A sai dhesẹ oma-onyẹ wọhọ epanọ ohwo ọ rẹ

• rọ odiri hẹrẹ oware

• gba omariẹ re ọ siọ oware jọ ba eru

• daoma ru oware dede nọ o were e riẹ hẹ

• rọ ẹgwọlọ amọfa karo viukpọ ẹgwọlọ omobọriẹ

Emọ nọ i wo oma-onyẹ a rẹ sae kaki kie kẹ odawọ họ, o tẹ make rọnọ emamọ oware jọ u ti te ae obọ nọ a te kie kẹ odawọ na. Rekọ emọ nọ a wo oma-onyẹ hẹ a rrọ ere he, keme a rẹ sae

• kaki muofu

• kake jọ ọkọkora

• kaki vovo ivovavovo hayo da udi vrẹ oma hayo tubẹ lọ imu egaga

• kake re oware kpobi nọ o te rai obọ

Ekiakiẹ jọ nọ a ru i dhesẹ nọ, emọ nọ i wo oma-onyẹ ziezi evaọ oke emaha rai, a rẹ kaki wo ẹbẹbẹ ẹyao gbe ẹbẹbẹ ugho tere he nọ a tẹ kpako no, yọ o rẹ lọhọ kẹ ae re a koko uzi. Yọ ekiakiẹ nana u ru nọ profẹsọ University of Pennsylvania jọ nọ a re se Angela Duckworth ọ rọ ta nọ: “A rẹ sae ta nọ ohwo o wo oma-onyẹ ‘ga hrọ họ.’”

Riẹ epanọ a rẹ ta nọ ijo, jẹ ruẹ nọ ijo ra yọ ijo.

OHRẸ EBAIBOL: “Jọ ‘Ee’ rai o jọ Ee, re ‘Ijo’ rai o jọ Ijo.”​—Matiu 5:37.

Emọ a rẹ gwọlọ viẹ je si ikẹ nọ a tẹ gwọlọ nọ esẹgbini rai a ru oware jọ kẹ ae, yọ a re ru onana evaọ iraro ahwo dede. Nọ esẹgbini a tẹ be hai ru oware nọ emọ rai a gwọlọ kẹ ae ẹsikpobi fikinọ a be viẹ je si ikẹ, kọ enẹ emọ na a te hai ru ẹsikpobi nọ a tẹ gwọlọ oware.

Rekọ nọ ọsẹgboni a tẹ ta nọ ijo jẹ ruẹ nọ ijo rai na yọ ijo, onana u re wuhrẹ emọ na oware jọ evaọ uzuazọ inọ, orọnikọ oware kpobi nọ a gwọlọ u re te ae obọ ẹsikpobi hi. Ọzae jọ nọ a re se Dr. David Walsh o kere nọ: “U gbunu gaga inọ ahwo nọ a wo oma-onyẹ, ae a rẹ mae were eva. Nọ ma te ru re emọ mai a roro nọ oware kpobi nọ a gwọlọ o rẹ sai te ae obọ, yọ ma bi fiobọhọ kẹ ae vievie he.” *

Nọ who gbe ru oware kpobi nọ ọmọ ra ọ gwọlọ kẹe he enẹna, u ti ru nọ o ti ro wo oma-onyẹ ẹdẹfa evaọ obaro. Wọhọ oriruo, ọ te se nọ a tẹ gwọlọ viẹe họ re ọ lọ imu egaga, lele ohwo jọ wezẹ hayo ru eware efa nọ e rẹ sae wha enwoma se ei.

 Fiobọhọ kẹ emọ ra riẹ oware nọ u re noi ze nọ a te ru oware uwoma hayo uyoma.

OHRẸ EBAIBOL: “Oware kpobi nọ ohwo ọ be kọ, oye o ti vu re.”​—Ahwo Galesha 6:7.

U fo nọ who re wuhrẹ ọmọ ra re ọ riẹ nọ oware kpobi nọ o ru, oware jọ u re noi ze. Yọ o gbe dhesẹ oma-onyẹ hẹ, ekpehre oware o sai noi ze. Wọhọ oriruo, otẹrọnọ ọmọ ra ọ rẹ sae kpọ ofu riẹ hẹ nọ eva e tẹ be dhae, o sai ru nọ ahwo buobu a rẹ rọ kẹnoma kẹe. Rekọ otẹrọnọ ọ rẹ kpọ ofu riẹ nọ a tẹ maki ru ei eva dha, hayo hẹrẹ viukpenọ o re bru ẹme dhe ahwo unu, o sai ru nọ eva riẹ e rẹ rọ were ahwo. Fiobọhọ kẹ ọmọ ra riẹ nọ eware e rẹ mai kiehọ nọ ọ tẹ be hae daoma dhesẹ oma-onyẹ ẹsikpobi.

Wuhrẹ ọmọ ra re ọ riẹ eware nọ e mai wuzou.

OHRẸ EBAIBOL: “Vuhu eware nọ e mae roja.”​—Ahwo Filipai 1:10.

Oma-onyẹ o re fiobọhọ kẹ omai whaha oware uyoma je ru oware nọ u fo o tẹ make rọnọ o were omai hi. O gwọlọ nọ ọmọ ra ọ rẹ riẹ eware nọ e mai wuzou kẹ omariẹ jẹ daoma ru ai. Wọhọ oriruo, u fo nọ o re ru ihomwhọko riẹ no taure ọ tẹ te nyae zaharo.

Fi emamọ oriruo họ otọ kẹe.

OHRẸ EBAIBOL: “Me bi fi oriruo họ otọ kẹ owhai, re epanọ me ru kẹ owhai na, wha ru ere re.”​—Jọn 13:15.

Riẹ nọ ọmọ ra ọ te ruẹ oware nọ who ti ru nọ a te ru owhẹ oware jọ nọ o kẹ owhẹ uye. Fi emamọ oriruo họ otọ re ọmọ ra ọ ruẹ nọ, emamọ oware o re noi ze nọ ma te dhesẹ oma-onyẹ. Wọhọ oriruo, nọ ọmọ ra o te ru oware jọ nọ o dha owhẹ eva, kọ whọ te ta ẹme kẹe avọ ofu, manikọ whọ te rọ uvo owowolẹ rọ ta ẹme kẹe?