Esẹgbini nọ avọ emọ rai a rẹ ta ẹme kugbe ziezi, a rẹ ta eva kẹ ohwohwo.

O rẹ sae jọ bẹbẹ re ọsẹgboni a ta ẹme kugbe ọmọ ziezi nọ o te te uzoge no. Okenọ emọ na a gbẹ jọ emaha, a rẹ ta eva rai kpobi kẹ owhẹ. Rekọ nọ a te te uzoge no a rẹ gbẹ gwọlọ ta eva tere he. Fikiere o rẹ jọ bẹbẹ re whọ riẹ oware nọ o ginẹ rrọ iroro rai. O rẹ wọhọ ẹsenọ wha dikihẹ ọvuọ abọ riẹ yọ ethẹ ologbo jọ ọ rrọ udevie rai. Rekọ o tẹ make rọnọ enẹ emọ ra a bi ru, oke nana o mae gwọlọ nọ wha rẹ ta ẹme kugbe.

Gaviezọ kẹ ai evaọ oke kpobi nọ a tẹ gwọlọ lele owhẹ ta ẹme. O tẹ make rọnọ udevie aso a gwọlọ lele owhẹ ta ẹme, gaviezọ kẹ ae.

“Ẹsejọhọ whọ te ta kẹ ae nọ, ‘Anwọ ohiohiẹ na whọ ta ẹme he kọ aso nana whọ gwọlọ ta ẹme kẹ omẹ?’ Kọ ọmọ na ọ gwọlọ ta eva kẹ owhẹ keleme? Kọ ogbẹrọnọ oware nọ ọsẹgboni kpobi ọ gwọlọ oye?”​—Lisa.

“Mẹ rẹ gwọlọ kaki kiẹzẹ gaga, rekọ unuẹse nọ mẹ avọ emọ mẹ ma ta ẹme ruọ udevie aso, ma mae rọ ta ẹme kugbe ziezi no.”​—Herbert.

EHRI-UZI EBAIBOL: “Jọ omomọvo ọ hae daoma ru oware nọ o rẹ kẹ omọfa erere orọnikọ omobọ riẹ hẹ.”​—1 Ahwo Kọrint 10:24.

Gaviezọ ziezi. Ọsẹ jọ ọ ta nọ: “Ẹsejọ nọ emọ mẹ a tẹ be ta ẹme kẹ omẹ, yọ mẹ be jọ iroro mẹ roro oware ofa. Yọ emọ na a rẹ riẹ inọ iroro mẹ e rrọ ẹme nọ a be ta na tere he!”

Otẹrọnọ ere o rẹ jọ kẹ owhẹ ẹsejọ re, daoma furie TV je fi ifonu hayo oware ofa kpobi nọ u bi ru nọ whọ gbẹ be sae rọ gaviezọ ziezi hi na họ otọ. Gaviezọ kẹ ẹme riẹ na ziezi. O tẹ make rọnọ ẹme nọ ọ be ta na yọ okpẹme ọvo ho, who rri rie evevere he.

“O gwọlọ nọ ma re ru re emọ mai a riẹ nọ oware nọ a be ta kẹ omai na ma se rie gboja. Nọ a te rri nọ ma bi se ẹme rai gboja ha, u ti ru nọ a gbẹ te rọ ta eva kẹ omai hi hayo nyae ta eva kẹ amọfa.”​—Maranda.

“Whọ nwane dha eva ha o tẹ make rọnọ areghẹ ọ rrọ ẹme nọ ọmọ ra ọ be ta na tere he.”​—Anthony.

EHRI-UZI EBAIBOL: “Wha muẹrohọ epanọ wha be gaviezọ.”​—Luk 8:18.

Rehọ uvẹ kpobi nọ u rovie fihọ lele ọmọ ra ta ẹme. Ẹsejọ oke gheghe emọ a rẹ mae gwọlọ ta eva vi ẹsenọ a se rai keria be nọ ae enọ.

“Ma re lele emọ mai ta ẹme gaga nọ ma tẹ rrọ eva omoto. Me muẹrohọ nọ mẹ avọ emọ mẹ ma tẹ rrọ omoto ma rẹ mae ta ẹme kugbe ziezi vi ẹsenọ ma tẹ rrọ obọ uwou nọ ma keria rẹriẹ ovao dhe ohwohwo.”​—Nicole.

Oke ofa jọ nọ wha sae rọ ta ẹme kugbe ziezi re họ, nọ wha tẹ be re emu.

“Nọ ma tẹ be re emu evaọ owọwọ, ohwo kpobi evaọ uwou na o re gbiku eware nọ e via ẹdẹ yena, te emamọ eware gbe ikpehre eware nọ e via kẹe. Onana u bi ru nọ okugbe ọ be rọ jọ uviuwou mai, u te je ru nọ ohwo kpobi evaọ uwou na ọ rọ riẹ nọ ọ tẹ maki wo ẹbẹbẹ, o wo ahwo nọ a re fiobọhọ kẹe.”​—Robin.

EHRI-UZI EBAIBOL: “Jọ ọnọ ọ rẹ kake gaviezọ, ọnọ ọ rẹ rọ okpakpa ta ẹme he.”​—Jemis 1:19.