Ahwo nọ a riẹ oware nọ u woma gbe onọ u woma ha a re vuhu ohẹriẹ nọ o rrọ oware nọ u kiehọ gbe onọ u kiehọ họ. Orọnikọ onọ udu rai o vuẹ rai a rẹ rọ jiroro oware nọ u woma hayo onọ u yoma ha. Ukpoye, ehrẹ nọ a re fievahọ a re rri rọ jiroro oware nọ u fo nọ a re ru, o tẹ make rọnọ ohwo ọvo ọ rrọ kugbe ai hi.

Emọ a re yo eware sa-sa nọ e rrọ uzẹme he kpahe oware nọ u kiehọ gbe onọ kiehọ họ. A sai yo eware nana mi ibe emọ-isukulu rai, ile nọ a be gaviezọ kẹ hayo oghẹrẹ ifimu gbe eware nọ a bi rri evaọ etẹlẹvisiọno. Eware nana i re ru nọ a re ro wo avro sọ eware nọ a bi wuhrẹ ai kpahe oware nọ u kiehọ gbe onọ u kiehọ họ ginọ uzẹme.

Izoge a rẹ mai wo ẹbẹbẹ nana. Taure oke yena o te ti te, obe na Beyond the Big Talk o ta nọ o gwọlọ nọ a “rẹ riẹ nọ ahwo buobu gbe eware nọ a ti rri evaọ TV gbe itanẹte i ti ru nọ a te rọ gwọlọ jọ wọhọ ehwa rai re a ruẹse riẹ ae ziezi, yọ u fo nọ a re wuhrẹ epanọ a rẹ jiroro kẹ omarai re a ru oware nọ u kiehọ, o tẹ make rọnọ iroro nọ a jẹ na o te were egbẹnyusu rai hi.” Fikiere o gwọlọ nọ esẹgbini a re mu emọ rai họ ewuhrẹ taure a tẹ te kpako te izoge.

Dhesẹ oware nọ u woma gbe onọ u woma ha kẹ ae vevẹ.

OHRẸ EBAIBOL: “Ahwo nọ a kpako, enọ i wuhrẹ ẹgba orimuo rai no . . . a sai vuhu oware uwoma gbe uyoma.”​—Ahwo Hibru 5:14.

• Hai dhesẹ eware nọ i kiehọ gbe enọ i kiehọ họ vevẹ. Hai rọ eware nọ e be via kẹdẹ kẹdẹ ro dhesẹ onana. Wọhọ oriruo, whọ sae ta nọ: “Uruemu nana yọ uruemu oruọzewọ; rekọ oyena yọ uruemu oruọzewọ họ.” “Uruemu nana yọ uruemu omaurokpotọ; rekọ oyena yọ uruemu omaurokpotọ họ.” “Uruemu nana yọ uruemu wowou; rekọ oyena yọ uruemu wowou hu.” Ẹmẹrera na, ọmọ ra ọ vẹ te riẹ oware nọ u woma nọ a re ru gbe onọ u yoma nọ a re ru hu..

• Vuẹ ae oware nọ whọ rọ ta nọ oware jọ u woma hayo u yoma. Wọhọ oriruo, whọ sae nọ enọ wọhọ: Fikieme u ro fo nọ ohwo ọ rẹ ta uzẹme ẹsikpobi? Ẹvẹ ọrue nọ a re gu o sae rọ raha usu? Fikieme uji-utho u gbe ro woma ha? Nọ whọ tẹ be hae nọ ọmọ ra enọ nọ i re fiobọhọ kẹe roro ziezi, ọ vẹ te riẹ epanọ ohwo ọ sai ro vuhu oware uwoma gbe uyoma.

• Vuẹ ae irere nọ a ti wo nọ a tẹ riẹ oware nọ u woma jẹ be hai ru ei. Whọ sae ta kẹ ọmọ ra nọ: “Whọ tẹ be hai ta uzẹme, ahwo a re fievahọ owhẹ” hayo “Whọ tẹ rrọ wowou, o rẹ were amọfa re a jọ kugbe owhẹ.”

Ruẹ nọ ahwo uviuwou ra a be hae daoma ru oware nọ u woma.

OHRẸ EBAIBOL: “Wha hai dhesẹ oghẹrẹ ohwo nọ wha rrọ via.”​—2 Ahwo Kọrint 13:5.

• U fo nọ ahwo uviuwou ra a re ru oware nọ wha riẹ nọ u woma, re whọ sae ta ududu nọ:

  •  “Ma re gu ọrue evaọ uviuwou mai hi.”

  • “Ma rẹ họre ohwohwo ho yọ ma re do ku ohwohwo ho.”

  • “Ma rẹ la eka ha, yọ ma rẹ kpahe ẹme ọgaga kẹ ohwohwo ho.”

Emọ ra a te ruẹ nọ orọnikọ unu ọvo whọ be rọ ta kẹ ae nọ a ru omamọ oware he, rekọ oware nọ ahwo uviuwou na soso a bi ru.

• Hae lele ọmọ ra ta ẹme kpahe emamọ uruemu nọ o gwọlọ nọ ahwo uviuwou ra a re dhesẹ ẹsikpobi. Hae rọ eware nọ e be via kẹdẹ kẹdẹ ro wuhrẹ ọmọ ra. Whọ sae rọ eware nọ wha riẹ nọ i woma rọ wawọ eware nọ ahwo a be ta nọ i woma evaọ TV hayo evaọ obọ isukulu. Nọ ọmọ ra inọ: “Orọnọ owhẹ, eme whọ hai ti ru?” “Oghẹrẹ vẹ ahwo uviuwou mai a hai ti ru ei?”

Fiobọhọ kẹ emọ ra re a gbaemu nọ a re ru oware nọ u woma.

OHRẸ EBAIBOL: “Wha sẹro emamọ obruoziẹ-iroro rai.”​—1 Pita 3:16.

• Jiri ae nọ a te dhesẹ emamọ uruemu. Nọ ọmọ ra o te dhesẹ emamọ uruemu evaọ oware jọ, jiri iei inọ ọ riẹ ru jẹ vuẹe oware nọ whọ rọ ta nọ oware nọ o ru na u kiehọ. Wọhọ oriruo, whọ sae ta nọ: “Whọ ta uzẹme evaọ oware nana. Eva ra e were omẹ gaga.” Nọ ọmọ ra ọ tẹ vuẹ owhẹ nọ o ru oware jọ thọ, kaki jiri iei nọ ọ rọ ta uzẹme kẹ owhẹ taure whọ tẹ te kpọe họ.

• Nọ ọmọ ra o te dhesẹ ekpehre uruemu, kpọe họ. Nọ emọ ra a te ru oware thọ, dhesẹ kẹ ae vevẹ nọ a ruthọ. U fo nọ emọ ra a rẹ riẹ oware nọ a ruthọ na gbe epanọ u ro wo ohẹriẹ no uruemu nọ ahwo uviuwou rai a re dhesẹ. Esẹgbini jọ a rẹ gwọlọ vuẹ emọ rai hi nọ a te ruthọ keme a gwọlọ ta ẹme nọ ọ rẹ ‘kẹ emọ rai uye he.’ Rekọ nọ whọ tẹ be hae vuẹ ọmọ ra oware nọ o ruthọ, u re fiobọhọ kẹe wuhrẹ obruoziẹ iroro riẹ re ọ sai vuhu oware nọ u woma gbe onọ u yoma.