Gbe imiku jọ kẹ omai kpahe uzuazọ nọ who yeri no emaha ze.

1979 a yẹ omẹ evaọ obọ United States. Nọ mẹ jọ ikpe esa, ọsẹ gbe oni mẹ a tẹ fa orọo. Oni mẹ o wuhrẹ omẹ uruemu ahwo Ju no emaha ze. O vi omẹ kpohọ isukulu ahwo Ju nọ a re se yeshiva. Nọ mẹ jọ ikpe ihrẹ, ma tẹ kwa kpobọ Israel. Ukpe ọvo ma rria obei, yọ me kpohọ isukulu evaọ ẹwho nọ ahwo a re jo ru iruo ẹwọ gbe eghẹrẹ iruo efa. A re se eria itieye na kibbutz. Kẹsena mẹ avọ oni mẹ ma tẹ jẹ kwa kpobọ Mexico.

Dede nọ isinagọgo ọvuọvo ọ jọ oria nọ ma jẹ rria na ha, me gbe je ru eware nọ a rẹ jọ egagọ ahwo Ju ru. Mẹ jẹ hae rehọ ekandoro tu evaọ Ẹdijala, se ebe egagọ mai nọ a re se Torah, jẹ lẹ elẹ nọ a kere fihọ obe, nọ a re se siddur. Nọ mẹ tẹ rrọ obọ isukulu, mẹ rẹ vuẹ emọ eklase mai inọ egagọ mai họ ọrọ ọsosuọ kpobi. Oke yena, me ri se abọ Ebaibol nọ ahwo buobu a re se Ọvọ Ọkpokpọ na ha, onọ o ta kpahe usi uwoma ota Jesu gbe eware nọ o wuhrẹ. Oni mẹ ọ vẹvẹ omẹ unu inọ mẹ dawo iẹe sei hi keme o roro nọ eware nọ e rrọ Ọvọ Ọkpokpọ na e te raha udu mẹ no.

Fikieme whọ rọ rọwo se Ọvọ Ọkpokpọ na uwhremu na?

Nọ mẹ jọ ikpe ikpegbihrẹ, me te zihe kpobọ United States, kọ obei me jo wuhrẹ isukulu nwrotọ. Mẹ jọ obei nyaku ọmọzae jọ nọ ọ ta nọ ọye yọ Oleleikristi. Ọ vuẹ omẹ inọ mẹ gbẹ riẹ Jesu hu kiyọ oware jọ o jọ uzuazọ mẹ thọ.

Mẹ tẹ ta kẹe nọ, “Ahwo nọ a rọwo Jesu yọ ahwo nọ a viẹhọ no.”

Ọ tẹ nọ omẹ nọ, “Kọ who tube se Ọvọ Ọkpokpọ na no?”

Mẹ tẹ ta nọ “Ijo.”

Ọ tẹ nọ omẹ nọ, “Otẹrọnọ who ri sei hi, kọ ogbẹrọnọ oware nọ whọ riẹ oware ovo kpahe he, whọ be ta ẹme kpahe na?”

Ẹme na o duobọte omẹ gaga, keme me re rri ahwo nọ a re dhunu họ ẹme nọ a riẹ hẹ wọhọ ahwo nọ a wo areghẹ hẹ. Fikiere me te mi ei Ebaibol riẹ wha kpo, me te mu Ọvọ Ọkpokpọ na họ ese.

Ẹvẹ who rri eware nọ whọ jariẹ se?

U gbe omẹ unu gaga nọ mẹ ruẹ nọ ahwo Ju ae a kere Ọvọ Ọkpokpọ na. U te no ere no, nọ me bi se Ọvọ Ọkpokpọ na, mẹ tẹ te ruẹ nọ kpakọ Jesu yọ ohwo Ju nọ ọ jọ wowou je wo omaurokpotọ. Ọ jẹ gwọlọ fiobọhọ kẹ ahwo, orọnikọ o je fru ahwo re he. Me te muhọ ẹkiẹ kpahe Jesu. Me tube kpohọ oria nọ a re jo momo ebe, mẹ tẹ rehọ ebe buobu nọ e ta kpahe Jesu nọ me se. Rekọ enana ọvuọvo e lẹliẹ omẹ rọwo nọ Jesu họ Mesaya na ha. A tubẹ jọ ebe na jọ ta nọ Jesu họ Ọghẹnẹ. Mẹ rọwo ẹme yena vievie he. Otẹrọnọ Jesu họ Ọghẹnẹ, kọ ono ọ jẹ lẹ se? Omobọ riẹ? U te no ere no, Jesu o whu, yọ Ebaibol ọ ta nọ Ọghẹnẹ o “re whu hu.” *

Ẹvẹ whọ rọ riẹ iyo enọ nọ e jọ owhẹ udu na?

Uzẹme o rẹ bẹ evuhu hu, yọ mẹ gba riẹ mu nọ mẹ rẹ riẹ uzẹme na. Fikiere mẹ tẹ lẹ se Ọghẹnẹ gaga avọ irui-oviẹ nọ i bi no omẹ aro ze dede. Onana họ orọ ọsosuọ nọ mẹ rọ lẹ se Ọghẹnẹ ababọ obe siddur nọ a kere elẹ fihọ na. Nọ mẹ nwani ku olẹ na họ no, ahwo jọ a te kporo ẹthẹ mẹ. Nọ me rovie ẹthẹ, mẹ tẹ ruẹ Isẹri Jihova ivẹ. A tẹ kẹ omẹ obe rai jọ nọ a re ro wuhrẹ ahwo Ebaibol. Obe nọ a kẹ omẹ na gbe ẹme nọ mẹ avọ Isẹri Jihova ma ta uwhremu na oye o lẹliẹ omẹ riẹ nọ eware nọ a bi wuhrẹ, Ebaibol na i gine no ze. Wọhọ oriruo, Isẹri Jihova a rọwo nọ Jesu yọ “Ọmọ Ọghẹnẹ” * gbe “ọnọ ọ rọ emuhọ emama Ọghẹnẹ,” * orọnikọ abọjọ Esanerọvo ho.

U kri hi, me te zihe kpobọ Mexico. Nọ me te obei, Isẹri Jihova a te gbe bi wuhrẹ omẹ kpahe eruẹaruẹ sa-sa nọ e ta kpahe Mesaya na. Eruẹaruẹ na i bu wo umuo ho. Onana u gbe omẹ unu gaga! Ghele na, o jẹ kaki mu omẹ ẹro ho inọ Jesu họ Mesaya na. Mẹ jẹ jọ udu mẹ ta nọ: ‘Kọ Jesu ọvo họ ohwo nọ o ru eruẹaruẹ nana gba?’ ‘Kọ otẹrọnọ ọ faki ru wọhọ nọ ọye họ Mesaya na?’

Eme o ru owhẹ rọwo uwhremu na inọ Jesu họ Mesaya na?

Isẹri Jihova a jọ Ebaibol dhesẹ eruẹaruẹ jọ kẹ omẹ nọ ohwo ọvo ọ sae rọ ẹghẹ rugba ha. Wọhọ oriruo, ikpe nọ e vrẹ egba ihrẹ (700) soso taure a te ti yẹ Mesaya na, Maeka ọruẹaro na ọ ruẹaro nọ a ti yẹ Mesaya na evaọ Bẹtlẹhẹm evaọ Judia. * Kọ ọmọ nọ a ri yẹ hẹ ọ sae ginẹ rọ ẹghẹ ruẹrẹ oria nọ a ti jo yẹi fihọ? U te no ere no, Aizaya ọruẹaro na o kere nọ a te lahiẹ Mesaya na wọhọ ogbulegbu, kẹsena a ve ti kpei. Rekọ a ti ki ei kugbe edafe. * Eruẹaruẹ nana kpobi e jọ oma Jesu rugba.

Oware nọ o rọ mai mu omẹ ẹro nọ Jesu họ Mesaya na họ, uyẹ nọ o no ze. Ebaibol na ọ ta nọ uyẹ Devidi ovie na * oye Mesaya na o ti no ze. Ahwo Ju oke anwae a wo ebe nọ a jẹ hai kere uyẹ nọ a no ze fihọ. O hae jọ nọ Jesu o no uyẹ Devidi ze he, ewegrẹ riẹ a hai ti gogo iei evaọ oria kpobi inọ ọye họ Mesaya na ha! Rekọ a ta ere vievie he, keme ohwo kpobi ọ riẹ vevẹ nọ uyẹ Devidi oye Jesu o gine no ze. Ogbotu ahwo dede a je sei “Ọmọzae Devidi.” *

Ukpe 70 C.E., koyehọ nọ Jesu o whu no, nọ ikpe ọgbagbihrẹ e jẹ vrẹ no, egbaẹmo Rom a tẹ nyaze Jerusalẹm. A tẹ raha Jerusalẹm muotọ. Nọ onana o vrẹ no, a gbẹ ruẹ ebe nọ a kere uyẹ ahwo fihọ na ha. O sae jọ nọ oke ẹmo na a rọ raha ebe na hayo evru i vru. Fikiere, no umuo ukpe 70 C.E. ze, ohwo ọvo ọ sae gbẹ ta nọ ọye họ Mesaya na ha.

Kọ eme oyena o lẹliẹ owhẹ vuhumu?

A jọ obe Iziewariẹ 18:18, 19 ruẹaro nọ Ọghẹnẹ ọ te rọ ọruẹaro jọ mu evaọ Izrẹl nọ ọ wọhọ Mosis. Ọghẹnẹ ọ ta nọ ohwo kpobi nọ “ọ gaviezọ kẹ eme mẹ nọ ọ te rehọ odẹ mẹ ta ha, mẹ te rehọ iẹe guẹdhọ.” Nọ mẹ romatotọ wuhrẹ Ebaibol na soso, u te mu omẹ ẹro ziezi inọ Jesu ohwo Nazarẹt na họ ọruẹaro yena.