ whọ be hae ta nọ, “Me ti no orọo na kẹ owhẹ,” hayo “Mẹ te gwọlọ omọfa nọ o kiehọ omẹ oma”?

Whọ tẹ nọ omara enọ nana, whọ jẹ ruẹ nọ whọ be hai ru ọjọ evaọ usu eware nana, o gwọlọ nọ who re ru epanọ whọ rẹ rọ talamu ọzae hayo aye ra ababọ oke-oraha.

REHỌ ENỌ NANA LELE IEI TA ẸME

• Me bi muẹrohọ nọ ma gbẹ nwani you ohwohwo te epaọ anwẹdẹ hẹ, kọ who muẹrohọ oware utioye no re? O tẹ rrọ ere, kọ eme ọ be whae ze?

• Eme ma re ru re uyoyou nọ ma wo kẹ ohwohwo o sae ga ziezi wọhọ epaọ ọsosuọ?

EWARE JỌ NỌ I RE FIOBỌHỌ

• Hai kere eme uyoyou se ọzae hayo aye ra ẹsejọ

• Fi uwoho riẹ họ oria iruo ra, whọ vẹ rọ ere dhesẹ nọ ọye ọvo whọ be tẹrovi

• Hae rehọ ifonu sei nọ whọ tẹ rrọ obọ iruo hayo oria ofa kpobi

EHRI-UZI EBAIBOL: “Onọ Ọghẹnẹ o kugbe no, ajọ ohwo ọvo ọ hẹriẹ iẹe he.”​—Matiu 19:6.