Ahwo a re fievahọ ohwo nọ ọ rẹ gwọlọ ru oware. Nọ a tẹ kẹ ohwo otiọye na iruo, ọ rẹ riẹe ru yọ o re ru ei re evaọ ẹruoke.

Makọ emọ nọ e gbẹ maha dede, a sai wuhrẹ ae epanọ a rẹ riẹ oware ru ziezi. Obe na Parenting Without Borders o ta nọ: “Oke nọ ọmọ ọ tẹ gbẹ rrọ ukpe ọvo gbe emerae esa, o re ru oware nọ ọsẹgboni riẹ a ta kẹe inọ o ru, rekọ nọ ọ tẹ nwani te ukpe ọvo gbe emerae ezeza no, ọ rẹ gwọlọ rọ aro kele ọsẹgboni riẹ ru oware kpobi nọ a bi ru. Evaọ ewho jọ, esẹgbini a re mu emọ rai họ ewuhrẹ epanọ a re ru oware evaọ uwou nọ a tẹ rrọ umuo ikpe isoi rite ikpe ihrẹ. Dede nọ emọ itienana a gbẹ maha, a rẹ sai fiobọhọ ru eware sa-sa evaọ uwou.”

Evaọ ewho jọ, emoha buobu a rẹ gwọlọ kwa no uwou ọsẹgboni rai no re ae ọvo a rẹrote omarai, rekọ fikinọ eware e rrọ gaga kẹ ae, a vẹ wariẹ kwa zihe bru ọsẹgboni rai. Ẹsejọ oware nọ o rẹ wha onana ze họ, o sae jọnọ ọsẹgboni rai a wuhrẹ i rai epanọ a rẹ raha ugho ẹmẹrera ha, epanọ a rẹ rẹrote uwou ho hayo epanọ a rẹ riẹ oware ru ziezi hi.

Fikiere u fo nọ who re wuhrẹ ọmọ ra epanọ a re ru oware nọ ọ gbẹ maha na re ọ sae riẹ oware ru nọ ọ tẹ kpako no. Obe na How to Raise an Adult o ta nọ: “Whọ kuvẹ hẹ re emọ ra a keria yọ who bi ru oware kpobi, kẹsena nọ a jẹ kpako te ikpe ikpegberee no, who ve tunye ae vrẹ re a jọ orọ obọrai.”

Kẹe iruo nọ o re ru evaọ uwou.

OHRẸ EBAIBOL: “Erere o re no oghẹrẹ iruo egaga kpobi ze.”​—Itẹ 14:23.

Emaha a rẹ gwọlọ rọ aro kele esẹgbini rai ru oware kpobi nọ a bi ru. Fikiere whọ sae rọ uvẹ nana kẹ emọ ra iruo nọ a rẹ hai ru evaọ uwou.

Rekọ esẹgbini jọ a rẹ gwọlọ kẹ emọ rai iruo ru hu. A rẹ ta nọ a be kẹ emọ rai ihomwhọko buobu no obọ isukulu ze, fikiere a gbẹ gwọlọ kẹ ae iruo efa kugbe eyena ha.

Rekọ riẹ nọ emọ nọ i re ru iruo evaọ obọ uwou, ae a rẹ mae riẹ eware isukulu rai ru ziezi keme iruo obọ uwou na i re wuhrẹ ae epanọ a re ro mu iruo nọ a kẹ rai họ, a ve je ru ai re. Ofariẹ, obe na Parenting Without Borders o ta nọ: “Ma tẹ be hae se oke kpobi nọ emọ mai a tẹ gwọlọ fiobọhọ kẹ omai ru iruo, u re ru nọ a re ro roro nọ u wuzou ho re a fiobọhọ kẹ amọfa . . . A re je roro nọ amọfa a te hai ru oware kpobi nọ a gwọlọ kẹ ae.”

 Eme yena i dhesẹ nọ, iruo i re wuhrẹ emọ epanọ a re ro fiobọhọ kẹ amọfa viukpenọ a rẹ hẹrẹ re amọfa a hai ru eware kpobi kẹ ae. Iruo uwou nọ emọ a re ru i re fiobọhọ kẹ ae riẹ nọ oware nọ a bi ru u wuzou evaọ uviuwou rai, yọ u fo nọ a re ru ere ẹsikpobi.

Fiobọhọ kẹ emọ ra riẹ nọ oware jọ o re noi ze nọ a te ru oware thọ.

OHRẸ EBAIBOL: “Gaviezọ kẹ ohrẹ re whọ jẹ uthubro rehọ, re whọ ruẹsi wo areghẹ evaọ obaro.”​—Itẹ 19:20.

Nọ ọmọ ra o te ru oware jọ thọ, wọhọ oriruo nọ ọ tẹ rọ ethobọ raha oware omọfa, who du ko oware nọ ọmọ ra o ru na dhere he. Jọ ọmọ ra ọ riẹ nọ u fo nọ o re ru oware jọ kpahe oware nọ ọ raha na. Ọ sai wounu hayo ọ sai tubẹ wha oware nọ ọ raha na zihe.

Nọ emọ ra a tẹ riẹ nọ a re ru oware jọ oke kpobi nọ a ruthọ hayo nọ a gbẹ riẹ oware ru hu, onana u re wuhrẹ ae inọ u fo nọ

• a rẹ ta uzẹme jẹ rọwo nọ a te ruthọ

• a rẹ fo amọfa ha

• a re gu inoma ha

• a rẹ daoma wounu nọ o tẹ gwọlọ ere