RỌKẸ EZAE-AVỌ-EYAE
3: Wha Wo Adhẹẹ kẹ Ohwohwo
OWARE NỌ U DHESẸ
Ọzae-avọ-aye nọ a wo adhẹẹ kẹ ohwohwo a rẹ daezọ ohwohwo ghele nọ a tẹ maki wo ẹmẹwhọ dede. Obe na, Ten Lessons to Transform Your Marriage (Eware Ikpe nọ I re Ru Orọo Ra Jọ Ziezi) o ta nọ: “U fo nọ ọzae-avọ-aye a re si ikẹ gaga ha inọ ‘a gbẹ rehọ ọmẹ hẹ, uzou o rẹ nya ha.’ Ukpoye u fo nọ a rẹ rọ ẹme na jiroro jẹ ta ọvuọ eva riẹ. Nọ a bi ru ere na yọ a be gaviezọ kẹ ohwohwo ziezi. Kẹsena a vẹ rọwo fihọ ọvo o tẹ make rọnọ ere a nwane gwọlọ vẹre he.”
EHRI-UZI EBAIBOL: “Uyoyou . . . o rẹ gwọlọ ewoma obọriẹ hẹ.”—1 Ahwo Kọrint 13:4, 5.
“Oghẹrẹ nọ me re ro dhesẹ nọ me wo adhẹẹ kẹ aye mẹ họ, me re rri rie ghaghae yọ mẹ rẹ gwọlọ ru oware ọvo nọ o rẹ dhae eva ha hayo nọ o rẹ sae raha orọo mai hi.”—Micah.
OWARE NỌ U RO WUZOU
Nọ ọzae-avọ-aye a gbe wo adhẹẹ kẹ ohwohwo ho, u re ru nọ a rẹ rọ wẹriẹ ohwohwo ẹme hayo ta emiẹsọ kẹ ohwohwo ẹsejọ dede. Yọ ahwo nọ a re ru ekiakiẹ a ta nọ ẹmẹrera na, iruemu itienana e rẹ sai ru nọ orọo na o rẹ rọ fa.
“Nọ ọzae ọ tẹ be hae rehọ aye riẹ jijehwẹ hayo ta emiẹsọ kẹe, u re ru nọ aye na o gbe ro fievahọ iẹe he je rri omariẹ kuẹku, yọ oyena o rẹ sae raha orọo kuotọ.”—Brian.
OWARE NỌ WHỌ RẸ SAI RU
KIẸ OMARA RIWI
Evaọ ẹkpoka jọ, daoma muẹrohọ epanọ whọ be hai ro lele ọzae hayo aye ra ta ẹme. Kẹsena whọ vẹ nọ omara nọ:
-
‘Bro ẹse mẹ ta eware nọ ọ be riẹ ru hu kẹe, kọ bro ẹse me jiri rie?’
-
‘Eware jọ vẹ me ru nọ i gine dhesẹ nọ me wo adhẹẹ kẹe?’
REHỌ ENỌ NANA LELE IEI TA ẸME
-
Eme ma rẹ sai ru hayo ta kẹ ohwohwo nọ i re dhesẹ nọ ma be ginẹ kẹ ohwohwo adhẹẹ?
-
Eme ma be hai ru hayo ta kẹ ohwohwo nọ i dhesẹ nọ ma wo adhẹẹ kẹ ohwohwo ho?
EWARE JỌ NỌ I RE FIOBỌHỌ
-
Kere eware esa jọ fihotọ nọ whọ gwọlọ nọ ọzae hayo aye ra ọ rẹ hai ru nọ i re dhesẹ nọ ọ be kẹ owhẹ adhẹẹ. Vuẹe nọ o kere itieye nọ ọ gwọlọ fihotọ re. Wha rehọ ọvuọ eware riẹ nọ wha kere na kẹ ohwohwo, wha vẹ daoma ru ai.
-
Kere iruemu ọzae hayo aye ra nọ e were owhẹ fihotọ. Kẹsena whọ vẹ vuẹe epanọ iruemu riẹ na e were owhẹ te.
“Oghẹrẹ nọ me re ro dhesẹ nọ mẹ be kẹ ọzae mẹ adhẹẹ họ, me re ru eware nọ ọ rẹ rọ riẹ nọ me rri rie ghaghae gaga yọ mẹ gwọlọ nọ eva e hae were iẹe. Orọnikọ ikpeware jọ mẹ be hai ru kẹe na ha. Ẹsibuobu emeware esese jọ me re ru ro dhesẹ kẹe nọ mẹ be ginẹ kẹe adhẹẹ.”—Megan.
Orọnikọ who te bi rri omara nọ whọ be hai ginẹ kẹ ọzae hayo aye ra adhẹẹ, oye u re dhesẹ nọ whọ be ginẹ kẹe adhẹẹ hẹ. Ukpoye, u fo nọ ọye họ ohwo nọ ọ rẹ jọ omariẹ riẹ jẹ ta nọ whọ be ginẹ kẹe adhẹẹ.
EHRI-UZI EBAIBOL: “Wha whẹ eware nana họ oma: ọdawẹ avọ uvi uyoyou, uwowou, omaurokpotọ, ẹwolẹ, gbe odiri.”—Ahwo Kọlọsi 3:12.
