OWARE JỌ NỌ AHWO A BE MAI RU EKIAKIẸ KPAHE EVAỌ OKE MAI NA HỌ, EPANỌ O RẸ DA TE NỌ OHWO O TE WHU KU OHWO. Dede na, wọhọ epanọ ma ruẹ evaọ izoẹme nọ e vrẹ na, ehrẹ nọ e mai woma nọ egba-eriariẹ a kẹ e rọwokugbe ehrẹ nọ e rrọ Ebaibol na. Onana u dhesẹ nọ ehrẹ nọ e rrọ Ebaibol na i re kiekpo ho. Ghele na, orọnikọ ehrẹ nọ e rọwokugbe eme nọ egba-eriariẹ e ta ọvo whọ rẹ ruẹ evaọ Ebaibol na ha. Whọ rẹ jọ Ebaibol na wuhrẹ kpahe eware sa-sa nọ whọ rẹ sai ruẹ evaọ eria efa ha, yọ eware nana e rẹ kẹ ahwo nọ a rrọ uweri omosasọ.

• Ebaibol na o dhesẹ nọ ahwo mai nọ a whu no a be ruẹ uye he

  Ebaibol na ọ ta evaọ obe Ọtausiuwoma Na 9:5 inọ: “Enọ i whu no a riẹ oware ovuovo ho.” “Iroro” rai e raha no. (Olezi 146:4) Onana o wha riẹ ze nọ Ebaibol na ọ rọ rehọ uwhu dhesẹ owezẹ.​—Jọn 11:11.

• Ma re wo omosasọ nọ ma tẹ rọwo nọ Ọghẹnẹ ọ ginẹ rrọ yọ o you omai

  Ebaibol na ọ ta evaọ obe Olezi 34:15 inọ: “Ibiaro Jihova * i bi rri ikiẹrẹe na, yọ ezọ riẹ i bi yo ubo rai kẹ obufihọ.” Nọ ma tẹ ta epanọ eware e rrọ omai oma kẹ Ọghẹnẹ evaọ olẹ, orọnikọ u re ru udu dhẹ omai ọvo ho. Ukpoye, olẹ yọ oware nọ u re fiobọhọ kẹ omai mu usu kugbe Ọghẹnẹ, ọnọ ọ rẹ sae rehọ ogaga riẹ rọ sasa omai oma.

• Eware i ti woma evaọ obaro

  Dai roro kpahe epanọ uzuazọ o te jọ evaọ obaro evaọ okenọ Ọghẹnẹ ọ te kpare ahwo nọ a whu no zihe ziọ uzuazọ evaọ otọakpọ na! Ebaibol na ọ ta kpahe oware nana unuẹse buobu. U te je dhesẹ epanọ eware e te jọ evaọ oke yena inọ, Ọghẹnẹ “o ti ririe irui-oviẹ kpobi no aro [mai], uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.”​—Eviavia 21:3, 4.

Ahwo buobu nọ a fievahọ Jihova gbe ẹme riẹ Ebaibol na, a wo ẹruore inọ a te wariẹ ruẹ ahwo rai nọ a whu no, yọ onana u re fiobọhọ kẹ ae thihakọ. Wọhọ oriruo, Ann nọ ọzae riẹ o whu evaọ okenọ ọ jọ ikpe 65 ọ ta nọ: “Mẹ jọ Ebaibol na wuhrẹ nọ ahwo mai nọ a whu no a be ruẹ uye he, yọ Ọghẹnẹ ọ te kpare ahwo kpobi nọ e rrọ iki ekareghẹhọ zihe ziọ uzuazọ. Oke kpobi nọ me te roro kpahe ọzae mẹ na, mẹ rẹ kareghẹhọ eyaa Ọghẹnẹ nana, yọ onana u re fiobọhọ kẹ omẹ thihakọ oware uyoma nana nọ o via kẹ omẹ na!”

Tiina nọ ma fodẹ evaọ uzoẹme jọ nọ o vrẹ na ọ ta nọ: “Anwẹnọ ọzae mẹ Timo o ro whu na, Ọghẹnẹ ọ be tha omẹ uke. Me muẹrohọ nọ Jihova o fiobọhọ kẹ omẹ evaọ okenọ mẹ jọ uweri na. Mẹ riẹ nọ eyaa ẹkparomatha nọ e rrọ Ebaibol na i ti rugba ẹdẹjọ. Yọ onana u bi fiobọhọ kẹ omẹ thihakọ bọo okenọ mẹ te wariẹ ruẹ ọzae mẹ na.”

Ima ahwo buobu nọ a fievahọ Ebaibol na a rọwo eme nọ ahwo nana a ta na. O tẹ make rọnọ eyaa Ebaibol na i mu owhẹ ẹro ho, hayo who te roro nọ yọ iku esia gheghe, daoma se Ebaibol na re whọ ruẹ imuẹro nọ i dhesẹ nọ ehrẹ riẹ i re fiobọhọ, yọ eyaa nọ e rrọ eva riẹ i ti gine rugba. Whọ te ruẹ nọ ehrẹ nọ e rrọ Ebaibol na họ ehrẹ nọ e mai woma nọ i re fiobọhọ kẹ ahwo nọ a rrọ uweri.

Rri ividio nọ a jọ ta kpahe ẹruore nana evaọ oria itanẹte mai, jw.org

ẸVẸ AHWO NỌ A WHU NO A RRỌ?

EMAMỌ USI NỌ ỌGHẸNẸ O WO KẸ OWHẸ!