RỌKẸ IZOGE
10: Jọ Ohwo nọ A re Fievahọ
OWARE NỌ U DHESẸ
O gwọlọ nọ ohwo o re ru eware jọ re ọsẹgboni riẹ, egbẹnyusu riẹ, gbe ohwo nọ o bi ru iruo kẹ a sai fievahọ iẹe. O re koko izi nọ a fihọ kẹe, o re ru eyaa nọ ọ ya gba, yọ ọ rẹ ta uzẹme ẹsikpobi.
OWARE NỌ U RO WUZOU
Taure a te ti gine fievahọ ohwo, o rẹ rehọ oke. Rekọ nọ a te fievahọ ohwo no, u re ru nọ a rẹ rọ kẹe uvẹ ru eware buobu.
“Re ọsẹgboni ra a sai gine fievahọ owhẹ, hai ru oware nọ u fo nọ a gbẹ make rrọ kugbe owhẹ hẹ.”—Sarahi.
EHRI-UZI EBAIBOL: “Wha hai dhesẹ oghẹrẹ ohwo nọ wha rrọ via.”—2 Ahwo Kọrint 13:5.
OWARE NỌ WHỌ RẸ SAI RU
Who te bi ru eware nọ ma be te ta kpahe na, u ti ru nọ ahwo nọ a gbe je fievahọ owhẹ vẹre he a ti ro fievahọ owhẹ hayo enọ i je fievahọ owhẹ vẹre a ve fievahọ owhẹ vi epaọ anwẹdẹ.
Hae ta uzẹme. Nọ ohwo nọ ahwo a fievahọ ọ tẹ nwani gu ọmọrue jọ, ahwo a gbe fievahọ iẹe he. Rekọ whọ tẹ be hai ta uzẹme, maero otẹrọnọ who ru oware jọ thọ, whọ jẹ ta uzẹme, u re ru nọ ahwo a re ro fievahọ owhẹ ziezi.
“Uzẹme o rẹ bẹ ẹta ha nọ who gbe ru oware ovo thọ họ. Rekọ who te ru oware jọ thọ, whọ jẹ ta uzẹme riẹ ghele, u re ru nọ ahwo a re ro fievahọ owhẹ vi epaọ anwẹdẹ dede.”—Caiman.
EHRI-UZI EBAIBOL: “Ma be gwọlọ ru eware kpobi avọ oruọzewọ.”—Ahwo Hibru 13:18.
Jọ ohwo nọ a rẹ rẹroso. Evaọ obọ America, a ru ọkiẹriwo jọ nọ a jọ nọ ahwo nọ a rẹ rehọ ahwo iruo oware jọ nọ a re rri nọ a tẹ gwọlọ rehọ ohwo iruo. A tẹ ghale ahwo na kpohọ abọ-akpe, enwenọ abọ eree e ta nọ oware jọ nọ u wuzou gaga nọ a re rri họ, ohwo na ọ rẹ jọ ohwo nọ a rẹ sae rẹroso. Whọ tẹ be daoma dhesẹ nọ whẹ yọ ohwo nọ a rẹ rẹroso enẹna, u ti fiobọhọ kẹ owhẹ gaga nọ whọ tẹ kpako no.
“Mẹ gbẹ hẹrẹ re ọsẹgboni mẹ a suọ omẹ ole taure me te ti ru iruo nọ a kẹ omẹ hẹ, a re muẹrohọ. Fikinọ mẹ be hae rọ iroro obọmẹ ro ru oware, u te ru nọ ọsẹgboni mẹ a bi ro fievahọ omẹ vi epaọ anwẹdẹ.”—Sarah.
EHRI-UZI EBAIBOL: “U mu omẹ ẹro nọ who ti ru epanọ mẹ ta na, . . . keme mẹ riẹ nọ who ti ru vi onọ mẹ ta na dede.”—Filimọn 21.
Thihakọ. Nọ ohwo ọ tẹ be rro, ahwo a re kri ẹriẹ hẹ; a rẹ ruẹ e riẹ vevẹ. Rekọ o rẹ rehọ oke re ahwo a tẹ te ruẹ nọ ohwo o bi wo areghẹ ze no.
“Who du roro nọ whọ tẹ nwani ru emamọ oware ẹsiẹvo jọ, ọsẹgboni ra gbe amọfa a vẹ nwani fievahọ owhẹ hẹ. Rekọ nọ whọ tẹ be hai ru oware utioye na kẹse kẹse, ẹmẹrera na, a ve ti fievahọ owhẹ.”—Brandon.
EHRI-UZI EBAIBOL: ‘Wha whẹ odiri họ oma.’—Ahwo Kọlọsi 3:12.
Enana E Sae jẹ Were Owhẹ
ENỌ IZOGE NA
Fikieme U Je Woma Re Whọ Jọ Ohwo Oruọzewọ?
Ogbẹrọnọ ahwo nọ a wo oruọzewọ họ eware i bi woma kẹ na?
EWARE NỌ A DRỌ FIHỌ EBỌDO ỌFUAFO
Ẹvẹ Mẹ Sae rọ Ta Eva kẹ Ọsẹgboni Mẹ?
Ẹvẹ whọ sai ro lele ọsẹgboni ra ta ẹme o tẹ make rọnọ o be ruọ owhẹ oma re who lele ai ta ẹme he?
