Kaki ru eware nọ e mai wuzou. Ebaibol na ọ ta nọ: “Vuhu eware nọ e mae roja.” (Ahwo Filipai 1:10) Kere eware nọ whọ riẹ nọ e roja hayo eware nọ u fo nọ a re ru no kpata kpata fihotọ. Kareghẹhọ nọ eware jọ nọ e roja e sae nwane jọ eware nọ u fo nọ a re ru okioke yena ha. Wọhọ oriruo, o roja re whọ dẹ eware nọ who ti ro there emu evaọ owọwọ kpahe rekọ o rrọ oware nọ a rẹ nwani ru okioke yena ha. Yọ eware jọ nọ u fo nọ a re ru no kpata kpata, e sae nwani wuzou tere he. Wọhọ oriruo, u fo nọ who re rri TV evaọ okenọ a re ro dhesẹ oware jọ nọ o rẹ were owhẹ gaga, rekọ o nwane roja tere he. *

Ma omaa kpahotọ. Ebaibol na ọ jọ obe Ọtausiuwoma Na 10:10 ta nọ: “Otẹrọnọ okwakwa-ayọno nọ a re ro ru iruo u whu akọ, a gbẹ thọe he, ohwo ọ rẹ rọ ogaga riẹ kpobi ru iruo. Rekọ areghẹ o re fiobọhọ kẹ ohwo ru oware via.” Eme onana u dhesẹ? Whọ sae thọ okwakwa iruo ra wọhọ odẹme, nọ whọ tẹ ma omaa kpahotọ re whọ sae rehọ oke ra ruiruo ziezi. Whọ raha oke ra fihọ eware nọ i wuzou tere he nọ e rẹ rehọ oke ra jẹ liẹliẹ oma rrọ owhẹ hẹ. Nọ whọ tẹ ruẹ nọ whọ kaki ru oware jọ nọ whọ ma omaa riẹ re no yọ oke o gbẹ riẹ, whọ sae rehọ oke nọ o kiọkọ na ru oware ọfa jọ nọ whọ hai ti ru evaọ oke ofa. Whọ tẹ ma omaa kpahotọ, whọ te sai ru eware buobu wọhọ oruiruo nọ ọ thọ okwakwa iruo riẹ kpahe.

Ru umutho eware. U wo eware jọ nọ i wuzou tere he yọ e rẹ raha oke ra kufiẹ gheghe ọvo. U fo nọ whọ rẹ riẹ epanọ whọ rẹ rọ whaha eware enana. Whọ tẹ kwa eware buobu vabọ, e rẹ liẹliẹ oma rrọ owhẹ je ru nọ who gbe ro wo evawere he.

Uruemu meti meti. “Ọnọ o re rri ofou ọ rẹ sae kọ ubi ovuovo ho, yọ ọnọ o re rri ẹgho o ti vu oware ovuovo ho.” (Ọtausiuwoma Na 11:4) Eme onana u dhesẹ? Ohwo nọ o wo uruemu meti meti ọ rẹ sai ru oware ovo ho. Ọwhẹrẹ nọ ọ rẹ hẹrẹ bẹsenọ eware kpobi i re kiehọ no, ọ rẹ sae kọ hayo vu hu. Epọvo na re, ma tẹ tẹrovi eware nọ e be via evaọ akpọ na, ma rẹ sae jiroro ovo dhobọ họ. Hayo nọ ma te roro nọ ma rẹ hẹrẹ bẹsenọ ma rẹ riẹ oware kpobi kpahe oware jọ nọ ma gwọlọ ru no tao, o sae jọ bẹbẹ re ma jiroro. Uzẹme riẹ họ, o roja re ma roro ziezi jẹ kiẹ kpahe oware nọ ma gwọlọ ru otẹrọnọ oware na u wuzou gaga. Obe Itẹ 14:15 o ta nọ: “Ọnọ o wo orimuo o re rri otọ mu re ọ tẹ te jowọ.” Dede na, eware buobu nọ ma rẹ jiroro rai e nwani wuzou tere he.​—Ọtausiuwoma Na 11:6.

Nọ ohwo ọ tẹ gwọlọ nọ o re ru eware kpobi gbagba ẹsiẹvo. Obe Jemis 3:​17 o ta nọ: “Areghẹ nọ o no obọ ehru ze [hayo nọ o no obọ Ọghẹnẹ ze] . . . o re dhesẹ nọ o wo iroro.” Uzẹme riẹ họ, uyoma ha re ohwo ọ romatotọ ru oware. Dede na, nọ ohwo ọ tẹ gwọlọ nọ o re ru eware riẹ kpobi gbagba je woma re ẹsiẹvo, o rẹ jọ bẹbẹ kẹe. Wọhọ oriruo, u fo nọ ohwo nọ o bi wuhrẹ ẹvẹrẹ ọkpokpọ ọ rẹ riẹ nọ ọ te ta eme buobu thọ, rekọ ẹmẹrera na ọ vẹ te riẹ ẹvẹrẹ na ẹta ziezi. Rekọ ohwo nọ ọ gwọlọ nọ o re ru eware riẹ kpobi gbagba ẹsiẹvo ọ rẹ dhozọ re ọ ta ẹme fikinọ ọ te ta ẹme jọ thọ, yọ onana o rẹ whae ze nọ o gbe ro wo ẹnyaharo ho. Fikiere, o mai woma re ma rẹro umutho eware mi omamai. Obe Itẹ 11:2 o ta nọ: “Ohwo nọ ọ riẹ umuo nọ ọ rẹ nyaba o wo areghẹ.” Ofariẹ, nọ ma tẹ riẹ ọnyaba mai je wo omaurokpotọ, o rẹ whae ze nọ ma gbe ro rri omamai kpehru ga hrọ họ je rẹro nọ oware o sae thọ omai obọ.

Riẹ oke nọ who re ro ru iruo gbe oke nọ who re ro serihọ. “Umutho eriosehọ u woma vi iruo egaga nọ e wọhọ ofou nọ a bi le.” (Ọtausiuwoma Na 4:6) Ahwo nọ a rẹ rehọ oke rai kpobi ru iruo ababọ eriosehọ a re wo uvẹ nọ a rẹ rọ re erere “iruo egaga” rai hi. A re gbe wo oke he yọ oma o rẹ rrọ ae no. Evaọ abọdekọ riẹ, ọyẹlẹ ọ rẹ gwọlọ rehọ oke riẹ kpobi serihọ jẹ raha oke riẹ kufiẹ. Rekọ Ebaibol na ọ gwọlọ nọ ma jọ owowa keme ọ tuduhọ omai awọ nọ: Ma ru iruo egaga jẹ reawere iruo abọ mai. Oghọghọ nọ ma re wo no iruo abọ mae ze yọ “okẹ Ọghẹnẹ.”​—Ọtausiuwoma Na 5:19.

Hae wezẹ ziezi. Ohwo jọ evaọ usu ahwo nọ a kere Ebaibol na ọ ta nọ: “Me ti kiẹzẹ jẹ wezẹ dhedhẹ.” (Olezi 4:8) O gwọlọ nọ ahwo nọ a kpako te ohwo no a rẹ wezẹ te oware wọhọ euwa eree evaọ aso re oma rai o sae jọ gaga. Onana o re je fiobọhọ kẹ ohwo rorote ziezi je wo otoriẹ eware vẹrẹ. Owezẹ o re fiobọhọ kẹ ohwo rehọ oke riẹ ruiruo ziezi keme ohwo nọ ọ be wezẹ ziezi o re muẹrohotọ, kareghẹhọ oware, jẹ riẹ oware nọ a bi wuhrẹ iẹe. Rekọ nọ ohwo ọ gbẹ be wezẹ tere he, ọ rẹ sae kake riẹ oware nọ a bi wuhrẹ iẹe he, eware e rẹ thọe obọ, yọ eva e rẹ kake dhae.

Ru eware nọ ẹgba ra u te. “O mai woma re ohwo ọ reawere eware nọ ọ be rọ ibiaro riẹ ruẹ viukpenọ o re ghoro gwọlọ eware nọ i bi si ei urru.” (Ọtausiuwoma Na 6:9) Eme onana u dhesẹ? Ohwo nọ o wo areghẹ ọ rẹ dhẹ lele eware gheghe nọ i bi si ei urru hu, maero kọ eware nọ ọ riẹ nọ ọ sai wo tobọ họ. Fikiere orọnikọ eware ekpokpọ kpobi nọ i kieze ọ rẹ nwane dẹ hẹ, o tẹ make rọnọ ọ rẹ sae dẹ reosa. Ukpoye, u fo nọ ọ rẹ riẹ umuo nọ ẹgba riẹ o te evaọ usu eware nọ “ọ be rọ ibiaro riẹ ruẹ.”

Uruemu ra u wuzou gaga. Emamọ uruemu u re fiobọhọ kẹ owhẹ salọ oware nọ uwoma, onọ o roja, gbe oware nọ u fo nọ whọ rẹ ginẹ rọ uzuazọ ra ru. Wọhọ oriruo, o hae jọnọ uzuazọ yọ ose nọ a rẹ sa, uruemu u re fiobọhọ kẹ owhẹ riẹ oria nọ u fo nọ whọ rẹ sa ose na fihọ. Fikiere emamọ uruemu u re fiobọhọ kẹ owhẹ jẹ emamọ iroro evaọ uzuazọ jẹ riẹ epanọ whọ rẹ rọ rehọ oke ra ruiruo ziezi kẹdẹ kẹdẹ. Eme ọ rẹ sai fiobọhọ kẹ owhẹ wo emamọ uruemu utioye na? Ahwo buobu a rẹ ta nọ Ebaibol na keme Ebaibol na yọ obe nọ o vọ avọ areghẹ.​—Itẹ 2:6, 7.

Dhesẹ uyoyou keme u wuzou gaga. Obe Ahwo Kọlọsi 3:14 o ta nọ uyoyou “o rẹ wha okugbe ọkpekpe ze.” Ababọ uyoyou, ma rẹ sai wo uvi evawere hayo udhedhẹ hẹ maero kọ evaọ uviuwou mai. Ahwo nọ a rẹ rehọ oke rai kpobi le efe gbe epanọ a re ro wo okpodẹ, rekọ a wo oke nọ a rẹ rọ jọ kugbe ahwo uviuwou rai hi, a re wo evawere he. Oyejabọ nọ Ebaibol ọ rọ ta nọ uyoyou u wuzou gaga na, yọ o fodẹ e riẹ unuẹse buobu re.​—1 Ahwo Kọrint 13:​1-3; 1 Jọn 4:8.

Ruẹrẹ oke jọ kpahe nọ who re ro wuhrẹ kpahe Ọghẹnẹ. Ọzae jọ nọ a re se Geoff o wo aye nọ o you rie yọ o yẹ emọ ivẹ. O wo emamọ egbẹnyusu yọ o bi ru iruo nọ a rẹ jọ dhogbo bru ahwo nọ a kiẹ ẹyao hayo ahwo nọ oware jọ o via kẹ idudhe. Fiki oghẹrẹ iruo nọ o bi ru na, ẹsibuobu ọ rẹ nyaku ahwo nọ a be ruẹ uye gbe ahwo nọ a whu no. Ọ nọ inọ: “Kọ enẹ u fo nọ uzuazọ o rẹ ginẹ jọ?” Ẹdẹjọ o te se ebe Isẹri Jihova nọ a kere no Ebaibol na ze, yọ eware nọ o se ku e kiyo enọ riẹ.

Geoff ọ tẹ vuẹ aye gbe emọ riẹ kpahe eware nọ o bi se na, yọ eware na e were e rai gaga. Kẹsena ahwo uviuwou riẹ a te mu Ebaibol na họ ewuhrẹ, yọ onana u fiobọhọ kẹ ae nọ a rọ rehọ oke rai ruiruo ziezi. Eware nọ a wuhrẹ evaọ Ebaibol na u ru nọ a ro wo ẹruore uzuazọ ebẹdẹ bẹdẹ evaọ akpọ nọ ahwo a te jọ ruẹ uye he.​—Eviavia 21:3, 4.

Iku Geoff na e rẹ kareghẹhọ omai ẹme nọ Jesu ọ ta inọ: “Eva e were enọ e riẹ nọ u fo re a riẹ Ọghẹnẹ.” (Matiu 5:3) Fikiere daoma ruẹrẹ oke jọ kpahe nọ who re ro wuhrẹ kpahe Ọghẹnẹ. Who te ru ere, jọ u mu owhẹ ẹro nọ who ti wo areghẹ nọ whọ rẹ rọ rehọ oke ra ruiruo ziezi kẹdẹ kẹdẹ evaọ edẹ uzuazọ ra kpobi.