Utee nọ ohwo o fihọ kẹ omariẹ yọ oware nọ ọ rẹ jọ udu riẹ roro ọvo ho. Re ohwo ọ sai le utee tobọ, o gwọlọ nọ ọ rẹ ma omaa, yọ eware i te nwene, o re nwene lele ai, ọ vẹ jẹ daoma ru eware nọ i re fiobọhọ kẹe le utee na tobọ.

Oghẹrẹ itee jọ e riẹ nọ emedẹ jọ hayo eka jọ ọvo yọ who le rai tobọ no. Efa jọ e rẹ rehọ te emerae buobu, efa kọ ukpe ọvo hayo kri vrẹ ere. Re whọ sai le itee nọ e rẹ rehọ oke krẹkri na tobọ, kake rọ emesese nọ e rẹ rehọ oke he ro muhọ.

Whọ tẹ sai le itee nọ who fihọ tobọ, udu o rẹ jọ owhẹ awọ, ahwo a te gwọlọ jọ ogbẹnyusu ra, yọ eva e rẹ jẹ were owhẹ re.

U re ru udu jọ owhẹ awọ: Who te fi utee nọ a rẹ rehọ oke kpẹkpẹe le tobọ họ, whọ jẹ sai lei tobọ, who ti wo udu nọ who re ro fi itee nọ e rro viere họ kẹ omara. U ti je ru nọ udu o te rọ jọ owhẹ awọ nọ whọ tẹ maki wo ebẹbẹ. Wọhọ oriruo, ahwo a tẹ gwọlọ nọ who ru oware nọ u fo ho, whọ te gbaudu ru oware nọ u fo ghele.

U re ru owhẹ wo emamọ egbẹnyusu: Ohwo nọ o fi itee họ kẹ omariẹ evaọ uzuazọ jẹ be daoma epanọ o re ro le itee na tobọ ọ rẹ were ahwo. U te no ere no, whẹ avọ ohwo jọ wha te bi ru eware kugbe re wha sai le utee ovona tobọ, u re ru usu rai jọ kpekpekpe.

U re ru owhẹ wo evawere: Nọ who te fi utee họ jẹ sai lei tobọ, eva e rẹ were owhẹ nọ who le oware jọ tobọ no.

“Mẹ rẹ gwọlọ fi itee họ kẹ omamẹ gaga. U re ru nọ mẹ rẹ rọ riẹ eware nọ u fo nọ me re ru ẹsikpobi, mẹ gbẹ keria kufiẹ hẹ. Yọ me te gine le utee na tobọ, me je roro kpemu, eva ọvo e rẹ were omẹ. Mẹ rẹ ta kẹ omamẹ nọ, ‘Oware nọ mẹ gwọlọ u te omẹ obọ no.’”​—Christopher.

EHRI-UZI EBAIBOL: “Whọ tẹ be hẹrẹ re ovao ehru o ghariẹ kpobi tao, whọ te sae kọ oware ovo ho yọ whọ te sai vu oware ovo gbe he.”​—Ọtausiuwoma Na 11:4, Ebaibol Today’s English Version.

Who te ru eware nọ ma be te fodẹ na, u ti fiobọhọ kẹ owhẹ fi itee họ je le ai tobọ.

Riẹ eware nọ whọ gwọlọ ru. Kere eware nọ whọ gwọlọ ru fihotọ re whọ sae riẹ enọ whọ te kaki ru gbe enọ who ti ru whremu, whọ vẹ rọ ere ruẹrẹ ae họ othotha.

Ma omaa. Ru eware nọ ma be te fodẹ na kpahe itee nọ who fihọ na ọvuọvo:

• Fi oke họ nọ whọ sai ro le utee na tobọ.

• Ma omaa eware nọ who ti ru re whọ sai lei tobọ.

• Roro kpahe ebẹbẹ jọ nọ whọ rẹ sai nyaku gbe epanọ who ti ro fi ae kparobọ.

Mu eware na họ eru. Who du hẹrẹ bẹsenọ eware kpobi i re woma no re who te ti mu utee ra na họ ele he. Nọ omara nọ, ‘Eme họ oware ọsosuọ nọ u fo nọ me re ru re mẹ sai le utee mẹ na tobọ?’ Whọ tẹ riẹe no, who ve ru ei. Hai muẹrohọ epanọ whọ daoma te no nọ who bi le utee ra na.

EHRI-UZI EBAIBOL: “Omaa ohwo nọ o re kru obọ ga, o rẹ riẹ nya hrọ.”​—Itẹ 21:5.