“Sophia * aye mẹ ọ mọ krẹkri taure o te ti whu, yọ evaọ oke yena ma rọo vrẹ ikpe 39 no. Egbẹnyusu mẹ a nyaze te sasa omẹ oma, yọ mẹ jẹ hai ru eware sa-sa viukpenọ mẹ rẹ keria oria ovo goli. Rekọ evaọ ẹgbukpe soso, uwhu aye mẹ na o jẹ da omẹ gaga. Ẹsikpobi mẹ jẹ hae jọ ọkọkora je roro iroro. Dede nọ u te enwenọ ikpe esa no nọ o ro whu na, edada na e rẹ wariẹ zihe ze ẹsejọ.”​—Kostas.

Kọ ohwo jọ o whu ku owhẹ no ẹdẹjọ? O tẹ rrọ ere, whọ te riẹ epanọ o rẹ da te wọhọ epanọ o jọ kẹ Kostas na. Nọ aye hayo ọzae, omoni hayo ogbẹnyusu ọkpekpe ohwo o te whu, a rẹ ruẹ oware nọ o da tei hi. Ahwo nọ a wuhrẹ kpahe epanọ uwhu o rẹ da te a rọwokugbe ẹme nana. A jọ uzoẹme jọ nọ a kere fihọ obe na The American Journal of Psychiatry ta nọ “uwhu họ oware ọvuọvo nọ o rẹ rehọ ohwo nọ who you mi owhẹ bẹdẹ bẹdẹ.” Nọ orọnọ uwhu o rẹ wha edada egaga ze na, ohwo nọ ọ rrọ uweri ọ rẹ sae nọ inọ: ‘Ẹvẹ edada nana i ti krite? Kọ eva e te sae wariẹ were omẹ ẹdẹjọ? Ẹvẹ mẹ sae rọ wariẹ wo omosasọ?’

A kiyo enọ nana evaọ uvitha Awake! nana. Evaọ uzoẹme nọ o rrọ aro na, ma te ta kpahe oware nọ whọ rẹ sai rẹro riẹ otẹrọnọ ohwo ra jọ o whu kẹle. Ma te jọ izoẹme efa nọ e rrọ uvitha Awake! nana ta kpahe eware sa-sa nọ e rẹ sai fiobọhọ kẹ owhẹ nọ uweri ra o gbẹ rọ ga hrọ họ.

U mu omai ẹro nọ izoẹme nọ e rrọ aro na, i ti fiobọhọ kẹ ahwo nọ a rrọ uweri wo omosasọ jẹ riẹ eware nọ a re ru re edada rai e sai kpotọ.